संग्रहित फोटो
अजित पवार म्हणाले , आमच्या पक्षाचे उमेदवार बारामतीत निवडणूक लढवीत आहेत. मात्र मी त्या ठिकाणी कोणाला धमकी दिली, दहशत केली नाही. पोलीसांना सांगतो हे तीन पक्षाचे सरकार आहे. कायदा कुणी हातात घेत असेल, त्याला कायदा काय असतो हे दाखवून द्या. दौंडमध्ये कोण दमदाटी करीत असेल तर कायद्याने त्याला जरब बसलाच पाहिजे, असे अजित पवार म्हणाले. मी बारामतीचा विकास करून दाखवला, मी विकास कामांना महत्त्व देतो, तुम्ही कधीही पहाटे आला तरी तुम्हाला नगरपालिकेतील कर्मचारी काम करताना पाहायला मिळेल. त्यामुळे कोल्हापुरातील लोक बारामतीला राहायला येतात. बारामतीचे एसटी स्टँड पहा आणि दौंडचे एसटी स्टँड पहा, अशा लोकांना का संधी देता? दौंडचे व्यापारी शहर सोडून गेले हे कुणाचे अपयश आहे? तू विकास कुठे केलाय ते तरी मला दाखव, असे आव्हान राज्याचे उपमुख्यमंत्री अजित पवार यांनी भाजप आमदार राहुल कुल यांना दिलं आहे. अशा लोकांना तुम्ही का निवडून देता? असा मिश्किल प्रश्न त्यांनी दौडकरांना विचारला.
मी दौंड नगरपालिकेच्या निवडणुकीसाठी उभे केलेले नगराध्यक्ष आणि इतर सर्व नगरसेवकांना निवडून द्या, मग विकास काय असतो ते मी करुन दाखवतो, असे आश्वासन पवार यांनी यावेळी बोलताना दिले. याप्रसंगी राष्ट्रवादी काँग्रेस पक्षाचे नेते आणि दौंड शुगर चे संचालक वीरधवल जगदाळे, माजी नगरसेवक इंद्रजीत जगदाळे, माजी आमदार रमेश थोरात, ज्येष्ठ नेते नंदू पवार, शिवसेनेचे नेते राजन खट्टी, वंचित बहुजन आघाडीचे नेते अश्विन वाघमारे, नगराध्यक्ष च्या उमेदवार दुर्गादेवी जगदाळे यांच्यासह राष्ट्रवादी काँग्रेस पक्ष, शिवसेना आणि इतर पक्षाचे पदाधिकारी आणि कार्यकर्ते मोठ्या संख्येने उपस्थित होते.
