Pregnancy Tips: उन्हाळ्यात गरोदर महिलांनी काय काळजी घ्यावे, काय करावे आणि काय टाळावे; तज्ज्ञांचा सल्ला

गरोदर महिलांना उन्हाळ्यात अधिक त्रास होतो. शरीरातील उष्णता आणि त्याशिवाय बाहेरील उष्णतेचा त्रास यामुळे महिलांना शारीरिक त्रासाचा सामना करावा लागतो. अशावेळी उन्हाळ्यात कशी काळजी घ्यावी जाणून घ्या

• उन्हाळ्यात गरोदर महिलांनी घ्यायची काळजी 

• गरोदर महिलांना का होतो उन्हाळ्यात त्रास 

• विशेष काळजीची गरज 

गर्भधारणा ही प्रत्येक ऋतूमध्ये विशेष काळजी घेण्याची वेळ असते. मात्र, उन्हाळ्यात वाढत्या तापमानामुळे काही विशिष्ट अडचणी निर्माण होऊ शकतात. अनेकदा उन्हाळ्यात गर्भवती महिलांना दुप्पट त्रास होऊ शकतो. याचे कारण म्हणजे उन्हाळ्यातील उष्णता + स्वतःच्या शरीराची उष्णता आणि पोटात असणाऱ्या बाळाची उष्णता यामुळे गर्भवती महिला हैराण होतात. अशावेळी डॉक्टर गर्भवती महिलांना विशेष काळजी घेण्याची सूचना देतात. 

या सूचना सर्व गर्भवती महिलांसाठी उपयुक्त असल्या तरी, पहिल्यांदाच आई होणाऱ्या महिलांसाठी विशेषतः मार्गदर्शक ठरू शकतात. डॉ. निधी शर्मा चौहान, स्त्रीरोग आणि प्रसूतीतज्ज्ञ, सैफी हॉस्पिटल यांनी याबाबत अधिक माहिती दिली आहे. 

Pregnancy Tips: बाळ होण्यासाठी प्रयत्न करताय? 5 सोप्या पद्धतीने लवकर होईल Conceive

काय आहेत समस्या 

उन्हाळ्यातील सर्वात महत्त्वाची समस्या म्हणजे डिहायड्रेशन (पाण्याची कमतरता). उष्णतेमुळे शरीरातील पाण्याचे प्रमाण कमी होऊ शकते, जे आई आणि बाळ दोघांसाठीही घातक ठरू शकते. त्यामुळे दिवसभर पुरेसे पाणी पिणे अत्यंत आवश्यक आहे. पाणी हा सर्वोत्तम पर्याय असला तरी काहीवेळा जास्त प्रमाणात पाणी पिणे कठीण वाटू शकते. अशावेळी लिंबूपाणी किंवा नारळपाणी यांचा वापर करता येतो. फळांचे ज्यूस कधीकधी घेता येतात, पण ते नेहमी घरी ताजे तयार केलेले असावेत. पूर्ण फळे खाणे अधिक फायदेशीर असते कारण त्यामध्ये फायबर टिकून राहते. 

कोणते कपडे घालावेत

कपड्यांची निवड देखील महत्त्वाची आहे. घाम जास्त येत असल्यामुळे सैल आणि सूती कपडे वापरणे योग्य ठरते. सिंथेटिक कपडे टाळावेत कारण ते उष्णता अडकवतात आणि त्वचेसंबंधित त्रास होऊ शकतो. विशेषतः गर्भवती महिलांचा शेवटचा महिना अथवा शेवटचे ३ महिने असतील तर अशावेळी अजिबात घट्ट कपडे घालू नयेत. याशिवाय त्यांनी जास्तीत जास्त सैलसर कपडे घालण्याचा प्रयत्न करावा जेणेकरून अंगावर घाम राहणार नाही आणि त्रास होणार नाही. 

काय करावे आणि काय टाळावे 

• दिवसभर घरातच राहणे गरजेचे नसले तरी, दुपारी १२ ते ४ किंवा ५ या वेळेत बाहेर जाणे टाळावे. जर बाहेर जाणे आवश्यक असेल, तर छत्रीचा वापर करावा आणि शरीर हायड्रेट ठेवावे. सकाळी लवकर किंवा संध्याकाळी हलका फेरफटका मारणे सुरक्षित आणि फायदेशीर असते
• आहाराची काळजी घेणे देखील तितकेच महत्त्वाचे आहे. उन्हाळ्यात अन्न दूषित होण्याचा धोका जास्त असतो, त्यामुळे नेहमी घरचे ताजे आणि शिजवलेले अन्न खावे. बाहेरचे अन्न टाळावे कारण ते ताजे नसेल आणि संसर्ग होण्याची शक्यता वाढते. बाजारात मिळणारी कापलेली फळे खाऊ नयेत. फळे नेहमी घरी धुऊन कापून खावीत
• गर्भवती महिलांनी डॉक्टरांनी दिलेली औषधे नियमित घ्यावीत आणि तपासण्या चुकवू नयेत. उन्हाळ्यात थकवा आणि भूक कमी होऊ शकते. अशावेळी थोडे-थोडे करून वारंवार खाणे योग्य ठरते, ज्यामुळे शरीरातील ऊर्जा आणि साखरेचे प्रमाण संतुलित राहते
• हंगामी फळे आणि भाज्या आहारात समाविष्ट कराव्यात. टरबूज, खरबूज, संत्री यांसारखी पाण्याचे प्रमाण जास्त असलेली फळे विशेषतः उपयुक्त असतात. आंबा खाऊ शकतो, पण प्रमाणात आणि डॉक्टरांच्या सल्ल्यानेच घ्यावा
• गोठवलेले (फ्रोजन) आणि प्रोसेस्ड अन्न टाळावे. ताजे आणि हंगामी अन्न नेहमीच अधिक सुरक्षित आणि आरोग्यदायी असते.

Pregnancy Tips: धूम्रपानाचे व्यसन आई आणि बाळासाठी जीवघेणे, त्वरीत व्हा दूर

काय आहे निष्कर्ष

उन्हाळ्यात साध्या गोष्टींची काळजी घेतल्यास गर्भधारणा सुरक्षितपणे पार पाडता येते—पुरेसे पाणी पिणे, ताजे अन्न खाणे, कडक उन्हात बाहेर जाणे टाळणे, आरामदायक कपडे घालणे आणि नियमित वैद्यकीय तपासणी करणे. या छोट्या गोष्टी आई आणि बाळ दोघांच्या आरोग्यासाठी अत्यंत महत्त्वाच्या आहेत.