बाजारभोगाव : गुडे येथे शाळेचे छत कोसळून विद्यार्थीसह शिक्षक जखमी झाल्याची घटना ताजी असतानाच पोंबरे (ता. पन्हाळा) येथे प्राथमिक शाळेच्या इमारतीवर झाड कोसळल्याची घटना (Tree Collapsed on School) घडली. विद्यार्थी शाळेत येण्यापूर्वी झाड कोसळल्याने पुढील अनर्थ टळला. जोरदार पाऊस व वादळी वाऱ्यामुळे शाळेच्या आवारातील वाळलेली सुरूचे झाड शाळेच्या छतावर कोसळल्याने एक लाखाचे नुकसान झाले. शिक्षकाने अंगणवाडीच्या इमारतीत तात्पुरती शाळा भरवली.
शिक्षण समितीच्या अध्यक्षा भारती दत्तात्रय पाटील, सरपंच प्रकाश चव्हाण, पोलीस पाटील भीमराव कांबळे, मुख्याध्यापक संजय भोसले यांनी ग्रामस्थांच्या मदतीने इमारतीवर पडलेले झाड बाजूला केले. पोंबरे येथे पहिली ते पाचवीपर्यंत शाळा असून, सुमारे 30 विद्यार्थी शिक्षण घेत आहेत. शाळेच्या आवारात अनेक झाडे आहेत. त्यापैकी वाळलेले सुरुचे झाड धोकादायक स्थितीत होते. झाड पाडण्याबाबत शालेय समितीमध्ये चर्चा करण्यात आली होती, असे मुख्याध्यापक संजय भोसले यांनी सांगितले. दरम्यान, पावसाचा जोर वाढल्याने झाड कोसळले. शनिवारी सकाळची शाळा असते. विद्यार्थी शाळेत येण्याअगोदर ही दुर्घटना घडल्याने अनर्थ टळला. केवळ मुलांचे नशीब थोर असे म्हणावे लागेल.
पिसात्री प्राथमिक शाळेच्या आवारातून मुख्य विद्युत वाहिनी गेली आहे. कोणत्याही प्रकारच्या उपाययोजना महावितरणकडून करण्यात आलेल्या नाहीत. वादळी वारा व जोरदार पावसामुळे विद्युत वाहिनी तुटून जर आवारात पडली तर मोठी दुर्घटना घडू शकते. याबाबत संबंधितांनी याकडे गांभीर्याने लक्ष देण्याची गरज आहे.
.png "Videos"){kind=small}
