सुगंधित आणि सौम्य चवीने भरलेली कोलकात्याची नवाबी चिकन बिर्याणी बनवा घरच्या घरी; आजच नोट करा रेसिपी

Kolkata Style Chicken Biryani Recipe : बिर्याणी लव्हर्ससाठी खास! बटाटा, अंडा, चिकन आणि खुल्या तांदळाने भरलेली कोलकोता स्टाईल बिर्याणी तुम्हाला एक अनोखा अनुभव देऊन जाईल. यंदाच्या विकेंडला ही रेसिपी नक्की ट्राय करा.

भारतातील प्रत्येक शहराला बिर्याणीबद्दल स्वतःची खास ओळख आहे. हैदराबादी बिर्याणी मसालेदार, लखनवी बिर्याणी सौम्य व सुगंधी, तर कोलकाता स्टाईल चिकन बिर्याणीची खासियत म्हणजे तिची मऊसर, सौम्य आणि आलिशान चव. कोलकात्याची बिर्याणी ‘नवाब वाजिद अली शाह’ यांच्यापासून प्रसिद्ध झाली असे मानले जाते. लखनवी बिर्याणीला बंगाली स्पर्श देऊन कोलकाता बिर्याणी तयार झाली. यामध्ये जास्त मसाले वापरले जात नाहीत; त्याऐवजी सुगंधी बासमती तांदूळ, रसदार चिकन, केशराचा सुवास आणि सर्वात महत्त्वाची गोष्ट म्हणजे, शिजवलेले बटाटे! होय, कोलकाता बिर्याणी बटाट्यामुळेच वेगळी आणि अनोखी वाटते.

दुबई स्टाईल कुनाफा रोल आता घरीच बनवा; पार्टीमध्ये होईल फक्त तुमच्या पदाथाचीच चर्चा, लगेच नोट करा रेसिपी

या बिर्याणीमध्ये हलकी गोडसर आणि सुगंधित चव जाणवते. बिर्याणीमध्ये अंडी आणि बटाटे घालणे हा कोलकात्याचा खास अंदाज आहे. बिर्याणी खाताना प्रत्येक घासात चिकन, बटाटा आणि मसाल्यांचा समतोल अनुभवता येतो. इतर बिर्याणी पेक्षा या बिर्याणीची चव जरा हटके असते, कोलकोत्याची शान म्हणून ओळखला जाणारा हा पदार्थ एकदा तरी घरी नक्की बनवून पाहा. चला जाणून घेऊया यासाठी लागणारे साहित्य आणि कृती.

साहित्य

चिकन मॅरिनेशनसाठी:

• चिकन – 500 ग्रॅम
• दही – ½ कप
• आले-लसूण पेस्ट – 1 टेबलस्पून
• लाल तिखट – 1 टीस्पून
• हळद – ½ टीस्पून
• गरम मसाला – ½ टीस्पून
• मीठ – चवीनुसार
• लिंबाचा रस – 1 टेबलस्पून

भातासाठी:

• बासमती तांदूळ – 2 कप (30 मिनिटे भिजवून निथळलेले)
• तमालपत्र – 2
• हिरवी वेलची – 3-4
• दालचिनी – 1 तुकडा
• लवंगा – 4-5
• मीठ – 1 टेबलस्पून
• बिर्याणी लेयरिंगसाठी:
• शिजवलेले बटाटे – 2-3 (सोलून तळून घ्यावे)
• उकडलेली अंडी – 2 (ऐच्छिक)
• कांदा – 2 मोठे (बारीक चिरून तळलेले ब्राऊन)
• दूध – ¼ कप (केशर भिजवून ठेवावे)
• तूप – 2 टेबलस्पून
• गुलाबपाणी/केवडा पाणी – 2-3 थेंब

कृती

• कालकोता स्टाईल चिकन बिर्याणी बवनण्यासाठी सर्वप्रथम चिकनचे तुकडे दही, आले-लसूण पेस्ट, मसाले,
• लिंबाचा रस आणि मीठ घालून नीट मिक्स करा. झाकून 1-2 तास मॅरिनेट करा.
• मोठ्या भांड्यात पाणी उकळवा. त्यात मीठ आणि गरम मसाल्याचे खडे टाका. भिजवलेला बासमती तांदूळ टाकून 70% शिजवून घ्या. निथळून ठेवा.
• उकडलेले बटाटे सोला आणि गरम तेलात सोनेरी होईपर्यंत तळा. हे बटाटे बिर्याणीला खास चव देतात.
• एका कढईत थोडं तेल/तूप गरम करा. मॅरिनेट केलेले चिकन टाकून झाकून शिजवा. चिकन मऊसर आणि मसालेदार झालं की गॅस बंद करा.
• जाड तळाच्या भांड्यात प्रथम तूप लावा. तळाशी भाताचा एक थर घाला. त्यावर शिजवलेले चिकन, बटाटे, अंडी आणि तळलेला कांदा घाला.
• केशर दूध वरून शिंपडा. गुलाबपाणी/केवडा पाणी आणि थोडं तूपही टाका.
• उरलेला भात वरून घालून परत थर द्या. झाकण घट्ट बंद करून कमी आचेवर 20-25 मिनिटे दम द्या.
• गरमागरम कोलकाता स्टाईल चिकन बिर्याणी रायत्या किंवा सलाडसोबत सर्व्ह करा.
• बिर्याणीचा प्रत्येक घास सुगंध, चिकनची रसाळता आणि बटाट्याची अनोखी चव देईल.

FAQs (संबंधित प्रश्न)

कोलकाता स्टाईल बिर्याणीमध्ये बटाटे का असतात?
मांस महाग असताना किंवा उपलब्ध नसताना बिर्याणी अधिक भरीव आणि समाधानकारक बनवण्यासाठी नवाबच्या स्वयंपाक्यांनी त्यात बटाटे घातले. ही भर बिर्याणीचा एक प्रिय आणि अविभाज्य भाग बनली, जी त्या काळातील शाही स्वयंपाकघरांच्या साधनसंपन्न कल्पकतेचे प्रतीक होती.

कोलकाता स्टाईल बिर्याणीची खासियत काय?
बिर्याणीमधील भात सुगंधित असतो आणि मांस मऊसर शिजवले जाते. हलके मसाले आणि अंडा, बटाट्याचा यात खास करून समावेश केला जातो जो याला बिर्याणीला इतरांहून वेगळी ओळख देतो.