High Blood Pressure: थंडीच्या दिवसांत ब्लड प्रेशर का वाढतो? रोजच्या ‘या’ चुका ठरू शकतात धोकादायक; वेळीच घ्या काळजी

Increase High Blood Pressure in Winter: थंडीच्या दिवसांत ब्लड प्रेशर अचानक का वाढतो, यामागची कारणे कोणती, तसेच यापासून काळजी घेण्यासाठी काय करावे ,जाणून घ्या.

• हिवाळ्यात BP चा धोका वाढतोय?
• रोजच्या ‘या’ सवयी वाढवू शकतात त्रास
• जाणून घ्या ब्लड प्रेशर नियंत्रणात ठेवण्याचे उपाय

High Blood Pressure: हिवाळ्यात आजारी पडण्याचे प्रमाण वाढते. त्यामुळे या ऋतुत आरोग्याची अधिक काळजी घ्यावी लागते. विशेषतः हाय ब्लड प्रेशरचा त्रास असलेल्या व्यक्तींनी या दिवसांत अधिक काळजी घेणे गरजेचे आहे. तापमानात घट झाल्याने रक्तवाहिन्या आकुंचन पावू लागतात. यामुळे रक्तप्रवाह सुरळीत ठेवण्यासाठी हृदयाला अधिक मेहनत घ्यावी लागते. याचा परिणाम ब्लड प्रेशरवर होऊ शकतो. त्यामुळे, थंडीच्या दिवसांत नियमित ब्लड प्रेशर तपासणे आणि आरोग्यदायी आहार घेणे अत्यंत महत्त्वाचे आहेत. हिवाळ्यात ब्लड प्रेशर सामान्यपेक्षा जास्त का वाढतो, यामागची कारणे कोणती, जाणून घ्या.

Tea Side Effects: चहा प्यायल्यानंतर लगेच जेवण करता? थांबा! आरोग्य जपण्यासाठी काय आहे योग्य नियम?

तापमानात घट होणे

हिवाळ्यात तापमान कमी झाल्यावर, शरीरातील उष्णता टिकवून ठेवण्यासाठी रक्तवाहिन्या आकुंचन पावू लागतात. याला व्हॅसोकॉन्स्ट्रिक्शन (vasoconstriction) म्हणतात. यामुळे रक्तप्रवाहादरम्यान रक्तवाहिन्यांवरील दाब वाढतो आणि ब्लड प्रेशर वाढू शकतो.

शारीरिक हालचाली कमी होणे

थंडीमुळे लोक सकाळचे चालणे, व्यायाम आणि इतर शारीरिक हालचाली कमी करतात. जास्त वेळ बसल्याने आणि कमी हालचालींमुळे वजन वाढू शकते. याचा परिणाम ब्लड प्रेशरवर होतो.

हिवाळ्यात मीठ आणि तेलकट पदार्थांचे सेवन करणे

थंडीच्या दिवसांत अनेकांना भजी, पराठे, खारट आणि मसालेदार पदार्थ खायला आवडतात. यामध्ये मीठ आणि अनहेल्दी फॅट्सचे प्रमाण जास्त असू शकते. अतिरिक्त सोडियमच्या सेवनाने शरीरात पाणी साठू शकते. यामुळे ब्लड प्रेशर वाढण्याचा धोका वाढतो.

वजन वाढणे हे देखील महत्वाचे कारण

हिवाळ्यात शारीरिक हालचाल कमी झाल्यामुळे आणि कॅलरीयुक्त पदार्थ खाल्ल्यामुळे काही लोकांचे वजन वाढू लागते. जास्त वजनामुळे शरीराला रक्त पंप करण्यासाठी हृदयाला जास्त मेहनत करावी लागू शकते. यामुळे ब्लड प्रेशर धोका वाढतो.

तणाव आणि झोपेचा अभाव

हवामानातील बदल, दैनंदिन दिनचर्येतील व्यत्यय आणि पुरेशी झोप न मिळणे यांचाही ब्लड प्रेशरवर परिणाम होऊ शकतो. सततच्या तणावामुळे शरीरात असे हार्मोन्स रिलीज होतात. यामुळे काही काळासाठी ब्लड प्रेशर वाढू शकतो.

औषधे आणि टेस्टकडे दुर्लक्ष करणे

काही लोक, हिवाळ्यात बरे वाटत असल्यामुळे, बीपीची औषधे घेणे कमी करतात. असे करणे धोकादायक ठरू शकते. डॉक्टरांचा सल्ला घेतल्याशिवाय औषधं घेणे थांबवू नये किंवा त्याचा डोस बदलू नये. अन्यथा आरोग्यावर गंभीर परिणाम होऊ शकतो.

ब्लड प्रेशर नियंत्रणात ठेवण्यासाठी महत्त्वाच्या टिप्स

• जर तुम्हाला उच्च ब्लड प्रेशरचा त्रास असेल, तर डॉक्टरांच्या सल्ल्यानुसार नियमितपणे तुमचा रक्तदाब मोजा आणि त्याची नोंद करा.
• बाहेर जाताना उबदार कपडे घाला. आपले डोके, हात आणि पाय थंडीपासून वाचवा.
• हवामान खूप थंड असल्यास, घरातच योगा, स्ट्रेचिंग आणि हलके व्यायाम करा.
• अतिरिक्त मीठ, लोणचं, पापड, चिप्स आणि पॅकेज केलेले पदार्थ यांचे सेवन मर्यादित करा.
• दररोज ७-९ तासांची चांगली झोप घ्या.
• हिवाळ्यात तहान कमी लागत असली तरी, शरीराला आवश्यक पुरेसे पाणी प्या.

टीप – हा लेख केवळ सामान्य माहितीसाठी लिहिण्यात आला असून कोणत्याही प्रकारच्या उपचाराचा दावा यामध्ये करण्यात आलेला नाही. कोणताही उपाय करण्यापूर्वी आपल्या डॉक्टरांचा सल्ला घ्या.

Weight Loss Tips: दिवाळीत फराळ मिठाईवर ताव मारला, आता वजनाची चिंता? फिट राहण्यासाठी आजपासूनच डाएटमध्ये करा ‘हे’ बदल