शनिवार, 14 नोव्हेंबर 2026
ऊसदराचा तिढा कायम; रविवारी कराड-चिपळूण महामार्गावर शेतकरी संघटनांचा चक्काजाम!
तालुक्यातील ऊस उत्पादक शेतकरी दराच्या प्रतीक्षेत असताना कारखानदारांकडून ऊसदर नाहीर करण्याबाबत कोणतीही स्पष्ट भूमिका घेतली जात नाही. यापूर्वी बळीराजा शेतकरी संघटना, शेतकरी संघटना, राष्ट्रीय समाज पक्ष, रयत कांती संघटना तसेच इतर शेतकरी संघटना यांच्यावतीने ऊसदराचा प्रश्न उपस्थित करत नवारस्ता येथे आंदोलनाची घोषणा करण्यात आली होती. मात्र दिवाळी सणाच्या पार्श्वभूमीवर ८ नोव्हेंबर रोजीचे आंदोलन तात्पुरते स्थगित करण्यात आले होते.
त्यानंतर या प्रश्नावर शासनस्तरावर चर्चा होऊन सातारा जिल्हाधिकारी कार्यालयात पालकमंत्री शंभूराज देसाई यांच्या अध्यक्षतेखाली शेतकरी संघटनांचे प्रतिनिधी आणि साखर कारखानदार यांची समन्वय बैठक आयोजित करण्यात आली. या बैठकीत कारखानदारांना ऊसदर जाहीर करण्यासाठी २ दिवसांची मुदत देण्यात आली होती. मात्र मुदत संपूनही दर जाहीर न झाल्याने शेतकरी संघटनांनी पुन्हा आंदोलनाचे हत्यार उपसले आहे.
कारखानदारांना बैठकीत दिलेली मुदत संपूनही ऊसदर जाहीर झालेला नसल्याने शेतकरी संघटनांनी १५ नोव्हेंबर रोजी चक्काजाम आंदोलन करण्याचा निर्णय घेतला आहे. या आंदोलनाच्या माध्यमातून कारखानदार आणि शासनाचे लक्ष शेतकऱ्यांच्या प्रलंबित प्रश्नांकडे वेधण्यात येणार आहे. ऊसदराचा प्रश्न केवळ पाटण तालुक्यापुरता मर्यादित नसून संपूर्ण सातारा जिल्ह्यातील ऊस उत्पादक शेतकऱ्यांच्या आर्थिक भविष्याशी निगडीत असल्याने शेतकऱ्यांनी एकजुटीने या लढ्यात सहभागी व्हावे, असे आवाहन करण्यात आले आहे.
यावेळी बळीराजा शेतकरी संघटना सातारा जिल्हा अध्यक्ष चंद्रकांत यादव, शेतकरी संघटना पाटण तालुका अध्यक्ष प्रशांत पाटील, राष्ट्रीय समाज पक्ष सातारा जिल्हा युवक अध्यक्ष विकास कदम, पश्चिम महाराष्ट्र अध्यक्ष शेतकरी संघटना तात्या पाटील, बळीराजा शेतकरी संघटना जिल्हा उपाध्यक्ष सुनील कोळी, शेतकरी संघटना जिल्हा उपाध्यक्ष बाळासाहेब शिंदे, क्रांतिकारी शेतकरी संघटना जिल्हा अध्यक्ष उत्तम साळुंखे, रयत क्रांती शेतकरी संघटना कराड तालुका उपाध्यक्ष विशाल पुस्तके, शेतकरी संघटना पाटण तालुका उपाध्यक्ष काशिनाथ शिर्के व संघटनांचे पदाधिकारी उपस्थित होते.
रविवार १५ नोव्हेंबर रोजी नवारस्ता येथे होणारे चक्काजाम आंदोलन हे कोणत्याही राजकीय स्वार्थासाठी नसून शेतकऱ्यांच्या न्याय्य हक्कांसाठी आहे. यावर्षी कोल्हापूर पॅटर्नप्रमाणे शेतकऱ्यांना योग्य ऊसदर मिळवून देण्यासाठी सर्व शेतकरी संघटना एकजुटीने मैदानात उतरल्या आहेत. ऊसदर जाहीर होऊन शेतकऱ्यांना न्याय मिळेपर्यंत आमचा संघर्ष थांबणार नाही. त्यामुळे सर्व ऊस उत्पादक शेतकरी, सभासद व शेतकरी हितचिंतकांनी या आंदोलनात मोठ्या संख्येने सहभागी व्हावे, असे जिल्हाध्यक्ष, बळीराजा शेतकरी संघटना चंद्रकांत यादव यांनी म्हटलं आहे.
एकीकडे दुष्काळाचे पार्श्वभूमीवर मुख्यमंत्री आणि महसूल मंत्री शेतकऱ्यांकडे असणाऱ्या कर्जबाबत वित्तीय संस्थांना वसुलीसाठी तगदा लावू नये अशी भूमिका मांडताना दिसत आहेत. मात्र शासनाचा जलसंपदा विभाग हा शेतकऱ्यांकडे थकीत पाणीपट्टी वसुलीच्या तगादा लावताना दिसत आहे, ही दुटप्पी भूमिका जर थांबली नाही तर जशास तसे उत्तर द्यायला आम्ही समर्थ आहोत, अशी प्रतिक्रिया शेतकरी संघटना पाटण तालुका अध्यक्ष प्रशांत पाटील यांनी दिली.
E20 पेट्रोलच्या गुणवत्तेवर बीपीसीएलचे स्पष्टीकरण; 893 नमुन्यांमध्ये इथेनॉलचे प्रमाण योग्य
Ans: नवारस्ता येथे कराड-चिपळूण राष्ट्रीय महामार्गावर रास्ता रोको आंदोलन होणार आहे.
Ans: रविवार, दि. १५ रोजी दुपारी १ वाजता आंदोलन करण्यात येणार आहे.
Ans: जिल्हाधिकाऱ्यांच्या उपस्थितीत झालेल्या समन्वय बैठकीत कारखानदारांना ऊसदर जाहीर करण्यासाठी दोन दिवसांची मुदत देण्यात आली होती. मात्र मुदत संपूनही कोणत्याही कारखान्याने दर जाहीर न केल्याने आंदोलनाचा निर्णय घेण्यात आला.
