थंडीत केळीच्या चिप्समुळे चहाची मजा होईल द्विगुणित, 15 मिनिटांत तयार होते रेसिपी

Banana Chips Recipe: थंडीच्या मोसमात गरमागरम चहा पिण्याचा विचार अनेकदा आपल्या मनात येतो. चहासोबत कुरकुरीत चिप्सचा पर्याय अनेकदा उत्तम ठरतो. आम्ही सांगतो हे चिप्स तुम्ही घरीदेखील अवघ्या काही मिनिटांत तयार करू शकता.

थंडीचा ऋतू आता सुरु झाला आहे. या ऋतूत गरमा गरम चहा म्हणजे स्वर्गसुखाहून काही कमी नाही. याकाळात लोकांचे चहा पिण्याचे प्रमाण फार वाढते. आता चहा म्हटलं की, त्यासोबत स्नॅक्स हा आलाच. तुम्ही चहाप्रेमी असाल तर आजची ही रेसिपी तुम्ही एकदा नक्कीच घरी ट्राय करायला हवी. आज आम्ही तुम्हाला कच्च्या केळीपासून बाजारासारखे कुरकुरीत आणि चविष्ट चिप्स घरी कसे तयार करायचे याची एक सोपी आणि झटपट रेसिपी सांगणार आहोत.

कच्च्या केळ्यामध्ये फायबर, जीवनसत्त्वे आणि खनिजे मुबलक प्रमाणात असतात. हे चिप्स पोटॅशियमचा चांगला स्रोत आहेत, ज्यामुळे रक्तदाब नियंत्रित ठेवण्यास मदत होते. याशिवाय यामध्ये असलेले अँटीऑक्सिडंट शरीराला अनेक प्रकारच्या आजारांपासून वाचवतात. तुम्ही यांना ओव्हनमध्ये बेक देखील करू शकता. तसेच ओव्हन नसल्यास यांना तुम्ही तळून देखील आपल्या स्नॅक्ससाठी तयार करून ठेवू शकता. संध्याकाळच्या स्नॅक्ससाठी हा एक उत्तम पर्याय आहे. जाणून घेऊयात यासाठी लागणारे साहित्य आणि कृती.

विकेंडला काही युनिक होऊन जाऊदे! घरी बनवा Lays Paneer Bites, व्हिडिओतून जाणून घ्या रेसिपी

साहित्य

• कच्ची केळी
• हळद
• मीठ
• तेल

ऑफिसमध्ये सारखी भूक लागते? मग घरीच तयार करा कोल्हापुर स्टाईल तिखट भडंग, झटपट तयार होते रेसिपी

कृती

• यासाठी सर्वप्रथम कच्ची केळी नीट धुवून सोलून घ्या
• केळीचे पातळ काप करा. स्लाइस जितके पातळ तितकेच चिप्स कुरकुरीत होतील
• नंतर एका मोठ्या भांड्यात पाणी घेऊन त्यात मीठ आणि हळद घाला
• या मिश्रणात केळीचे काप टाका आणि 5-10 मिनिटे भिजवा. यामुळे चिप्सचा रंग वाढेल आणि खारटही होईल
• भिजवलेल्या केळीचे तुकडे गाळून घ्या आणि जास्तीचे पाणी काढून टाका
• केळीचे तुकडे स्वच्छ कापडावर पसरवा आणि काही वेळ कोरडे होऊ द्या
• दुसरीकडे कढईत तेल गरम करा
• तेल गरम झाल्यावर केळीचे तुकडे एक एक करून तळून घ्या
• गोल्डन ब्राऊन होईपर्यंत तळा. लक्षात ठेवा चिप्स लवकर तळून घ्या, त्यामुळे सतत ढवळत राहा
• जास्त तेल शोषून घेण्यासाठी तळलेले चिप्स बटर पेपरवर काढून टाका
• चिप्स पूर्णपणे थंड होऊ द्या आणि नंतर एका हवाबंद कंटेनरमध्ये चिप्स साठवून ठेवा
• आता तुम्हाला हवे तेव्हा तुम्ही या कुरकुरीत केळ्याच्या चिप्सचा आनंद लुटू शकता