Ragi Chapati Recipe : हाडे मजबूत करेल, पचनक्रियाही सुधारेल प्रोटीनयुक्त ‘नाचणीची चपाती’, रेसिपी नोट करा

Healthy Recipe : जुन्या काळात आहारात नाचणीचा आवर्जून समावेश केला जायचा पण आजकाल अनेकजण नाचणीला आहारातून वगळत आहेत. यातील पोषक घटक शरीराला अनेक फायदे मिळवून देतात. याची चपाती बनवून तुम्ही खाऊ शकता.

• रोजच्या आहारात नाचणीचा समावेश फायद्याचा ठरतो
• तुम्ही नाचणीची चपाती तयार करून त्याला आहारात समाविष्ट करू शकता
• ही चपाती चवीला छान लागते आणि सर्व भाज्यांसोबत खाल्ली जाते

आजच्या धावपळीच्या जीवनात आपण पुन्हा एकदा पारंपरिक आणि नैसर्गिक आहाराकडे वळण्याची गरज आहे. आपल्या आजी–आजोबांच्या स्वयंपाकघरात वापरली जाणारी धान्ये केवळ चवीलाच नाही तर आरोग्यासाठीही अतिशय लाभदायक होती. त्यापैकीच एक महत्त्वाचे आणि गुणकारी धान्य म्हणजे रागी (नाचणी). नाचणीपासून तयार केली जाणारी रागी चपाती ही दक्षिण भारतासह महाराष्ट्रातही मोठ्या प्रमाणावर खाल्ली जाते. ग्रामीण भागात नाचणीची चपाती ही रोजच्या जेवणाचा अविभाज्य भाग होती.

संध्याकाळच्या नाश्त्यासाठी बनवा लहान मुलांच्या आवडीचा Cheese White Sauce Pasta, नोट करून घ्या रेसिपी

नाचणीमध्ये भरपूर प्रमाणात कॅल्शियम, लोह, फायबर आणि प्रोटीन असते. त्यामुळे हाडे मजबूत राहतात, पचनक्रिया सुधारते आणि दीर्घकाळ पोट भरल्यासारखे वाटते. मधुमेह असलेल्या लोकांसाठी नाचणी फार उपयुक्त मानली जाते, कारण ती रक्तातील साखर हळूहळू वाढवते. वजन कमी करू इच्छिणाऱ्यांसाठीही नाचणीची चपाती हा उत्तम पर्याय आहे. नाचणीची चपाती बनवण्याची पद्धत थोडी वेगळी असली तरी योग्य पद्धतीने केली तर ती मऊ, चवदार आणि पोटभरू होते. उसळ, पिठलं, वरण किंवा लोणच्यासोबत नाचणीच्या चपातीची चव खास लागते. चला तर मग, घरच्या घरी पौष्टिक नाचणीची चपाती कशी तयार करायची याची एक सोपी रेसिपी जाणून घेऊया.

 साहित्य

• रागी पीठ (नाचणी पीठ) – 2 वाट्या
• मीठ – चवीनुसार
• गरम पाणी – आवश्यकतेनुसार
• तेल किंवा तूप – थोडेसे (भाजण्यासाठी)

जेवणात तोंडी लावण्यासाठी हिरव्यागार ताज्या मिरच्यांपासून बनवा इन्स्टंट चटपटीत लोणचं, गरमागरम भाकरीसोबत लागेल चविष्ट

 कृती

• यासाठी सर्वप्रथम एका परातीत नाचणीचे पीठ घ्या. त्यात मीठ घाला.
• आता हळूहळू गरम पाणी घालून चमच्याने किंवा हाताने मऊ पीठ मळा. रागी पीठ थोडे चिकट असते, त्यामुळे घट्टसर पीठ मळून घ्या.
• मळलेल्या पिठाचे मध्यम आकाराचे गोळे करून घ्या.
• हे गोळे पिठात मिसळून पोळपाटावर गोळ्याची जाडसर चपाती लाटून घ्या.
• पीठ जास्त वापर म्हणजे चपाती चिकटणार नाही.
• आता जाड तवा मध्यम आचेवर गरम करा. तवा नीट गरम झाला की त्यावर लाटलेली नाचणीची चपाती सावकाश टाका.
• एका बाजूने भाजल्यानंतर चपाती उलटी करा. दोन्ही बाजूंनी छान शिजेपर्यंत भाजा.
• चपाती भाजताना कडांना थोडे तेल किंवा तूप सोडा. त्यामुळे चपाती मऊ आणि चवदार होते.
• गरमागरम नाचणीची चपाती भाज्यांची उसळ, पिठलं, आमटी, दही किंवा लोणच्यासोबत सर्व्ह करा.
• नाचणीची चपाती ताजी असतानाच खावी, कारण थंड झाल्यावर ती कडक होते.
• मऊ भाकरीसाठी गरम पाणी वापरणे फार महत्त्वाचे आहे.