Egg Curry Recipe : झणझणीत तर्रीदार अंडा करी अगदी सोप्या पद्धतीमध्ये घरीच बनवा; चव चाखाल तर रेसिपीचे फॅन व्हाल

गावराण स्टाईल मसालेदार अंडा करी चवीला फार छान लागते आणि झटपट तयारही होते. ही अंडा करी गरमा गरम भात किंवा भाकरीसोबत खाता येते. विकेंडनिमित्त घरी मांसाहार जेवणाचा प्लॅन असल्यास ही रेसिपी तुमच्यासाठी परफेक्ट ठरेल.

भारतीय स्वयंपाकात अंड्याची करी हा अतिशय लोकप्रिय आणि सर्वांना आवडणारा पदार्थ आहे. अंड्यांमध्ये प्रोटीनचे प्रमाण जास्त असल्याने ते पौष्टिक तर आहेच, पण चवीलाही अप्रतिम लागते. अंड्याची करी बनवायला सोपी असून दुपारच्या किंवा रात्रीच्या जेवणासाठी उत्तम पर्याय आहे. ही करी भात, पोळी, पराठा किंवा अगदी ब्रेडसोबतही अप्रतिम लागते. महाराष्ट्रातील घराघरांत ही करी अनेक प्रकारे बनवली जाते – कुठे साधी मसाल्याची करी, तर कुठे नारळाची चव देऊन खास कोकणी स्टाईलमध्ये.

लहान मुलांसाठी सकाळच्या नाश्त्यात झटपट बनवा शेवग्याचे सूप, रोगप्रतिकारशक्ती वाढण्यासोबतच हाडे राहतील मजबूत

अंड्याची करीची खासियत म्हणजे ती पटकन तयार होते आणि जास्त मेहनत लागत नाही. कामाच्या व्यस्त वेळेत झटपट करायची असेल तर ही डिश अगदी योग्य ठरते. मसाल्यांची खमंग चव आणि उकडलेल्या अंड्याचा मऊसर पोत यामुळे हिला नेहमीच खास स्थान मिळते. चला तर मग झणझणीत आणि चविष्ट अंडा करी बनवण्यासाठी लागणारे साहित्य आणि कृती जाणून घेऊया.

साहित्य

• ४ अंडी (उकडलेली)
• २ मोठे कांदे (बारीक चिरलेले)
• २ टोमॅटो (बारीक चिरलेले)
• १ हिरवी मिरची (चिरलेली)
• १ टेबलस्पून आले-लसूण पेस्ट
• ½ टीस्पून हळद
• १ टीस्पून लाल तिखट
• १ ½ टीस्पून धणे पावडर
• ½ टीस्पून गरम मसाला
• २ टेबलस्पून तेल
• मीठ चवीनुसार
• पाणी – आवश्यकतेनुसार
• कोथिंबीर सजावटीसाठी

कृती

• सर्वप्रथम अंडी उकडून घ्या, सोलून त्यांना हलका कट द्या म्हणजे मसाला आतपर्यंत मुरेल.
• कढईत तेल गरम करून त्यात कांदा घालून सोनेरी होईपर्यंत परता.
• त्यात आले-लसूण पेस्ट व हिरवी मिरची टाकून छान परता.
• आता टोमॅटो घालून मऊ होईपर्यंत शिजवा.
• त्यात हळद, तिखट, धणे पावडर व मीठ टाकून मसाला तेल सुटेपर्यंत परता.
• आवश्यकतेनुसार पाणी घालून उकळी आणा व त्यात उकडलेली अंडी घाला.
• शेवटी गरम मसाला व कोथिंबीर घालून ५ मिनिटं मंद गॅसवर झाकण ठेवून शिजवा.
• गरमागरम अंड्याची करी तयार आहे. ही करी तुम्ही फुलका, भात किंवा पराठ्यासोबत सर्व्ह करू शकता.

सकाळच्या नाश्त्यासाठी १० मिनिटांमध्ये झटपट बनवा मऊ-मोकळा शेवयांचा उपमा, अजिबात होणार नाही चिकट

FAQs (संबंधित प्रश्न)

अंडा करी साठवून ठेवता येते का?
होय, तुम्ही तयार अंडा करी फ्रिजमध्ये काही दिवस साठवून ठेवू शकता.

अंडा करीमध्ये नारळाचा वापर केला जाऊ शकतो का?
होय, गोवन स्टाईल अंडा करीमध्ये नारळाचा वापर केला जातो.