Colorectal Cancer Awareness Month: पचनाच्या तक्रारी वारंवार होतात? सावधान! असू शकतात कॅन्सरचे संकेत

सध्या कॅन्सरचे प्रमाण वाढलेले दिसून येत आहे आणि तेदेखील कोलन कॅन्सर. मार्च महिना हा खरंतर कोलोरेक्टर कॅन्सर जागरूकता महिना आहे. कोलोरेक्टल कॅन्सरची नक्की लक्षणे काय आणि संकेत कसे ओळखाल जाणून घ्या

• कोलोरेक्टल कॅन्सर जागरूकता महिना 

• कोलोरेक्टल कॅन्सरचे संकेत काय आहेत 

• मार्चमध्ये का जागरूकता निर्माण केली जाते 

मार्च महिना हा जगभरात कोलोरेक्टल कॅन्सर जागरुकता महिना म्हणून पाळला जातो. मोठ्या आतड्याचा कॅन्सर म्हणजेच कोलोरेक्टल कॅन्सर हा सुरुवातीच्या टप्प्यात ओळखला गेला तर त्यावर उपचार करणे शक्य असते. मात्र अनेकदा पचनाशी संबंधित लक्षणांकडे दुर्लक्ष केल्यामुळे या आजाराचे उशिराने निदान होते आणि त्याचे परिणाम गंभीर ठरू शकतात. त्यामुळे शरीर देत असलेल्या सूचनांकडे वेळीच लक्ष देणे अत्यंत गरजेचे आहे असा सल्ला तज्ज्ञांनी दिला आहे.

काय आहे लक्षणे 

वैद्यकीय तज्ज्ञांच्या मते, पोटात सतत दुखणे, वारंवार बद्धकोष्ठता किंवा जुलाब होणे, शौचाच्या सवयींमध्ये अचानक बदल, शौचावाटे रक्तस्राव होणे, पोट फुगणे, अचानक वजन कमी होणे, भूक कमी लागणे किंवा सतत थकवा जाणवणे ही काही महत्त्वाची लक्षणे आहेत. ही लक्षणे दीर्घकाळ टिकून राहिल्यास त्वरित डॉक्टरांचा सल्ला घेणे गरजेचे आहे.

Colorectal Cancer: कोलोरेक्टल कॅन्सर का होतो? लक्षण, उपाय आणि कशी घ्यावी काळजी

तज्ज्ञांचे मत 

तळेगावच्या टीजीएच-आँन्को लाईफ कँन्सर सेंटरचे सर्जिकल ऑन्कोलॉजिस्ट डॉ. विवेक बांदे सांगतात की, कोलोरेक्टल कॅन्सरचे जर सुरुवातीच्या टप्प्यात ओळखला गेला तर त्यावर यशस्वी उपचार करता येतात. ४५ वर्षांनंतर प्रत्येकाने नियमित आरोग्य तपासणी, फायबरयुक्त आहाराचे सेवन, दैनंदिन आहारात ताजी फळं आणि भाज्यांचा समावेश आणि पुरेसे पाणी पिणे यामुळे या आजाराचा धोका कमी करता येतो.

पुण्यातील अपोलो स्पेक्ट्रा रूग्णालयातील गॅस्ट्रोएन्टेरोलॉजिस्ट डॉ. विशाल शेठ म्हणाले की, अनेक लोक पचनाच्या समस्या सामान्य आणि किरकोळ समजून त्याकडे दुर्लक्ष करतात. मात्र, मलविसर्जनाच्या सवयींमध्ये बदल होणे, रक्तस्त्राव होणे किंवा पोटात सतत वेदना होणे अशी लक्षणे दीर्घकाळ टिकत असल्यास ती कोलोरेक्टल कॅन्सरची सुरुवातीची चिन्हे असू शकतात. त्यामुळे अशा लक्षणांकडे दुर्लक्ष न करता वेळेवर वैद्यकीय तपासणी करणे अत्यंत गरजेचं आहे. बदलती जीवनशैली, शारीरिक हालचालींचा अभाव, जंक फूडचे वाढते सेवन आणि वाढलेला ताणतणाव यामुळे पचनाशी संबंधित आजारांचे प्रमाण वाढत आहे. चांगले पचन आरोग्य राखण्यासाठी नियमित व्यायाम आणि संतुलित आहार असलेली निरोगी जीवनशैली अवलंबणे आवश्यक आहे.

तज्ज्ञांच्या मते, वेळीच वेळी निदान झाल्यास कोलोरेक्टल कॅन्सरवर प्रभावी उपचार शक्य आहेत. त्यामुळे आपले शरीर देत असलेल्या संकेतांकडे दुर्लक्ष न करता योग्य वेळी वैद्यकीय सल्ला घेणे गरजेचे आहे. जागरूकता आणि नियमित तपासणी हीच या आजाराविरुद्धची सर्वात मोठी शस्त्र आहेत.

Colorectal Cancer Symptoms: शौचासाठी सतत धावताय टॉयलेटमध्ये? मलाशय कॅन्सरचा असू शकतो संकेत; 5 संकेत

लक्षणांकडे दुर्लक्ष करू नका

• शौचाच्या सवयींमध्ये अचानक बदल
• शौचातून रक्त येणे
• वारंवार बद्धकोष्ठता किंवा जुलाब
• पोटात सतत दुखणे किंवा पोट फुगणे
• अचानक वजन कमी होणे
• सतत थकवा जाणवणे

टीप – हा लेख केवळ सामान्य माहितीसाठी लिहिण्यात आला असून कोणत्याही प्रकारच्या उपचाराचा दावा यामध्ये करण्यात आलेला नाही. कोणताही उपाय करण्यापूर्वी आपल्या डॉक्टरांचा सल्ला घ्या आणि त्यांच्या सल्ल्यानुसारच योग्य बदलानुसार वापर करावा.