ज्येष्ठ आणि घराबाहेर पडण्यास असमर्थ रुग्णांसाठी ‘होम मेडिकेअर’; डॉक्टर, नर्सिंग, फिजिओथेरपीची सुविधा
‘होम मेडिकेअर’ अंतर्गत अनुभवी डॉक्टर रुग्णांच्या घरी भेट देऊन वैद्यकीय सल्ला, फॉलो-अप तपासणी, आरोग्याचे मूल्यांकन आणि उपचारविषयक मार्गदर्शन करतील. तीव्र तसेच दीर्घकालीन आरोग्य समस्यांचे व्यवस्थापन करण्यासाठी डॉक्टरांच्या देखरेखीखाली उपचार दिले जाणार आहेत. त्यामुळे रुग्णांना प्रत्येक वेळी रुग्णालयात जाण्याची आवश्यकता कमी होण्यास मदत होऊ शकते.
या सेवेमध्ये वैयक्तिकृत नर्सिंग केअरची सुविधाही उपलब्ध करून देण्यात आली आहे. यामध्ये महत्त्वाच्या आरोग्यविषयक लक्षणांचे निरीक्षण, औषधांचे व्यवस्थापन, जखमांची निगा, कॅथेटरची काळजी, फीडिंग ट्यूबशी संबंधित मदत, ईसीजी मॉनिटरिंग, रक्तातील साखरेची तपासणी, आवश्यक वैद्यकीय प्रक्रिया, यांसारख्या सेवांचा समावेश आहे.
शस्त्रक्रिया, स्ट्रोक, हृदयविषयक समस्या, न्यूरोलॉजिकल आजार, मस्क्युलोस्केलेटल विकार किंवा क्रीडाविषयक दुखापतीनंतर रुग्णांच्या पुनर्वसनासाठी फिजिओथेरपी आणि रिहॅबिलिटेशन सेवाही उपलब्ध करून देण्यात आली आहे. रुग्णाच्या वैयक्तिक गरजेनुसार उपचार योजना तयार केली जाणार असून, हालचालक्षमता, शारीरिक ताकद आणि स्वावलंबन वाढवण्यावर भर दिला जाणार आहे.
रुग्णांना तपासण्यांसाठी बाहेर जावे लागू नये, यासाठी घरच्या घरी डायग्नोस्टिक तपासण्यांची सुविधाही या सेवेत उपलब्ध आहे. प्रशिक्षित तंत्रज्ञ रुग्णांच्या घरून प्रयोगशाळेतील तपासण्यांसाठी आवश्यक नमुने गोळा करतील. यामुळे विशेषतः हालचालींमध्ये अडचण असलेल्या रुग्णांना मोठी सुविधा मिळू शकते.
डॉक्टरांनी लिहून दिलेली औषधे आणि आवश्यक आरोग्यविषयक साहित्य घरपोच उपलब्ध करून देण्याची सुविधाही या उपक्रमाचा भाग आहे. त्यामुळे औषधांसाठी रुग्ण किंवा त्यांच्या कुटुंबीयांना वारंवार घराबाहेर पडण्याची गरज भासणार नाही.
सध्या ‘होम मेडिकेअर’ सेवा माहिम, वांद्रे, खार आणि सांताक्रूझ या परिसरांमध्ये उपलब्ध करण्यात आली आहे. या सेवेच्या माध्यमातून घर आणि रुग्णालय यांच्यातील आरोग्यसेवेची दरी कमी करण्याचा प्रयत्न करण्यात आला आहे.
होली फॅमिली हॉस्पिटलच्या फॅमिली फिजिशियन सिस्टर डॉ. शैनी जॉयस यांच्या पुढाकारातून ही सेवा सुरू करण्यात आली आहे. त्यांच्या मते, आरोग्यसेवा प्रत्येकासाठी सहज उपलब्ध असणे आवश्यक आहे. विशेषतः रुग्णालय किंवा क्लिनिकमध्ये वारंवार जाणे कठीण असलेल्या ज्येष्ठ आणि घराबाहेर पडण्यास असमर्थ रुग्णांसाठी घरच्या घरी वैद्यकीय सेवा महत्त्वाची ठरू शकते. त्यांनी होम हेल्थकेअरमुळे उपचारांमध्ये सातत्य राखण्यास, अनावश्यक रुग्णालयीन भेटी कमी करण्यास आणि रुग्णांना परिचित वातावरणात काळजी मिळण्यास मदत होऊ शकते, असे नमूद केले.
वृद्ध आई-वडील किंवा दीर्घकालीन आजाराने त्रस्त कुटुंबीयांची काळजी घेणे अनेकदा कुटुंबांसाठी आव्हानात्मक ठरते. डॉक्टरांच्या भेटी, औषधांचे व्यवस्थापन, नर्सिंग प्रक्रिया, फिजिओथेरपी आणि तपासण्यांसाठी रुग्णालयात जाण्याची आवश्यकता असल्यास हे आव्हान आणखी वाढते. ‘होम मेडिकेअर’मुळे या सेवांपैकी विविध सेवा घरच्या घरी उपलब्ध होणार असल्याने रुग्णांसोबतच त्यांच्या कुटुंबीयांनाही सुविधा मिळण्याची अपेक्षा आहे.
स्मार्टवॉच घातल्याने खरंच होतो कॅन्सर? जाणून घ्या सोशल मीडियावर करण्यात आलेल्या दाव्यांमधील खरे सत्य
‘होम मेडिकेअर’ सेवा केवळ घराबाहेर पडण्यास असमर्थ (Homebound) रुग्णांसाठी उपलब्ध आहे. सध्या ही सेवा माहिम, वांद्रे, खार आणि सांताक्रूझ परिसरापुरती मर्यादित आहे. होली फॅमिली हॉस्पिटलच्या या उपक्रमामुळे रुग्णालय-केंद्रित आरोग्यसेवेबरोबरच रुग्णांच्या घरापर्यंत पोहोचणाऱ्या समुदाय-केंद्रित आणि रुग्ण-केंद्रित आरोग्यसेवेला चालना मिळण्याची अपेक्षा आहे.
.png "Videos"){kind=small}
