Chhatrapati Sambhajinagar: संभाजीनगरकरांचे टेन्शन वाढले!
शहर विकास आराखड्याला शासनाने १५ एप्रिल २०२५ रोजी मंजुरी दिली होती. मात्र, आराखड्यातील काही भागांमध्ये बदल व सुधारणा सुचविण्यात आल्याने ईपीची प्रक्रिया स्वतंत्रपणे सुरू होती. अखेर १४ मे २०२६ रोजी ईपीला शासनाने मंजुरी दिली आणि १५ मे रोजी त्याची गॅझेटमध्ये प्रसिद्धी करण्यात आली. गॅझेटमधील तरतुदीनुसार नकाशे तयार करण्याचे आदेश नगररचना विभागाला देण्यात आले होते. विभागाव्या सहसंचालक व सहाय्यक संचालकांनी नकाशे तयार करून ते शासनाच्या मंजुरीसाठी सादर केले होते. नकाशे तयार करण्याचे काम महिनाभरात पूर्ण झाल्याचा दावा नगररचना विभागाकडून करण्यात येत होता. मात्र, प्रत्यक्ष नकाशे नागरिकांना उपलब्ध होण्यासाठी अडीच महिन्यांचा कालावधी लागला.
ईपीमध्ये शहरातील रस्त्यांची रुंदी, रस्त्यांची अलाइनमेंट, मोकळ्या जागा आणि विविध भूखंडांवरील आरक्षणांमध्ये मोठ्या प्रमाणावर फेरबदल करण्यात आले आहेत. त्यामुळे आपल्या परिसरात नेमका कोणता बदल झाला, घर किंवा दुकान रस्त्याच्या नव्या आखणीमध्ये येते का, ग्रीन झोनचे यलो झोनमध्ये रूपांतर झाले आहे का, रस्त्याची रुंदी वाढली की कमी झाली, नवीन रस्ता कोणत्या दिशेने गेला, याची उत्सुकता नागरिकांना आहे. विशेषतः अस्तित्वात असलेली घरे आणि बांधकामे वाचविण्यासाठी काही ठिकाणी रस्त्यांची जुनी अलाइनमेंट बदलून नव्याने रस्ते आखण्यात आले आहेत. त्यामुळे नकाशे उपलब्ध झाल्यानंतर संबंधित भागातील नागरिकांकडून नगररचना कार्यालयात आणि संकेतस्थळावर नकाशे पाहण्यासाठी गर्दी होण्याची शक्यता आहे.
ईपीमध्ये शहरातील विविध भागांमध्ये सुमारे ४५० बदल करण्यात आल्याची माहिती सूत्रांनी दिली. काही ठिकाणी रस्त्यांची रुंदी कमी करण्यात आली असून, काही प्रस्तावित रस्ते रद्द करून संबंधित जमीन रहिवासी क्षेत्रात समाविष्ट करण्यात आली आहे. १२ मीटर रुंदीचे काही रस्ते ९ मीटर करण्यात आले आहेत. तसेच जुन्या रस्त्यांची अलाइनमेंट बदलून नव्या मार्गाने रस्ते प्रस्तावित करण्यात आले असून, त्यामध्ये अस्तित्वातील घरे वाचविण्याचा प्रयत्न करण्यात आला आहे.
पडेगाव, मिटमिटा, रावरसपुरा, जयसिंगपुरा, भावसिंगपुरा, बायजीपुरा, हसूल, जाधववाडी, चिकलठाणा, मुकुंदवाडी, नारळीबाग, पहाडसिंगपुरा, मोंढा नाका, गुलमंडी, जसवंतपुरा, हर्षनगर यासह शहरातील विविध भागांमध्ये ईपीनुसार बदल करण्यात आले आहेत. त्यामुळे या परिसरातील नागरिकांचे लक्ष आता नव्या नकाशांकडे लागले आहे.
.png "Videos"){kind=small}
