बालविवाह केल्यास आता होणार कैद; महाबळेश्वर प्रशासनाचा कडक इशारा

बालविवाह प्रतिबंधक अधिनियम २००६ नुसार मुलीचे वय १८ आणि मुलाचे वय २१ वर्षांपेक्षा कमी असल्यास तो विवाह बेकायदेशीर ठरतो. अशा विवाहात सामील होणाऱ्या प्रत्येक घटकावर कायद्याचा बडगा उगारला जाईल.

​महाबळेश्वर : अक्षय तृतीयेच्या शुभ मुहूर्तावर मोठ्या प्रमाणावर विवाह सोहळे पार पडतात. मात्र, या मुहूर्ताचा गैरफायदा घेऊन कायद्याने प्रतिबंधित असलेले ‘बालविवाह‘ होण्याची शक्यता नाकारता येत नाही. ही सामाजिक अनिष्ट प्रथा मुळापासून उपटून टाकण्यासाठी महाबळेश्वर तालुका प्रशासन आता पूर्णपणे ‘ॲक्शन मोड’मध्ये आले असून, बालविवाह रोखण्यासाठी विशेष पथकांची नियुक्ती करण्यात आली आहे.
​
महाबळेश्वरचे तहसीलदार तथा तालुका दंडाधिकारी सचिन मस्के यांनी स्पष्ट संकेत दिले आहेत की, बालविवाह प्रतिबंधक अधिनियम २००६ नुसार मुलीचे वय १८ आणि मुलाचे वय २१ वर्षांपेक्षा कमी असल्यास तो विवाह बेकायदेशीर ठरतो. अशा विवाहात सामील होणाऱ्या प्रत्येक घटकावर कायद्याचा बडगा उगारला जाईल. यामध्ये केवळ वधू-वरांचे आई-वडील आणि नातेवाईकच नाही, तर लग्न लावणारे भटजी (पुरोहित), मंडप डेकोरेटर्स, मंगल कार्यालय मालक, वाजंत्री आणि अगदी लग्नाची पत्रिका छापणारे मुद्रक या सर्वांवर गुन्हे दाखल केले जातील. दोषी आढळल्यास २ वर्षांपर्यंत सक्त मजुरी आणि १ लाख रुपयांपर्यंत दंड अशी कठोर शिक्षा होऊ शकते.

Satara ZP : विषय समितींच्या सर्व सदस्यांच्या निवडी बिनविरोध; सत्ताधारी-विरोधकांत रंगला कलगीतुरा

​तालुका प्रशासन आणि महिला व बालविकास विभागाच्या समन्वयाने संपूर्ण महाबळेश्वर तालुक्यात विशेष मोहीम राबवली जात आहे. अक्षय तृतीयेच्या दिवशी गावोगावी ग्रामसेवक, अंगणवाडी सेविका आणि पोलीस पाटील यांचे विशेष पथक बारकाईने लक्ष ठेवून असेल. शहरी भागात बालविकास प्रकल्प अधिकाऱ्यांना सक्रिय राहण्याचे आदेश देण्यात आले आहेत. तसेच सरपंच आणि पोलीस पाटील यांना लग्नापूर्वी वधू-वरांच्या वयाची खात्री करण्याचे निर्देश दिले आहेत.

वधू-वराच्या वयाचे अधिकृत पुरावे तपासणार
​
सर्व मंगल कार्यालये आणि लॉन्स मालकांना त्यांच्याकडे होणाऱ्या विवाहात वधू-वरांचे वयाचे अधिकृत पुरावे (उदा. जन्म दाखला, बोनाफाईड सर्टिफिकेट) तपासणे प्रशासनाने बंधनकारक केले आहे.
​
बालविवाह ही मुलांच्या आरोग्यासाठी आणि भविष्यासाठी अत्यंत घातक प्रथा आहे, असे तालुका संरक्षण अधिकारी चंद्रकांत पाटील यांनी सांगितले. प्रशासनाने नागरिकांना आवाहन केले आहे की, जर तुमच्या परिसरात कुठेही बालविवाह होत असल्याची कुणकुण लागली, तर तात्काळ खालील क्रमांकावर संपर्क साधावा :

१. चाईल्ड हेल्पलाईन: १०९८ (टोल फ्री)
२. नजीकचे पोलीस स्टेशन: ११२

बालविवाहाबाबत माहिती देणाऱ्या व्यक्तीचे नाव पूर्णपणे गोपनीय ठेवले जाईल, त्यामुळे निर्भयपणे पुढे येऊन सामाजिक जबाबदारी पार पाडावी, असे आवाहन तहसीलदार सचिन मस्के यांनी केले आहे.