Health Tips: जेवणानंतर चालल्याने जास्त फॅट बर्न होते? विज्ञान काय सांगतं

Health Tips: अनेक जण जेवल्यानंतर चालतात. असं केल्याने फॅट बर्न जास्त होतो असा अनेकांचा समज आहे. पण विज्ञान नक्की याबाबत काय सांगतं हेच आज आपण तज्ज्ञांकडून जाणून घेऊया

• तुम्हीही चरबी कमी करण्याचा प्रयत्न करताय का?

• जेवणानंतर चालल्याने चरबी कमी होते असं तुम्हाला वाटतं का?

• काय आहे तथ्य आणि तज्ज्ञांनी काय सांगितलं

Health Tips: जेवणानंतर १५ ते २० मिनिटे चालल्याने शरीरातील फॅट मोठ्या प्रमाणात जळते, असे अनेकदा सांगितले जाते. मात्र, उपलब्ध वैज्ञानिक पुरावे याला थेट किंवा प्रभावी ‘फॅट बर्निंग’ स्ट्रॅटेजी म्हणण्यास पुरेसे नाहीत. काही अभ्यासांमध्ये जेवणानंतर हलकी शारीरिक हालचाल केल्याने फॅटचा वापर वाढण्याची शक्यता दिसून आली आहे; मात्र याबाबतचे निष्कर्ष मिश्र आहेत. तरीही, जेवणानंतर चालण्याचे मेटाबॉलिक आरोग्यासाठी महत्त्वाचे फायदे आहेत. 

१५ ते २० मिनिटे चालल्याने शरीराला रक्तातील साखरेचे नियंत्रण अधिक प्रभावीपणे करण्यास मदत होऊ शकते. जेवणातील कार्बोहायड्रेट्समुळे रक्तातील ग्लुकोजची पातळी वाढते. अशावेळी हलकी शारीरिक हालचाल केल्याने स्नायू ग्लुकोजचा ऊर्जेसाठी वापर करतात. त्यामुळे जेवणानंतर रक्तातील साखरेची वाढ कमी होण्यास आणि शरीराची इन्सुलिनला प्रतिसाद देण्याची क्षमता सुधारण्यास मदत होऊ शकते. डॉ. गौरव गुप्ता, कन्सल्टंट – इंटरनल मेडिसिन, सैफी हॉस्पिटल, मुंबई यांनी याबाबत व्यवस्थित माहिती दिली आहे. 

नक्की कोणासाठी हे उपयुक्त

प्रीडायबेटीस, इन्सुलिन रेसिस्टन्स, लठ्ठपणा किंवा फॅटी लिव्हर असलेल्या व्यक्तींसाठी हे विशेषतः फायदेशीर ठरू शकते. जेवणानंतर नियमित चालण्यामुळे ग्लुकोज मेटाबॉलिझमला मदत होऊन रक्तातील साखरेची दीर्घकाळ राहणारी वाढ कमी करण्यास हातभार लागू शकतो. कालांतराने रक्तातील साखरेचे नियंत्रण आणि इन्सुलिन सेन्सिटिव्हिटी सुधारल्याने एकूण मेटाबॉलिक आरोग्याला फायदा होऊ शकतो.

व्यायामासाठी वेळ नसला तरी करु नका चिंता, ऑफीसमध्येही ‘या’ सोप्या पद्धती वापरून करु शकता फॅट बर्न

काय सांगतात तज्ज्ञ

फॅटी लिव्हर किंवा शरीराचे अतिरिक्त वजन असलेल्या व्यक्तींसाठी जेवणानंतर चालणे हा कठीण व्यायाम न करता दैनंदिन शारीरिक हालचाल वाढवण्याचा सोपा मार्ग ठरू शकतो. यामध्ये सातत्य महत्त्वाचे आहे. जेवणानंतरची छोटीशी चाल फॅट मोठ्या प्रमाणात जाळणार नाही; मात्र संतुलित आहार, नियमित व्यायाम आणि निरोगी जीवनशैलीसोबत ती वजन व्यवस्थापन आणि मेटाबॉलिक आरोग्यासाठी उपयुक्त ठरू शकते.

कशा पद्धतीने करावा व्यायाम 

चालण्याचा वेगही खूप जास्त असण्याची गरज नाही. आरामदायी किंवा हलक्या वेगाने केलेले ब्रिस्क वॉकिंग शरीराला ग्लुकोजचा अधिक प्रभावीपणे वापर करण्यास मदत करू शकते. त्यामुळे जेवणानंतर चालणे ही सहज अंगीकारता येणारी आणि टिकवून ठेवता येणारी सवय ठरू शकते.

त्यामुळे जेवणानंतर १५ ते २० मिनिटे चालणे हे फॅट बर्न करण्याचा शॉर्टकट म्हणून पाहू नये. मात्र, रक्तातील साखर आणि इन्सुलिन मेटाबॉलिझमसाठी त्याचे महत्त्वपूर्ण फायदे होऊ शकतात. विशेषतः प्रीडायबेटीस, फॅटी लिव्हर किंवा अतिरिक्त वजन असलेल्या व्यक्तींनी जेवणानंतर थोडे चालणे ही दैनंदिन दिनचर्येतील एक सोपी आणि उपयुक्त सवय बनवू शकते.

1 किलो वजन कमी करण्यासाठी रोज इतक्या किलोमीटरने धावाल तरच विरघळेल शरीराची चरबी