Dharashiv News : दिवाळीच्या फराळातून जुळले माणुसकीचे नाते; जिल्हाधिकाऱ्यांची पारधी वस्तीला भेट

Dharashiv News : दिवाळीनिमित्त धाराशिवच्या जिल्हाधिकारी कीर्ती किरण पुजार यांनी पानगाव येथील पारधी वस्तीला भेट देत नागरिकांच्या समस्या जाणून घेतल्या. निवारा, पाणी आणि रोजगाराचे प्रश्न सोडविण्याची ग्वाही दिली. Focus Keyword

• पानगाव येथे नागरिकांच्या समस्या जाणून घेतल्या
• निवारा, पाणी आणि रोजगाराचे प्रश्न सोडविण्याची ग्वाही
• चिमुकल्यांशी संवाद; शिक्षणाचा दिला संदेश

 

Dharashiv News :  दिवाळीच्या आनंदात समाजातील वंचित घटकांसोबत आनंद वाटून घेत जिल्हाधिकारी कीर्ती किरण पुजार यांनी कळंब तालुक्यातील पानगाव येथील पारधी वस्तीला भेट दिली. यावेळी त्यांनी नागरिकांशी संवाद साधत त्यांच्या समस्या जाणून घेतल्या. हक्काची जागा, पिण्याचे पाणी आणि रोजगाराच्या प्रश्नांवर प्राधान्याने कार्यवाही करण्याची ग्वाही दिली. तसेच लहान मुलांशी संवाद साधून त्यांना शिक्षणाचे महत्त्व पटवून दिले.

जिल्हाधिकारी पुजार यांनी 9 नोव्हेंबर रोजी रात्री पानगाव येथील पारधी वस्तीला भेट दिली. यावेळी निवासी उपजिल्हाधिकारी विद्याचरण कडवकर उपस्थित होते. वस्तीवरील नागरिकांच्या राहणीमानाची, उपजीविकेची आणि दैनंदिन अडचणींची माहिती घेत जिल्हाधिकाऱ्यांनी त्यांचे म्हणणे जाणून घेतले.

पारधी बांधव अनेक पिढ्यांपासून या ठिकाणी वास्तव्यास असले, तरी त्यांना अद्याप हक्काची जागा मिळालेली नाही. तसेच सध्याच्या दुष्काळी परिस्थितीमुळे पिण्याच्या पाण्याचा प्रश्न गंभीर बनला आहे. वस्तीवरील अनेक कुटुंबे फटाका कारखान्यात आणि शेतांमध्ये मजुरी करून उदरनिर्वाह करतात. मात्र, कायमस्वरूपी रोजगाराची साधने उपलब्ध नसल्याने त्यांना आर्थिक अडचणींचा सामना करावा लागत असल्याचे नागरिकांनी सांगितले. या सर्व प्रश्नांवर योग्य ती कार्यवाही करून तातडीने निवारण करण्याचे आश्वासन जिल्हाधिकाऱ्यांनी दिले.

चिमुकल्यांशी संवाद; शिक्षणाचा दिला संदेश

भेटीदरम्यान जिल्हाधिकारी पुजार यांनी वस्तीवरील लहान मुलांशी मनमोकळ्या गप्पा मारल्या. प्रत्येक मुलाने नियमित शाळेत जाऊन शिक्षण घ्यावे, पालकांनीही मुलांच्या शिक्षणासाठी पुढाकार घ्यावा, असे आवाहन त्यांनी केले. शिक्षणामुळे मुलांच्या आयुष्याला नवी दिशा मिळू शकते, त्यामुळे एकही मूल शिक्षणापासून वंचित राहू नये, असे त्यांनी सांगितले. निवासी उपजिल्हाधिकारी विद्याचरण कडवकर यांनी शासकीय आश्रमशाळांमधील मोफत शिक्षण, निवास आणि आरोग्य सुविधांची माहिती देत पालकांना मार्गदर्शन केले.

Wardha News: कारंजातील अचानक डायलिसिस केंद्र बंद! निधीअभावी मोफत सेवा ठप्प; रुग्णांच्या अडचणीत भर

दिवाळीचा फराळ अन् माणुसकीचा गोडवा

दिवाळीनिमित्त प्रशासनाच्या वतीने वस्तीवरील नागरिकांना फराळाचे वाटप करण्यात आले, तर चिमुकल्यांना फटाके देण्यात आले. यावेळी पारधी बांधवांनी जिल्हाधिकाऱ्यांनी आपुलकीने समस्या ऐकून घेतल्याबद्दल आनंद व्यक्त करत स्वतःकडील खाऊ त्यांना प्रेमाने दिला. जिल्हाधिकाऱ्यांनीही त्यांच्या प्रेमाचा स्वीकार करत खाऊ खाल्ला.

प्रशासन आणि वंचित समाजातील घटकांमध्ये विश्वासाचे नाते निर्माण करणारा हा प्रसंग उपस्थितांसाठी भावनिक ठरला. केवळ शासकीय कार्यालयातून नव्हे, तर थेट वस्तीवर जाऊन नागरिकांच्या समस्या जाणून घेणे आणि त्यांच्या सुख-दुःखात सहभागी होणे, या भेटीतून प्रशासनाचा लोकाभिमुख दृष्टिकोन अधोरेखित झाला. दिवाळीच्या प्रकाशपर्वात पानगावच्या पारधी वस्तीवर माणुसकी आणि आशेचा नवा दिवा उजळला.

एका अक्षराच्या चुकीमुळे ‘या’ गावातील शेतकरी दिवाळी मदतीपासून वंचित; प्रशासनाचा भोंगळ कारभार उघड