Satara News: सातारा नगरपरिषदेला कूपर कॉर्पोरेशनचा सीएसआरमधून ट्रॅक्टर; स्वच्छता व हरित उपक्रमांना चालना

कूपर कॉर्पोरेशनने सातारा नगरपरिषदेला स्वच्छतेसाठी ट्रॅक्टर भेट दिला आहे. फरोख कूपर आणि अमोल मोहिते यांच्या उपस्थितीत हा सोहळा पार पडला.

 

• सातारा नगरपरिषदेला कूपर कॉर्पोरेशनचा सीएसआरमधून ट्रॅक्टर
• स्वच्छता व हरित उपक्रमांना चालना

सातारा, दि. १६ (प्रतिनिधी): शहरातील स्वच्छता आणि हरित विकासकामांना गती देण्यासाठी कूपर कॉर्पोरेशन प्रा. लि., सातारा यांनी आपल्या सीएसआर उपक्रमांतर्गत सातारा नगरपरिषदेला ट्रॅक्टर प्रदान केला. या ट्रॅक्टरच्या लोकार्पणाचा कार्यक्रम उत्साहपूर्ण वातावरणात पार पडला.

कंपनीचे चेअरमन अँड मॅनेजिंग डायरेक्टर फरोख कूपर व डायरेक्टर जाल कूपर यांच्या हस्ते नगराध्यक्ष अमोल मोहिते आणि उपनगराध्यक्ष अॅड. डी. जी. बनकर यांच्याकडे ट्रॅक्टरची चावी सुपूर्द करण्यात आली. यावेळी ट्रॅक्टरचे पूजन नगराध्यक्षांच्या हस्ते करण्यात आले.

कार्यक्रमादरम्यान नगराध्यक्ष अमोल मोहिते व उपनगराध्यक्ष डी. जी. बनकर यांनी फरोख कूपर यांचा शाल व पुष्पगुच्छ देऊन सत्कार केला व कृतज्ञता व्यक्त केली. यावेळी कूपर कॉर्पोरेशनच्या वतीनेही नगरपरिषद पदाधिकाऱ्यांचा सन्मान करण्यात आला.

Maharashtra Politics : साताऱ्यात महायुतीतच चुरस; जिल्हा परिषद राजकारण तापले

मनोगतात बोलताना नगराध्यक्ष मोहिते म्हणाले की, कूपर कॉर्पोरेशनने साताऱ्याच्या विकासासाठी सातत्याने सामाजिक बांधिलकी जपत योगदान दिले असून, शहराला गरज भासल्यास कंपनी नेहमी पुढाकार घेते.

या प्रसंगी कूपर कॉर्पोरेशनचे डायरेक्टर असलम फरास, आर्थिक दुर्बल घटक समितीचे सभापती संकेत साठे, नगरपरिषदेचे वृक्ष विभाग प्रमुख दिग्विजय गाढवे तसेच कंपनीचे अधिकारी व कर्मचारी उपस्थित होते.

सीएसआर अंतर्गत मिळालेला हा ट्रॅक्टर शहरातील झाडांना पाणी देणे, रोड डिव्हायडरमधील वृक्षांची देखभाल आणि स्वच्छता कामांसाठी उपयुक्त ठरणार असून, त्यामुळे नगरपरिषदेच्या कामकाजात अधिक कार्यक्षमता येईल, असा विश्वास व्यक्त करण्यात आला.

सातारा जिल्हा ग्रामपंचायत अधिकारी संघटना अध्यक्षपदी संतोषकुमार माळवे; तर सरचिटणीसपदी संदीप सावंत