आतड्यांचे आरोग्य आणि प्रजनन क्षमता यांच्यातील परस्परसंबंध, काय सांगतात तज्ज्ञ

आतड्यांचे आरोग्य आणि फर्टिलिटी यामध्ये खरंच काही संबंध आहे की नाही याबाबत तज्ज्ञांनी महत्त्वाची माहिती दिली आहे. आतडे निरोगी नसल्यास त्याचा प्रजनन क्षमतेवर नक्की काय परिणाम होतो पाहूया

निरोगी आतडे केवळ पचनास मदत करत नाही तर एखाद्याच्या प्रजनन आरोग्यातही महत्त्वाची भूमिका बजावतात. आतडे निरोगी नसल्यास इस्ट्रोजनचे असंतुलन आणि प्रजनन समस्यांची शक्यता वाढते. आतडे आणि प्रजनन क्षमता यांच्यात एक संबंध आहे. आतड्याची योग्य काळजी घेतल्याने प्रजनन क्षमता आणि गर्भधारणेची शक्यता देखील वाढते. विलंब न करता आतड्यांसंबंधी समस्यांना तोंड देणे गरजेचे आहे. हे एक ज्ञात सत्य आहे की निरोगी आतडे हे पचनास आणि रोगप्रतिकारक शक्ती वाढविण्यास मदत करते. 

विविध अभ्यासांनुसार, आतड्यांचे आरोग्य हे हार्मोन संतुलन चांगले राखणे, जळजळ रोखणे आणि पोषक तत्वांचे शोषण करण्यास मदत करते जे प्रजनन आरोग्यासाठी महत्वाचे आहे. तुम्ही नैसर्गिकरित्या गर्भधारणा करण्याचा प्रयत्न करत असाल किंवा आयव्हीएफ सारख्या प्रजनन उपचारांचा अवलंब करत असाल तर तुम्हाला तुमच्या आतड्यांच्या आरोग्यावर लक्ष केंद्रित करणे गरजेचे आहे. डॉ. सौम्या शेट्टी, वंधत्व निवारण तज्ज्ञ, नोवा आयव्हीएफ फर्टिलिटी, चेंबूर, मुंबई येथील प्रजननक्षमता तज्ज्ञ यांनी याबाबत अधिक माहिती दिली आहे. 

आतडे आणि प्रजनन क्षमता यांच्यातील संबंध 

आपल्या आतड्यात असे बॅक्टेरिया असतात जे अन्नाचे पचन होण्यास, पोषक तत्वे शोषण्यास आणि रोगप्रतिकारक शक्ती वाढविण्यास मदत करतात. या जीवाणूंच्या गटाला आतड्यांचा मायक्रोबायोम असे म्हणतात. जेव्हा तुमचे आतडे निरोगी असतात, तेव्हा ते स्त्रियांमध्ये ओव्हुलेशन आणि नियमित मासिक पाळीसाठी आवश्यक असलेल्या इस्ट्रोजेन आणि प्रोजेस्टेरॉन सारख्या हार्मोन्सचे योग्य संतुलन राखण्यास मदत करते आणि पुरुषांमध्ये शुक्राणूंची निर्मितीस देखील फायदेशीर ठरते.

पोटातील आतडयांना सूज आल्यानंतर शरीरात दिसू लागतात ‘ही’ भयानक लक्षणे, घरगुती उपाय करून घ्या आरोग्याची काळजी

आहाराच्या सवयी

आहाराच्या चुकीच्या सवयी, अँटीबायोटिक्स किंवा झोपेच्या कमतरतेमुळे आतड्यांचे आरोग्य बिघडते. आतड्यांची जळजळ गर्भाशयाच्या अस्तरावर परिणाम करू शकते, ज्यामुळे गर्भाचे रोपण करणे कठीण होते. हार्मोनल असंतुलनामुळे मासिक पाळी अनियमित होऊ शकते, पॉलीसिस्टिक ओव्हरी सिंड्रोम (पीसीओएस) किंवा शुक्राणूंची संख्या कमी होऊ शकते आणि एखाद्याच्या प्रजनन क्षमतेला हानी पोहोचू शकते. म्हणून, अधिक विलंब न करता आतड्याची काळजी घेणे गरजेचे आहे. 

आतड्यांचे आरोग्य सुधारण्यासाठी आणि प्रजनन क्षमता वाढवण्यासाठी टिप्स 

• एखाद्याने फायबरयुक्त पदार्थांचे सेवन करावे. तुमच्या आहारात फळे, भाज्या, तृणधान्य आणि शेंगांचा समावेश करावा
• आंबवलेल्या पदार्थांचा आहारात समावेळ करा जामध्ये चांगले बॅक्टेरिया असतात. प्रक्रिया केलेले आणि शर्करायुक्त पदार्थ खाल्ल्याने आतड्यातील चांगले बॅक्टेरिया खराब होऊ शकतात आणि जळजळ वाढू शकते
• संतुलित आहाराचे सेवन करणे, किमान २-३ लिटर पाणी पिणे आणि पुरेशी झोप घेणे गरजेचे आहे, कारण झोपेचा अभाव आणि जास्त ताण आतड्यांचे संतुलन बिघडू शकते
• आतड्यांची हालचाल वाढविण्यासाठी आणि जळजळ कमी करण्यासाठी दररोज व्यायाम करणे देखील फायदेशीर आहे
• पोटफुगी, गॅस, अपचन, बद्धकोष्ठता किंवा अतिसार, हार्मोनल असंतुलन ज्यामुळे अनियमित मासिक पाळी किंवा मासिक पाळीदरम्यान जास्त रक्तस्राव यासारख्या लक्षणांकडे दुर्लक्ष करू नका
• आतड्यांची योग्य काळजी घेतल्याने केवळ पचन आणि पोटाच्या समस्याच कमी होतील असे नाही तर वंध्यत्वांसारखी समस्या देखील दूर होण्यास मदत होईल

आतडयांना आलेली सूज कमी करण्यासाठी दैनंदिन आहारात ‘या’ पदार्थांचे करा सेवन, शरीराला होतील अद्भूत फायदे

टीप –  हा लेख केवळ सामान्य माहितीसाठी लिहिण्यात आला असून कोणत्याही प्रकारच्या उपचाराचा दावा यामध्ये करण्यात आलेला नाही. कोणताही उपाय करण्यापूर्वी आपल्या डॉक्टरांचा सल्ला घ्या आणि त्यांच्या सल्ल्यानुसारच योग्य बदलानुसार वापर करावा.