Satara ZP : विषय समितींच्या सर्व सदस्यांच्या निवडी बिनविरोध; सत्ताधारी-विरोधकांत रंगला कलगीतुरा

सातारा जिल्हा परिषदेला अनेक वर्षांची चांगली परंपरा आहे. जिल्हा परिषदेच्या सर्व योजना तळागाळातील लोकांपर्यंत पोहचविण्यासाठी पारदर्शी व शिस्तबध्द पध्तीने कामकाज करु.

सातारा : सातारा जिल्हा परिषदेच्या स्थायी समितींसह, दहा विषय समितींच्या सदस्यांच्या निवडी बिनविरोध पार पडल्या. या नंतर विरोधकांनी नूतन सदस्यांसह, अध्यक्ष, उपाध्यक्ष व पदाधिकाऱ्यांच्या अभिनंदन ठरावाच्या अनुंषगाने निवड प्रक्रियेविषयी मुद्दे उपस्थित केल्याने या अभिनंदन ठरावादरम्यान सत्ताधारी व विरोधकांत कलगीतुरा रंगला.

सभेच्या अध्यक्षस्थानी जिल्हा परिषदेच्या अध्यक्षा डॉ. प्रिया शिंदे होत्या. तर उपमुख्य कार्यकारी अधिकारी निलेश घुले हे या सभेचे सचिव होते. यावेळी जिल्हा परिषदेचे उपाध्यक्ष राजूभैय्या भोसले, जिल्हा परिषदेच्या मुख्य कार्यकारी अधिकारी याशनी नागराजन, शिक्षण व अर्थसमिती सभापती तेजस्विनी कदम, महिला व बालकल्याण सभापती ऋतुजा शिंदे, कृषी व पशूसंर्वधन सभापती लता कर्णे यांच्यासह भाजपचे, राष्ट्रवादी, शिवसेना व इतर मित्र पक्षाचे जिल्हा परिषदेचे सर्व सदस्य, जिल्ह्यातील ११ पंचायत समित्यांचे सभापती व जिल्हा परिषदेचे अधिकारी यांची उपस्थिती होती.

प्रारंभी उपमुख्य कार्यकारी अधिकारी निलेश घुले यांनी विषय पत्रिकेचे वाचन केले. त्यानंतर स्थायी समिती व विषय समितींसाठी अर्ज भरलेल्या सदस्यांची माहिती देण्यात आली. त्यानंतर अर्ज छाननी व माघारीच्या प्रक्रियेनंतर ८३ जागांसाठी ८३ अर्ज आल्याने सर्वच्या सर्व दहा विषय समिती सदस्यांची सदस्यपदी बिनविरोध निवड झाल्याचे जाहीर करण्यात आले. मात्र, त्याचवेळी विरोधी गटातील वृषाली चव्हाण यांनी आरोग्य समितीतून व सुरज पाटील यांनी अर्थ समितीतून माघार घेण्यासाठी अर्ज दिला. एकूणच, दहा विषय समिती सदस्यांची निवड प्रक्रिया बिनविरोध पार पडली.

डॉ. प्रिया शिंदे म्हणाल्या, सातारा जिल्हा परिषदेला अनेक वर्षांची चांगली परंपरा आहे. जिल्हा परिषदेच्या सर्व योजना तळागाळातील लोकांपर्यंत पोहचविण्यासाठी पारदर्शी व शिस्तबध्द पध्तीने कामकाज करु. तसेच, यापूर्वी निवडणूकीत झालेले मतभेद आता बाजूला ठेवून जिल्हा परिषदेचा विकासात्मक चेहरामोहरा बदलण्यासाठी सर्व सदस्यांना विश्वासात घेऊन यापुढे जिल्हा परिषदेचे कामकाज करणार असल्याचे त्यांनी सांगितले. तसेच, जिल्ह्यातील चारही मंत्र्यांच्या माध्यमातून जिल्हा परिषदेला भरघोस निधी आणण्यासाठी प्रयत्न करणार असून झेडपीच्या सर्वच सदस्यांनी आपआपल्या नेतेमंडळींकडून जिल्हा परिषदेला चांगला निधी मिळवून देण्यासाठी प्रयत्न करावेत, असे आवाहन त्यांनी यावेळी केले.

स्थायी समितींसह, सर्व दहाच्या दहा विषय समितींच्या सदस्यांची निवडी बिनविरोध पार पडल्यानंतर नूतन सदस्य व पदाधिकारी यांचे अभिनंदन करण्यासाठी विरोधी गटाचे राष्ट्रवादीचे जिल्हा परिषद सदस्य अनिल देसाई उभे राहिले. त्यांनी जिल्हा परिषदेच्या अध्यक्षांच्या भाषणाचा आधार घेत निवडणूकीत घडलेल्या घडामोडींचा उल्लेख सुरु केल्यानंतर उपाध्यक्ष राजू भोसले व सदस्य दिलीप बाबर यांनी मध्येच हस्तक्षेप करत त्यांना त्या विषयावर बोलण्यापासून रोखण्याचा प्रयत्न केला. त्यानंतर राष्ट्रवादी व शिवसेनेच्या विरोधी सदस्यांनी अनिल देसाईंच्या बाजूने री ओढत सत्ताधाऱ्यांना धारेवर धरण्याचा प्रयत्न केला. त्यानंतर जिल्हा परिषदेचे माजी अध्यक्ष व गटनेते उदय कबुले यांनी त्यामध्ये मध्यस्थी करीत वादावर पडदा टाकला.

त्यानंतर राष्ट्रवादीचे फलटणचे जिल्हा परिषद सदस्य गिरीश बनकर हे अभिनंदनाचा ठराव मांडत असताना त्यांनीही आपल्या भाषणात अध्यक्ष, उपाध्यक्ष निवडींसह, सभापती निवडीत झालेल्या घडामोडींचा उल्लेख करण्याचा प्रयत्न केल्यानंतर उपाध्यक्ष राजूभैय्या भोसले यांनी मध्येच हस्तक्षेप करत आजच्या सभेच्या निवडीच्या अनुंषगाने बोला, असे सांगत त्यांना रोखण्याचा प्रयत्न केला. मात्र, बनकर यांनी आपला विषय तसाच पुढे चालू ठेवल्याने उपाध्यक्ष भोसले यांनी मध्येच हस्तक्षेप करत आजची सभा संपली असल्याचे जाहीर करत सर्वांचे आभार मानत सभा आटोपती घेतली.