जेवणाची चव द्विगुणित करेल सोपा पण चवदार आलू भर्ता; त्वरित रेसिपी नोट करा

झटपट तयार होणारा आणि सगळ्यांच्या आवडीचा "आलू भर्ता" – अगदी घरगुती चव आणि परिपूर्ण तृप्ती! तुमच्या जेवणाची रंगत वाढवण्यासाठी याला एकदा तरी तुमच्या घरी नक्की बनवून पहा.

आलू भर्ता ही एक पारंपरिक, साधी पण चवदार डिश आहे जी भारतातील अनेक भागांमध्ये वेगवेगळ्या पद्धतीने बनवली जाते. महाराष्ट्रातही आलू भर्ता (किव्हा बटाटा भर्ता) हा पोळी, भाकरी किंवा वरणभातासोबत खाण्यासाठी एक झणझणीत पर्याय असतो. उकडलेल्या बटाट्यांमध्ये कांदा, मिरची, कोथिंबीर, आणि मसाले घालून हा भर्ता बनवला जातो. झटपट तयार होणारी ही रेसिपी चवदार आणि पोटभरीची आहे.

दुपारच्या जेवणात तोंडी लावण्यासाठी झटपट बनवा कोबीची कोशिंबीर, सॅलडपेक्षाही लागेल सुंदर

अनेकांना बटाटा खायला फार आवडतो मात्र तेच तेच बटाटयाचे पदार्थ खाऊन जर तुम्हाला कंटाळा आला असेल तर ही रेसिपी तुमच्यासाठी एकदम परफेक्ट आहे. भारताच्या अनेक भागात हा आलू भर्ता फार चवीने खाल्ला जातो. जेवणाची चव वाढवण्यात आलू भर्ता एक उत्तम पर्याय आहे. या भर्त्यासोबत तुम्ही दोन घास जरा जास्तीचेच खाल. चला लगेच नोट करूयात यासाठी लागणारे साहित्य आणि कृती.

साहित्य

• बटाटे – ३ मध्यम आकाराचे (उकडून सोलून घ्या)
• कांदा – १ मध्यम आकाराचा (बारीक चिरून)
• हिरव्या मिरच्या – २ (बारीक चिरून)
• आलं – १ टीस्पून (खवलेलं किंवा पेस्ट)
• लसूण – २-३ पाकळ्या (बारीक ठेचून)
• कोथिंबीर – २ टेबलस्पून (बारीक चिरून)
• मोहरी – १/२ टीस्पून
• जिरं – १/२ टीस्पून
• हळद – १/४ टीस्पून
• तिखट – १ टीस्पून
• मीठ – चवीनुसार
• तेल – १-२ टेबलस्पून
• लिंबाचा रस – १ टीस्पून (ऐच्छिक)

कृती

• आलू भर्ता तयार करण्यासाठी सर्वप्रथम बटाटे उकडून सोलून मोठ्या परातीत मॅश करून घ्या.
• कढईत तेल गरम करून त्यात मोहरी, जिरं टाका. ते तडतडलं की त्यात आलं, लसूण, आणि हिरव्या मिरच्या घालून परतून घ्या.
• आता त्यात बारीक कापलेला कांदा घालून २-३ मिनिटं परतवा.
• त्यात हळद, तिखट, मीठ टाकून नीट मिक्स करा.
• आता मॅश केलेला बटाटा त्यात घालून सर्व मसाले एकत्र मिसळा.
• शेवटी कोथिंबीर आणि लिंबाचा रस घालून हलकेच मिक्स करा.
• गरम गरम भाकरी, पोळी किंवा वरणभातासोबत सर्व्ह करा.
• तुम्ही या भर्त्यात शेंगदाण्याचं कूट किंवा भाजलेली लसूण चटणीसुद्धा घालू शकता.
• अधिक चवदार बनवण्यासाठी त्यात तूप घालून पण हा भर्ता तयार केला जाऊ शकतो