बँक बिनविरोध करण्याचे मनसुबे धुळीस? अहिल्यानगरमध्ये तब्बल ५४१ उमेदवारी अर्जांमुळे खळबळ
संगमनेर येथे झालेल्या बैठकीत बिनविरोध निवडणुकीबाबत चर्चा झाल्याच्या पार्श्वभूमीवर बोलताना राम शिंदे म्हणाले, माझ्या मनधरणीचा प्रश्नच येत नाही. याबाबत वरिष्ठ नेत्यांनीच स्पष्ट बोलले पाहिजे. संगमनेरमध्ये बैठक झाली आणि त्यात बिनविरोधचा निर्णय झाला असे म्हटले जात असले, तरी प्रत्यक्ष सभासदांची भूमिका वेगळी आहे. जर बिनविरोधवर एकमत झाले होते, तर मग ५४१ इतक्या मोठ्या प्रमाणात सभासदांनी अर्ज का घेतले?”
महायुतीतील प्रमुख नेत्यांच्या भूमिकेबाबत अद्याप स्पष्टता नसल्याचे शिंदे यांनी अधोरेखित केले.पालकमंत्र्यांची भूमिका अजूनही स्पष्ट झालेली नाही. या बैठकीबाबत आपल्याला काहीच माहिती नसल्याचे राधाकृष्ण विखे पाटील यांनी सांगितले आहे. एकीकडे शिवसेना बैठका घेत आहे, तर दुसरीकडे इतर घटक पक्षांना त्याची माहितीच नाही. सर्वांच्या बोलण्यात एकसूत्रता राहिलेली नाही. अशा परिस्थितीत सभापती म्हणून मी तरी काय भूमिका घ्यायची असा सवाल सभापती राम शिंदे यांनी म्हटलंय..
त्यांनी पुढे माहिती दिली की, संगमनेरच्या बैठकीनंतर महसूलमंत्री बाळासाहेब थोरात, माजी मंत्री शंकरराव गडाख तसेच विवेक कोल्हे यांचा फोन आला होता. मात्र, त्यानंतर या संदर्भात कोणतीही सविस्तर चर्चा किंवा निर्णय झालेला नाही.
तीन अपत्यांच्या नियमावलीबाबत विचारण्यात आलेल्या प्रश्नावर उत्तर देताना, “सर्व बाबींचा सारासार विचार करूनच मी फॉर्म घेतला आहे आणि तो निश्चितपणे भरला जाईल,” असे सांगत शिंदे यांनी सहकार क्षेत्रातील आपल्या पहिल्या निवडणुकीचे संकेत दिले. तसेच, जिल्ह्यातील अनेक साखर कारखान्यांवर कोट्यवधी रुपयांचे कर्ज आणि थकबाकी असल्याच्या मुद्द्यावर भाष्य करताना ते म्हणाले, “मी सहकार क्षेत्रात पहिल्यांदाच निवडणूक लढवत असून कोणत्याही संस्थेचा थकबाकीदार नाही. ज्यांच्या कारखान्यावर कर्ज आहे, त्यांनाच त्याबाबत विचारा. अंतिम निर्णय निवडणूक निर्णय अधिकारीच घेतील.”
जिल्हा बँकेचे महत्त्व विशद करताना राम शिंदे म्हणाले की, बँकेचा विस्तार मोठा असून ठेवींची रक्कम अथांग आहे. बँकेचे कामकाज उत्तम सुरू असून ठेवीदारांच्या आणि शेतकऱ्यांच्या हिताचे रक्षण करणे ही सर्वांची जबाबदारी आहे. सध्या निर्माण झालेल्या दुष्काळी परिस्थितीत सरकारने मदत करण्याची तयारी दर्शवली असून, त्याचा मोठा फायदा बँकेला आणि पर्यायाने सभासदांना होईल.
एकीकडे प्रस्थापित नेत्यांकडून बिनविरोध निवडणुकीसाठी गुप्त बैठका आणि हालचाली सुरू आहेत, तर दुसरीकडे प्रत्यक्ष सभासदांमधून उमेदवारी अर्ज घेण्याचा ओघ सतत वाढत आहे. यामुळे नेत्यांची इच्छा आणि तळागाळातील सभासदांचा कौल यामध्ये मोठा संघर्ष पाहायला मिळत आहे. येत्या काही दिवसांत वरिष्ठ नेते कोणता मार्ग काढतात आणि राम शिंदेंची पुढील भूमिका काय राहते, याकडे संपूर्ण अहिल्यानगर जिल्ह्याचे लक्ष लागले आहे.
पाणीकपातीमुळे शहरातील बांधकामांवर निर्बंध ! ४३ तालुके दुसऱ्या टप्यात दुष्काळी…
.png "Videos"){kind=small}
