शेतात धान कापणी करताना वाघाचा अचानक हल्ला; तरुणाचा उपचारासाठी नेताना मृत्यू

घराघरांत दिवाळी आणि लक्ष्मीपूजनाचा उत्साह सुरू असताना साकोली तालुक्यातील बामणी गावात वाघाच्या हल्ल्यात आई-वडिलांसोबत शेतात धान कापणी करत असलेल्या तरुण शेतकऱ्याचा मृत्यू झाला आहे.

• वाघाच्या हल्ल्यात २७ वर्षीय कुणाल उईके यांचा मृत्यू
• शेतात धान कापणी करताना वाघाचा अचानक हल्ला
• वाघाला पकडण्यासाठी वनविभागाकडून पिंजरा लावला

साकोली : घराघरांत दिवाळी आणि लक्ष्मीपूजनाचा उत्साह सुरू असताना साकोली तालुक्यातील बामणी गावात वाघाच्या हल्ल्यात आई-वडिलांसोबत शेतात धान कापणी करत असलेल्या तरुण शेतकऱ्याचा मृत्यू झाला आहे. दबा धरून बसलेल्या वाघाने अचानक मागून हल्ला केला. या हल्ल्यात गंभीर जखमी झालेल्या कुणाल कैलास उईके (वय २७) याचा उपचारासाठी भंडाऱ्याला नेत असताना वाटेतच मृत्यू झाला. लक्ष्मीपूजनाच्या दिवशी रविवारी दुपारी १ वाजता घडलेल्या या घटनेने परिसरात शोककळा पसरली आहे.

 

लक्ष्मीपूजनाच्या दिवशी कुणाल नेहमीप्रमाणे दुपारी १ वाजता आई वडिलांसोबत धान कापणीसाठी शेतात गेला होता. आई-वडील एका धानाच्या बांधीत कापणी करत असताना कुणाल जवळच्या दुसऱ्या बांधीत धान कापत होता. याचवेळी परिसरात दबा धरून बसलेल्या वाघाने अचानक मागून त्याच्यावर झडप घातली. मुलावर वाघाचा हल्ला होताच आई-वडील त्याच्या मदतीसाठी धावले. मात्र, समोर वाघ दिसताच ते भयभीत झाले. तरीही धैर्य एकवटून त्यांनी मोबाइलवरून गावातील नागरिकांना घटनेची माहिती दिली. माहिती मिळताच गावकरी कुणालच्या मदतीसाठी घटनास्थळाकडे धावले. मात्र, तोपर्यंत वाघ कुणालला फरफटत २०० ते ३०० फूट अंतरावर घेऊन गेला होता.

गावकऱ्यांनी वाघाला पिटाळले

घटनास्थळी पोहोचलेल्या गावकऱ्यांनी लाठ्या-काठ्या आणि काटेरी फांद्यांच्या मदतीने आरडाओरड करून वाघाला पिटाळण्याचा प्रयत्न केला. अखेर वाघाच्या तावडीतून कुणालची सुटका करण्यात त्यांना यश आले. मात्र, तोपर्यंत वाघाच्या हल्ल्यात कुणाल गंभीर जखमी झाला होता. गावकऱ्यांनी वेळ न दवडता त्याला उपचारासाठी लाखनी येथे नेले. प्रकृती अत्यंत गंभीर असल्याने डॉक्टरांनी त्याला भंडाऱ्याला हलविण्याचा सल्ला दिला. भंडाऱ्याला नेत असताना वाटेतच त्याची प्राणज्योत मालवली.

वनविभागाकडून शोधमोहीम

घटनेची माहिती मिळताच वन विभागाचे अधिकारी आणि कर्मचारी घटनास्थळी दाखल झाले. वन विभागाच्या पथकाने घटनास्थळाचा पंचनामा करून हल्लेखोर वाघाला पकडण्यासाठी पिंजरा लावला. तसेच वाघाच्या हालचालींवर लक्ष ठेवण्यासाठी ट्रॅप कॅमेरे बसविण्यात आले.

हे सुद्धा वाचा : पोलिसांकडे तक्रार का दिली? म्हणत कोयत्याने वार, तरुण गंभीर जखमी; कळंब तालुक्यातील घटनेनं खळबळ

धान कापणीच्या हंगामात शेतकऱ्यांसमोर नवे संकट

धान कापणी, कापलेले पीक गोळा करणे, मळणी आणि वाहतूक यासाठी शेतकरी व मजुरांना सकाळपासून संध्याकाळपर्यंत शेतात राहावे लागते. अनेक ठिकाणी कुटुंबातील सदस्य एकत्रितपणे शेतीकामे करतात. लहान मुलांनाही सोबत नेले जाते. अशा वेळी झुडपांमध्ये दबा धरून बसलेला वन्यप्राणी अचानक हल्ला करतो आणि सावध होण्याची संधीही मिळत नाही, हे घडलेल्या दाखवून दिले आहे.