
शिरोली : सादळे मादळे (ता.करवीर) ग्रामसभेत तंटामुक्ती अध्यक्ष निवडीवरुन मंगळवारी सकाळी पोलिसांच्या समोर दोन गटात राडा झाला. ग्रामसभेच्या अध्यक्षस्थानी सरपंच पंडित बिडकर (Pandit Bidkar) होते. ग्रामसभेसत तंटामुक्ती समिती अध्यक्ष निवड अजेंड्यावर असल्याने सत्ताधारी व विरोधी गटातून जोरदार मोर्चेबांधणी करण्यात आली होती.
ग्रामसभेसाठी ग्रामस्थ व महिलांची मोठ्या प्रमाणात जुळवाजुळव करण्यात आली होती. सभेच्या सुरुवातीला ग्रामसेविका प्रिती तासगांवकर यांनी विषय वाचन केले. यामध्ये पेयजल पाणीपुरवठा पाइपलाईन ठराव सर्वानुमते मंजूर करण्यात आला. त्यानंतर महात्मा गांधी तंटामुक्त ग्राम समिती अध्यक्ष निवडीचा विषय आला.
यावेळी सत्ताधारी गटाकडून अध्यक्षपदासाठी उत्तम निवृत्ती चौगुले यांचे नाव अमर पारमित यांनी सुचविले तर अविनाश बिडकर यांनी अनुमोदन दिले. सभेचे अध्यक्ष पंडित बिडकर यांनी उत्तम चौगुले यांची निवड झाल्याचे घोषित केले. यावेळी विरोधी गटाकडून इच्छुक आनंदराव कोपार्डे यांच्या नावाची दखल न घेतली गेल्याने विरोधी गटाने अध्यक्ष निवडीवर आक्षेप घेतला. दोन्ही गटाकडून वाद उफाळून आला.
शाब्दिक शेरेबाजी, हातवारी करत एकमेकांना डिवचल्याने दोन्ही गटातील कार्यकर्ते एकमेकांच्या अंगावर धावून गेले. बंदोबस्तासाठी उपस्थित असलेल्या पोलिसांच्या समोर हाणामारी सुरू झाली. याची माहिती मिळताच शिरोली एमआयडीसी पोलीस घटनास्थळी दाखल झाले. दोन्ही गटातील पदाधिकारी व कार्यकर्ते यांना पोलीस ठाण्यात आणले.