Ganesh Chaturthi Recipe: बाप्पाला करा खुश! नैवेद्यासाठी बनवा कुरकुरीत तळणीचे मोदक

गणशोत्सवाचे वारे आता सर्वत्र वाहताना दिसत आहेत. या दिवसांत सर्वात जास्त चर्चा कोणत्या पदार्थाची म्हटली तर याचे उत्तर मोदक असे मिळते. मोदक हा बाप्पाच्या आवडीचा पदार्थ आहे. मोदक अनेक प्रकारे बनवले जाऊ शकतात. आज आम्ही तुम्हाला कुरकुरीत आणि खुसखुशीत मोदक कसे तयार करायचे याची एक सोपी आणि हटके रेसिपी सांगत आहोत.

गणशोत्सव आता अवघ्या एका दिवसावर येऊन ठेपला आहे. या दिवसांत सर्वात जास्त चर्चा कोणत्या खाद्यपदार्थाची होत असेल तर तो पदार्थ म्हणजे मोदक. मोदक हा बाप्पाच्या आवडीचा पदार्थ असल्याचे म्हटले जाते. बाप्पाला खुश करण्यासाठी लोक नैवेद्याला मोदक बनवत असतात. आता मोदक हे अनेक वेगवेगळ्या प्रकारे बनवले जाऊ शकते. जसे की उकडीचे मोदक, मलाई मोदक, चॉकलेट मोदक आणि बरेच काही…

मात्र आज आम्ही तुम्हाला तळणीचे पारंपरिक मोदक कसे तयार करायचे याची एक सोपी आणि हटके रेसिपी सांगत आहोत. अनेक घरात उकडीचे नाही तर तळणीचे मोदक अधिकतर बनवले जातात. कुरकुरीत असल्याकारणाने हे मोदक अनेक लहान मुलांच्या आवडीचे ठरतात. तुम्हाला तळणीचे मोदक कसे तयार करायचे याची योग्य रेसिपी माहिती नसल्यास आजची ही रेसिपी नक्की फॉलो करा. हे मोदक फार कमी वेळेत बनून तयार होतात. जाणून घ्या यासाठी लागणारे साहित्य आणि कृती.

हेदेखील वाचा – Ganesh Chaturthi Recipe: बाप्पाच्या प्रसादासाठी बनवा बुंदीचा चविष्ट मोदक

साहित्य

• गव्हाचे पीठ – 1 वाटी
• बारीक रवा – पाव वाटी
• तेलाचे मोहन – 2 चमचे
• सुक्या खोबऱ्याचा किस- पाऊण वाटी
• खसखस – 2 चमचे
• पिठीसाखर – अर्धी वाटी
• नेवची पूड – अर्धा चमचा
• बदाम, काजू , पिस्ता पावडर – अर्धी वाटी
• बेदाणे – पाव वाटी
• तेल – 2 वाट्या

हेदेखील वाचा – Ganesh Chaturthi 2024: गणेशोत्सवनिमित्त घरी बनवा केसर माव्याचे चविष्ट मोदक, वाचा पारंपरिक रेसिपी

कृती

• तळणीचे मोदक तयार करण्यासाठी सर्वप्रथम गव्हाचे पीठ, रवा आणि मीठ एकत्र करून याचे घट्टसर कणिक मळून घ्या
• हे पीठ भिजवताना यामध्ये तेल गरम करुन त्याचे मोहन घालावे म्हणजे मोदक खुसखुशीत होण्यास मदत होते
  यानंतर गॅसवर एक कढई ठेवा आणि यात किसलेलं खोबरं आणि खसखस घालून काही मिनिटे मंद आचेवर परतून घ्या
• यानंतर गॅस बंद करा
• गॅस बंद केल्यावर यात सुकामेव्याची पूड आणि पिठीसाखर घालून सगळे चांगले एकजीव करा
• शेवटी यात वेलची पूड आणि बेदाणे टाकून सर्वकाही नीट एकजीव करून घ्या
• आता तुमचे मोदकांचे सारण तयार आहे
• यानंतर तयार कणिक घेऊन याच्या पुऱ्या लाटून घ्या
• मग एक पुरी घेऊन यात एक चमचे सारण भरा आणि पाकळ्या बनवून याचा व्यवस्थित मोदक तयार करा
• यानंतर आता गॅसवर एक कढई घेऊन यात तेल टाका
• तेल चांगले गरम झाले की यात एक एक मोदक टाका मंद आचेवर हे मोदक छान खुसखुशीत तळून घ्या
• अशाप्रकारे तुमचे कुरकुरीत मोदक तयार होतील