कमी तेलाचा वापर करत उपवासाच्या दिवशी बनवा साबुदाणा आप्प्पे, वाचा सिंपल रेसिपी

नवरात्रीच्या नऊ दिवसांच्या उपवासामध्ये घरात अनेक पदार्थ बनवले जातात. त्यातील सगळ्यांच्या आवडीचा पदार्थ म्हणजे साबुदाणा. साबुदाणा वापरून अनेक वेगवेगळे पदार्थ बनवता येत. त्यामुळे आज आम्ही तुम्हाला साबुदाणा आप्पे कसे बनवावे, याची सोपी रेसिपी सांगणार आहोत. हा पदार्थ बनवण्यासाठी कमीत कमी तेल लागते. तसेच साबुदाणे आरोग्यासाठी पौष्टिक आणि हेल्दी आहेत. चला तर जाणून घेऊया रेसिपी.

आज नवरात्री उत्सवाचा सहावा दिवस आहे. या नऊ दिवसांमध्ये सगळीकडे वेगळाच आनंद आणि उत्साह असतो. नऊ दिवस देवीची मनोभावे पूजा करून देवीला अनेक वेगवेगळ्या गोड पदार्थांचा नैवेद्या दाखवला जातो. तसेच मनोभावे देवीची पूजा करून प्रार्थना केली जाते. नवरात्रीमध्ये अनेक लोक नऊ दिवस उपवास करतात. या दिवसांमध्ये केलेला उपवास आरोग्यासाठी अतिशय चांगला असतो. त्यामुळे वाढलेले वजन कमी करण्यासाठी आणि आरोग्य निरोगी ठेवण्यासाठी नवरात्रीच्या नऊ दिवसांमध्ये उपवास करावा. उपवास म्हटलं की सगळ्यांच्या घरी साबुदाण्याची खिचडी किंवा बटाट्याची भाजी हे ठराविक पदार्थ बनवले जातात. काहीवेळा हे पदार्थ खाल्ल्यामुळे पचनक्रिया बिघडण्याची शक्यता असते. त्यामुळे उपवासाच्या दिवशी पचनास हलके आणि पौष्टिक पदार्थ खावेत. म्हणूनच आज आम्ही तुम्हाला उपवासाचे साबुदाणा आप्पे कसे बनवावे, याची सोपी रेसिपी सांगणार आहोत. चला तर जाणून घेऊया.(फोटो सौजन्य-सोशल मीडिया)

साहित्य:

• साबुदाणे
• बटाटा
• हिरवी मिरची
• जिरे
• काळीमिरी पावडर
• मीठ
• तेल
• कोथिंबीर
• कढीपत्ता
• शेंगदाण्याचा कूट
• लिंबाचा रस

हे देखील वाचा: १० मिनिटांमध्ये बनवा उपवासाचा कुरकुरीत डोसा, वाचा इन्स्टंट रेसिपी

कृती:

• साबुदाणा आप्पे बनवण्यासाठी सर्वप्रथम वाटीमध्ये भिजवलेले साबुदाणे घेऊन त्यात उकडून घेतलेला बटाटा मिक्स करून घ्या.
• नंतर त्यात हिरव्या मिरचीची पेस्ट, जिरे, काळीमिरी पावडर,चवीनुसार मीठ, कढीपत्ता टाकून पुन्हा एकदा मिक्स करा.
• नंतर त्यात बारीक चिरलेली कोथिंबीर, शेंगदाण्याचा कूट, लिंबाचा रस टाकून सर्व साहित्य व्यवस्थित मिक्स करून घ्या.
• तयार केलेले मिश्रणाचे गोळे बनवण्यासाठी हातांच्या तळव्यांना तेल लावून घ्या आणि छोटे छोटे गोळे करा.
• आप्पे पात्र गरम करण्यासाठी ठेवा. त्यामध्ये थोडेसे तेल टाकून गरम झाल्यानंतर तयार केलेल्या पिठाचे गोळे ठेवा.
• दोन्ही बाजूने आप्पे व्यवस्थित भाजल्यानंतर काढून घ्या.
• अशा पद्धतीने तयार आहेत कमीत कमी तेलाचा वापर करून बनवलेले खमंग साबुदाणा आप्पे.