Monsoon Recipe : पावसाळ्यात आजारांपासून दूर राहायचंय? मग घरी नक्की बनवा हा आयुर्वेदिक काढा

पावसाळ्यात सर्दी, खोकला आणि व्हायरल संसर्गाचा धोका वाढतो. अशा वेळी तुळस, आले आणि इतर मसाल्यांपासून तयार केलेला घरगुती काढा शरीराला उब देण्यास आणि प्रतिकारशक्ती टिकवून ठेवण्यास मदत करतो.

• तुळस, आले, काळी मिरी आणि दालचिनीपासून हा पौष्टिक काढा तयार होतो.
• पावसाळ्यात शरीराला उब देण्यासाठी आणि ऋतूतील बदलांशी जुळवून घेण्यासाठी उपयुक्त पर्याय.
• अवघ्या काही मिनिटांत तयार होणारा हा काढा गरम किंवा कोमट पिणे अधिक फायदेशीर ठरते.

पावसाळा सुरू झाला की हवेतला गारवा आणि आल्हाददायक वातावरण मनाला आनंद देत असले तरी या ऋतूमध्ये सर्दी, खोकला, घसा खवखवणे, ताप आणि व्हायरल संसर्गाचा धोका वाढतो. बदलते हवामान आणि वाढलेली आर्द्रता यामुळे शरीराची प्रतिकारशक्ती कमी होऊ शकते. अशा वेळी घरच्या घरी तयार केलेला पारंपरिक काढा शरीराला उब देण्यास आणि ऋतुमानाशी जुळवून घेण्यास मदत करतो.

पावसाळ्यात चहासोबत खाण्यासाठी बनवा कुरकुरीत मसाला कॉर्न चीज कटलेट, नोट करून घ्या सोपी रेसिपी

भारतीय स्वयंपाकघरात सहज उपलब्ध काही मसाले केवळ चवीसाठीच नव्हे तर त्यांच्या गुणधर्मांसाठीही ओळखले जातात. ही रेसिपी बनवायला अतिशय सोपी आहे आणि अवघ्या काही मिनिटांत तयार होते. गोडवा आवडत असल्यास शेवटी मध किंवा गूळ घालू शकता. मात्र मध नेहमी काढा थोडा कोमट झाल्यावरच घालावा.

साहित्य

• २ कप पाणी
• ८ ते १० तुळशीची पाने
• १ इंच आले (ठेचलेले)
• ४ ते ५ काळी मिरी
• २ लवंगा
• १ छोटा दालचिनीचा तुकडा
• ¼ टीस्पून हळद
• १ टीस्पून गूळ किंवा १ टीस्पून मध (ऑप्शनल)
• १ टीस्पून लिंबाचा रस (ऐच्छिक)

Recipe: उरलेल्या शिळ्या भाताला फेकताय? ही चूक करू नका, यापासून झटपट बनवा कुरकुरीत ‘राईस पकोडे’

कृती

• एका पातेल्यात २ कप पाणी गरम करून त्यात आले, काळी मिरी, लवंग आणि दालचिनी घाला.
• मिश्रण ५ मिनिटे मंद आचेवर उकळू द्या, जेणेकरून मसाल्यांचा अर्क पाण्यात उतरू लागेल.
• आता त्यात तुळशीची पाने आणि हळद घालून आणखी ५ ते ७ मिनिटे उकळा.
• पाणी साधारण अर्धे राहिल्यावर गॅस बंद करा.
• काढा गाळून कपात ओतून घ्या.
• थोडा कोमट झाल्यावर त्यात गूळ किंवा मध मिसळा. आवडत असल्यास काही थेंब लिंबाचा रस घाला.
• गरम किंवा कोमट असतानाच हा मान्सून स्पेशल काढा प्या.
• ताजा काढा बनवून लगेच पिणे अधिक चांगले.