Analogue Paneer: तुम्हीही खात नाही ना बनावट पनीर? कसे तयार होते; आरोग्यासाठी किती धोकादायक

What is Analogue Paneer how its made: अॅनालॉग पनीर म्हणजे काय, हे कसे तयार केले जाते आणि याचा आरोग्यावर काय परिणाम होतो, जाणून घ्या.

• अॅनालॉग पनीर म्हणजे नेमके काय?
• अॅनालॉग पनीर कसे तयार केले जाते?
• आरोग्यावर होणारे संभाव्य परिणाम

पनीर हा भारतीय खाद्यसंस्कृतीचा एक लोकप्रिय भाग आहे. परंतु, अलीकडच्या काळात बाजारात मिळणाऱ्या पनीरच्या गुणवत्तेबाबत अनेक प्रश्न उपस्थित होत आहेत. विशेषतः ‘अॅनालॉग पनीर’ या नावाने विकल्या जाणाऱ्या उत्पादनामुळे ग्राहकांची दिशाभूल होत असल्याची चिंता व्यक्त केली जात आहे. पारंपरिक पनीर हे दुधापासून तयार केले जाते, मात्र अॅनालॉग पनीरमध्ये दूध किंवा दुधातील फॅटऐवजी वनस्पतीजन्य तेल, स्टार्च, इमल्सिफायर आणि इतर अन्नघटकांचा वापर केला जातो. त्यामुळे त्याची चव आणि पोत पनीरसारखी वाटली तरी त्याचे पोषणमूल्य वेगळे असते. अलीकडेच, महाराष्ट्र सरकारने अॅनालॉग चीजच्या उत्पादन आणि विक्रीवर बंदी घालण्याचा निर्णय घेतल्याने हा मुद्दा चर्चेत आला आहे. आता अनेक लोकांना प्रश्न पडला आहे की अॅनालॉग चीज म्हणजे काय, ते कसे तयार केले जाते आणि ते नेहमीच्या पनीरपेक्षा कसे वेगळे असते. जाणून घेऊयात.

Choco Lava Cake: नो ओव्हन नो टेन्शन! घरच्या घरी बनवा चोको लावा केक! वाचा सोपी रेसिपी

अॅनालॉग पनीर म्हणजे नेमके काय?

अॅनालॉग पनीर हे पारंपरिक पनीरचा पर्याय म्हणून तयार केलेले नॉन-डेअरी उत्पादन आहे. हे उत्पादन तयार करताना दुधाऐवजी वनस्पतीजन्य फॅट, स्टार्च आणि इतर प्रक्रिया केलेले घटक वापरले जातात. त्यामुळे उत्पादन खर्च कमी होतो. मात्र, ग्राहकांना योग्य माहिती न देता ते सामान्य पनीर म्हणून विकले गेल्यास दिशाभूल होऊ शकते.

अॅनालॉग पनीर कसे तयार केले जाते?

अ‍ॅनालॉग पनीर बनवण्यासाठी वनस्पती तेल किंवा चरबी, स्टार्च, सोया किंवा इतर वनस्पतीजन्य फॅट आणि चव आणि पोत टिकवून ठेवणारे पदार्थ वापरले जातात. हे सर्व एकत्र मिसळल्याने एक बनावट पनीर तयार होतो.

आरोग्यावर होणारे संभाव्य परिणाम

तज्ज्ञांच्या मते, काही अॅनालॉग पनीर उत्पादनांमध्ये हायड्रोजनेटेड फॅट, ट्रान्स फॅट किंवा चरबीचे प्रमाण जास्त असू शकते. अशा घटकांचे वारंवार सेवन केल्यास हृदयविकार, वाढलेले कोलेस्टेरॉल आणि दीर्घकालीन आरोग्य समस्या उद्भवण्याचा धोका वाढू शकतो. त्यामुळे ग्राहकांनी उत्पादनावरील घटकांची माहिती तपासणे आवश्यक आहे.

पनीर आणि अॅनालॉग पनीरमधील फरक कसा ओळखावा?

खऱ्या पनीरला सहसा दुधाळ सुगंध आणि मऊ पोत असतो.

• अ‍ॅनालॉग पनीर अधिक रबरासारखे किंवा असामान्य पोताचे असू शकते.
• पॅकबंद चीज विकत घेताना, लेबलवरील घटक पदार्थ नक्की वाचा.
• पनीर फक्त विश्वासार्ह ब्रँड्स किंवा प्रमाणित दुकानांमधूनच खरेदी करा.
• उत्पादनात दूधाऐवजी वनस्पतीजन्य तेल, स्टार्च किंवा इतर पर्यायी घटकांचा उल्लेख असल्यास ते अॅनालॉग पनीर असू शकते.
• काही प्रयोगशाळा-आधारित किंवा आयोडीन चाचण्यांद्वारेही फरक ओळखता येतो.

ग्राहकांनी काय काळजी घ्यावी?

विश्वासार्ह विक्रेत्याकडूनच पनीर खरेदी करावे, पॅकेजवरील घटक, उत्पादन तारीख आणि लेबल तपासावे. शंका असल्यास संबंधित अन्न सुरक्षा यंत्रणेकडे तक्रार नोंदवावी. ग्राहकांना योग्य माहिती मिळावी आणि सुरक्षित अन्न उपलब्ध व्हावे, यासाठी अन्न सुरक्षा यंत्रणा अशा उत्पादनांवर लक्ष ठेवत आहेत.

टीप – हा लेख केवळ सामान्य माहितीसाठी लिहिण्यात आला असून कोणत्याही प्रकारच्या उपचाराचा दावा यामध्ये करण्यात आलेला नाही. कोणताही उपाय करण्यापूर्वी आपल्या डॉक्टरांचा सल्ला घ्या.

Fatty Liver: शरीर देतंय ‘हे’ संकेत? फॅटी लिव्हरची सुरुवात तर नाही ना; अजिबात दुर्लक्षित करू नका