Diwali Fire Incidents: “आनंदाचा सण ठरला जीवघेणा!” शहरात फटाक्यांच्या आतषबाजीत ५५ हून अधिक जण जखमी; ३० ठिकाणी आगीचा तांडव!

Diwali Fire Incidents: दिवाळीचा आनंद क्षणात उरला दुःखात! फटाक्यांच्या आतषबाजीत ५५ हून अधिक नागरिक जखमी, ९ वर्षांच्या मुलाचे ओठ फाटले तर वृद्धाच्या डोळ्यात रक्तस्राव; शहरात ३० ठिकाणी आगीचा तांडव!

• फटाक्यांमुळे ५५ हून अधिक जखमी; ३० ठिकाणी आगी
• रुग्णालयांत गर्दी; मुले-वृद्धांना डोळे व श्वासाचा त्रास
• AQI २०० पार; सुरक्षेचे आवाहन

Diwali Fire Incidents: दिवाळीचा सण आनंदात आणि उत्साहात साजरा करताना फटाके फोडण्याचा अतिरेक अनेकांच्या जीवावर बेतल्याचे चित्र यंदा शहरात पाहायला मिळाले. फटाक्यांमुळे झालेल्या विविध दुर्घटनांमध्ये ५५ हून अधिक जण गंभीर जखमी झाले असून त्यांना उपचारासाठी तातडीने रुग्णालयात दाखल करावे लागले. कोणाचे हात-पाय भाजले, तर कोणाच्या डोळ्यांना गंभीर दुखापत झाली. एका नऊ वर्षीय मुलाचे स्काय शॉट फटाक्यामुळे ओठ फाटले, तर नातवासोबत फटाके फोडणाऱ्या ६३ वर्षीय ज्येष्ठ नागरिकाच्या डोळ्यात रक्तस्राव झाल्याची धक्कादायक घटना समोर आली आहे. एवढेच नव्हे, तर फटाक्यांच्या विषारी धुरामुळे श्वसनाचा त्रास मोठ्या प्रमाणात वाढला असून, शहरात तब्बल ३० ठिकाणी आगीच्या दुर्घटनेची नोंद झाली आहे. यामुळे यंदाच्या दिवाळीच्या आनंदावर अनेक कुटुंबांमध्ये चिंतेचे सावट पसरले आहे.

हेही वाचा: Best Bus Accident News: “अनियंत्रित बसने सिग्नलवर आणला प्रलय!” मुंबईतील लोढा जंक्शनवर बेस्ट बसचा भीषण अपघात, अनेक वाहने उद्ध्वस्त

रुग्णालयांमध्ये जखमींची रिघ; लहान मुले व वृद्ध ठरले बळी

फटाके फोडताना झालेल्या दुर्घटनांमध्ये घाटी रुग्णालयात नऊ जणांवर उपचार करण्यात आले. यामध्ये दोघांच्या डोळ्यांना, दोघांच्या खांद्याला, तर पाच जणांच्या हाताला दुखापत झाली होती. याशिवाय जिल्हा रुग्णालयात पाच जणांवर उपचार करण्यात आले, त्यापैकी दोघांना दाखल करून नंतर सुटी देण्यात आली. खासगी रुग्णालयांमध्येही जखमींची मोठी गर्दी पाहायला मिळाली. प्रसिद्ध डॉ. रमाकांत बेंबडे यांच्या रुग्णालयात फटाक्यांमुळे भाजलेल्या २२ जणांवर उपचार करण्यात आले, त्यापैकी आठ जणांना रुग्णालयात दाखल करावे लागले.

बीड बायपास परिसरात नातवासोबत फटाके फोडत असताना एका ६३ वर्षीय नागरिकाच्या डोळ्यात फटाक्याचा तुकडा गेल्याने आतील भागात गंभीर रक्तस्राव झाला. तर दुसरीकडे, स्काय शॉट फटाका फुटल्याने एका नऊ वर्षीय मुलाचे ओठ फाटले. फटाक्यांच्या ठिणग्यांमुळे सहा वर्षीय मुलाचा हात भाजला, तर पाखड अंगावर पडल्याने पाच वर्षीय मुलाच्या पायाला दुखापत झाली.

धुरामुळे श्वसनाचा त्रास अन् हवेच्या गुणवत्तेत मोठी घट

फटाक्यांच्या कर्णकर्कश आवाजामुळं कानात वेदना होणे, कान बंद पडणे अशा तक्रारी घेऊन अनेक जण कान-नाक-घसा तज्ज्ञांकडे पोहोचले. तसेच फटाक्यांच्या प्रचंड धुरामुळे दमा, खोकला आणि श्वास घेण्याच्या त्रासात वाढ झाली. नातवाने फोडलेल्या नागगोळीच्या धुरामुळे एका ज्येष्ठ नागरिकाला श्वसनाचा त्रास जाणवला, तर वर्षभरापूर्वी बालदम्याचा पंप बंद केलेल्या एका चिमुकलीला पुन्हा खोकल्याचा त्रास सुरू झाला.

या फटाक्यांच्या आतषबाजीमुळे शहरातील हवेच्या गुणवत्तेवरही अत्यंत विपरीत परिणाम झाला. दिवाळीपूर्वी ७० ते ८४ च्या दरम्यान असलेला हवा गुणवत्ता निर्देशांक (AQI) फटाके फुटल्यानंतर थेट २०० च्या पुढे पोहोचला, म्हणजेच हवेतील प्रदूषणात प्रचंड वाढ झाली.

हेही वाचा: Shrirampur Clash News: दिवाळीत फटाक्यांवरून तुफान राडा! दोन गटांत दगडफेक, लाकडी दांड्यांनी मारहाण अन् कार पेटवली…

शहरात ३० ठिकाणी आग; पाळीव प्राण्यांनाही त्रास

केवळ मानवी जीवितालाच नव्हे तर मालमत्तेलाही याचा फटका बसला असून शहर आणि परिसरात फटाक्यांमुळे तब्बल ३० ठिकाणी आग लागल्याच्या घटना घडल्या. यामध्ये संस्थान गणपतीजवळील मालाणी ट्रेडर्स, जयभवानीनगरमधील घर, फुलंब्रीतील तीन दुकाने, श्रेयनगरमधील गॅलरी, सिडको एन-४ मधील गुरुसाहनीनगर येथील घर, औरंगपुऱ्यातील झाड, अय्यप्पा मंदिर परिसरातील गॅरेज आणि नारेगाव चौफुलीवरील कूलर कंपनीला आगीचा मोठा फटका बसला. तसेच फटाक्यांच्या आवाजामुळं परिसरातील पाळीव प्राणी, भटके प्राणी व पक्ष्यांनाही नाहक त्रास सहन करावा लागला. सण साजरा करताना स्वतःच्या आनंदासोबतच इतरांच्या आणि पर्यावरणाच्या सुरक्षिततेचा विचार करणे किती गरजेचे आहे, हे या संपूर्ण घटनांनी पुन्हा एकदा अधोरेखित केले आहे.