ऐन दिवाळीत छत्रपती संभाजीनगरमध्ये गुन्हेगारीचा कहर! आठ ठिकाणी चाकू, कोयते अन् लोखंडी रॉडने हल्ले

दिवाळीच्या उत्सवात शहरात सर्वत्र आनंद आणि रोषणाईचे वातावरण असताना दुसरीकडे किरकोळ वादातून चाकू, कोयते आणि लोखंडी शस्त्रांनी हल्ले करण्याच्या आठ घटनांनी छत्रपती संभाजीनगर शहर हादरले आहे.

• फटाक्यांच्या वादातून रक्तरंजित संघर्ष
• छत्रपती संभाजीनगरमध्ये आठ ठिकाणी हल्ले
• नागरिकांमध्ये भीतीचे वातावरण

छत्रपती संभाजीनगर : राज्यासह देशभरात गुन्हेगारी प्रचंड वाढली असून, वाढत्या गुन्हेगारीमुळे नागरिकांमध्ये नागरिकांमध्ये दहशत निर्माण होत आहे. गुन्हेगारी रोखण्यालाठी प्रयत्न करण्याची गरज आहे. अशातच आता दिवाळीच्या उत्सवात शहरात सर्वत्र आनंद आणि रोषणाईचे वातावरण असताना दुसरीकडे किरकोळ वादातून चाकू, कोयते आणि लोखंडी शस्त्रांनी हल्ले करण्याच्या आठ घटनांनी छत्रपती संभाजीनगर शहर हादरले आहे. या घटनांमुळे मोठी खळबळ उडाली आहे.

 

छावणीतील नेहरू पुतळ्याजवळ ८ नोव्हेंबर रोजी रात्री साडेआठच्या सुमारास शेख अफ्फान शेख उमर यांच्या दुचाकीवर स्कुटीवरील तिघांनी फटाके फेकले. जाब विचारल्याने झालेल्या वादात शेख जाहीद यांच्या पोटात चाकूने वार करण्यात आला. याप्रकरणी छावणी पोलिस ठाण्यात गुन्हा दाखल आहे. सिडकोतील म्हाडा कॉलनी, मूर्तिजापूर येथे ऋषिकेश गणेश शेजुळ यांच्यावर राजन बाळू इंगोले, अभि उर्फ बॉबी मोरे, संजय जाधव उर्फ बंबई व साथीदारांनी हल्ला केला. राजनने चाकूने, तर बॉबीने कोयत्याने वार केले. याप्रकरणी एमआयडीसी सिडको पोलिस ठाण्यात गुन्हा नोंदविण्यात आला.

मुकुंदवाडीतील पूर्व प्रकाशनगर येथे अरुण पडुळ यांच्या घरासमोर वाद झाला. यावेळी बॉबी मोरे याने अरुण यांच्या डोक्यात दगड मारला, तर राजन इंगोले याने त्यांच्या वडिलांच्या पोटात चाकू भोसकला. इतर साथीदारांनीही मारहाण केली. दुसऱ्या घटनेत तोरणागडनगरमध्ये मित्राला दिवाळीच्या शुभेच्छा देण्यासाठी गेलेल्या ऋतिक रवींद्र पाटील यांच्या डोक्यावर राजन इंगोले याने कोयत्याने वार केला. याप्रकरणी मुकुंदवाडी पोलिस ठाण्यात गुन्हा दाखल आहे. याच परिसरातील संतोषिमाता नगरमध्ये चुलत बहिणीच्या अंगावर फटाका टाकल्याचा जाब विचारणाऱ्या १७ वर्षीय रोहित बावरीया याच्या गालावर सागर आठवले याने धारदार शस्त्राने वार केला. या घटनेचीही नोंद मुकुंदवाडी पोलिस ठाण्यात झाली आहे.

सातारा परिसरात वाहनावर फटाका टाकण्याच्या वादातून योगेश आहेर याने रोहित संतोष गंगावणे याच्या डोक्यावर लोखंडी रॉडने वार केला. मध्यस्थी करणाऱ्या प्रथमेश नरवडे याच्या हातावर पियुष गडवे याने चाकूने वार केला. याप्रकरणी सातारा पोलिस ठाण्यात गुन्हा दाखल झाला आहे.

जवाहरनगरमध्ये फटाके फोडण्यावरून दोन गटांत हाणामारी झाली. या प्रकरणी परस्परविरोधी गुन्हे दाखल आहेत. सनी निकाळजे, अभिषेक निकाळजे, सुनील निकाळजे यांच्यासह अन्य व्यक्तींवर मारहाण व दगडफेकीचे आरोप असून, सनीने चाकूने वार केल्याची तक्रार आहे. घाटी क्वार्टरमध्ये वाहनांजवळ फटाके फोडण्यास विरोध केल्याने दोन शेजारी कुटुंबांत वाद झाला. शेख शहाबाज याने सुमित रवींद्र सौदे यांच्या हातावर आणि बरगडीत चाकूने वार केले. या घटनेत महिलाही जखमी झाल्या आहेत.

हे सुद्धा वाचा  : पुणे शहरात 31 किमीचे दोन भुयारी मार्ग उभारण्याची तयारी; वाहतूक कोंडी फोडण्यासाठी मेगा प्लॅन

पोलिसांसमोर आव्हान

सणासुदीच्या काळात किरकोळ कारणांवरून धारदार शस्त्रांचा वापर होत असल्याने नागरिकांच्या सुरक्षिततेचा प्रश्न निर्माण झाला आहे. अशा घटनांना आळा घालण्यासाठी पोलिसांकडून प्रतिबंधात्मक कारवाई आणि गस्त अधिक प्रभावी करण्याची अपेक्षा व्यक्त होत आहे.