
दुष्काळी परिस्थितीचा राज्यपालांकडून आढावा; बलसूरमध्ये शेतकऱ्यांची मोठी उपस्थिती
राज्यपाल जिष्णू देव वर्मा यांचे जकेकूर चौरस्ता येथील औद्योगिक वसाहतीत हेलिकॉप्टरने आगमन झाले. त्यानंतर त्यांनी बलसूर येथील नाला सरळीकरणाच्या कामाची पाहणी केली. तसेच पाण्याअभावी कोरड्या पडलेल्या तलावाची आणि परिसरातील वाळलेल्या शेतीपिकांची पाहणी करून दुष्काळी परिस्थितीचा आढावा घेतला.
या दौऱ्यावेळी राज्यपालांचे सचिव प्रशांत नारनवरे, जिल्हाधिकारी कीर्ती किरण पुजार, जिल्हा परिषदेच्या मुख्य कार्यकारी अधिकारी प्रियवंदा महाडदळकर, आमदार प्रवीण स्वामी, राष्ट्रवादी काँग्रेस पक्षाचे प्रदेश उपाध्यक्ष प्रा. सुरेश बिराजदार, पंचायत समितीच्या सभापती अॅड. आकांक्षाताई चौगुले, उमरग्याचे नगराध्यक्ष किरण गायकवाड आणि जिल्हा परिषद सदस्या सविताताई बिराजदार यांच्यासह अनेक मान्यवर उपस्थित होते.
बलसूर येथील छत्रपती शिवाजी महाविद्यालयात राज्यपालांनी शेतकऱ्यांशी संवाद साधला. यावेळी दुष्काळग्रस्त धाराशिव जिल्हा आणि उमरगा तालुक्याच्या वतीने प्रा. सुरेश बिराजदार यांनी शेतकऱ्यांच्या विविध समस्या आणि मागण्या राज्यपालांसमोर मांडल्या.
दुष्काळामुळे ऊस उत्पादनात मोठी घट झाली असून, या नुकसानीच्या पार्श्वभूमीवर शेतकऱ्यांना ७० टक्के गटाचे तातडीने अनुदान देण्यात यावे, अशी मागणी करण्यात आली. तसेच शेतकऱ्यांना एकरी एक लाख रुपयांचे अनुदान द्यावे, मागील वर्षीचा प्रलंबित पीकविमा आणि चालू वर्षाचा पीकविमा तातडीने वितरित करावा, अशा प्रमुख मागण्या मांडण्यात आल्या. याशिवाय परिसरातील शेतकऱ्यांच्या इतर समस्यांकडेही लक्ष वेधण्यात आले. यावेळी आमदार प्रवीण स्वामी यांनीही आपले विचार मांडले. काही शेतकऱ्यांना मनोगत व्यक्त करण्याची संधी देण्यात आली. त्यांनी दुष्काळामुळे शेतीचे झालेले नुकसान, पाणीटंचाई आणि आर्थिक अडचणी याबाबत आपल्या व्यथा मांडल्या.
शेतकऱ्यांचे म्हणणे ऐकून घेतल्यानंतर राज्यपाल जिष्णू देव वर्मा यांनी उपस्थितांना मार्गदर्शन केले. ते म्हणाले की, धाराशिव जिल्ह्यातील या भागाला दुष्काळ आणि भूकंपासारख्या संकटांचा सातत्याने सामना करावा लागत आहे. अशा परिस्थितीत या भागातील नागरिकांना दिलासा देण्यासाठी राज्य शासन आणि केंद्र शासनाच्या माध्यमातून सर्वतोपरी प्रयत्न केले जातील.
दुष्काळासंदर्भात आवश्यक असलेल्या सर्व उपाययोजना तातडीने करण्यात येतील, असे आश्वासनही त्यांनी दिले. पाण्याच्या नियोजनाबाबत बोलताना राज्यपाल म्हणाले की, पाऊस जास्त पडतो तेव्हा आपण पाण्याचे संरक्षण करण्याकडे पुरेसे लक्ष देत नाही. मात्र पाऊस कमी झाल्यानंतर पाणीटंचाईवर उपाययोजना शोधण्यास सुरुवात करतो. त्यामुळे पाण्याचे योग्य नियोजन आणि संवर्धन करणे आवश्यक आहे. दुष्काळ आणि जलसंकटाचा सामना करण्यासाठी सर्वांनी एकत्रितपणे प्रयत्न करणे गरजेचे आहे, असे आवाहन त्यांनी केले.
या दौऱ्यातील विशेष बाब म्हणजे बलसूर आणि परिसरातील ग्रामपंचायती तसेच शेतकऱ्यांच्या वतीने राज्यपाल जिष्णू देव वर्मा यांना शेतकऱ्यांचे प्रतीक म्हणून नांगर भेट देण्यात आला. शेती आणि शेतकऱ्यांच्या कष्टांचे प्रतीक असलेल्या या नांगराच्या माध्यमातून स्थानिक ग्रामस्थांनी राज्यपालांचे स्वागत आणि सन्मान केला. दरम्यान, बलसूर, कलदेव लिंबाळा यांसह परिसरातील विविध गावांच्या ग्रामस्थांनी राज्यपालांना निवेदने सादर केली. या दौऱ्याला परिसरातील शेतकरी, महिला आणि नागरिकांनी मोठ्या संख्येने उपस्थिती लावली होती.
या वेळी उपविभागीय अधिकारी दत्तू शेवाळे, तहसीलदार गोविंद येरमे, उपविभागीय पोलीस अधिकारी प्रशांत संपते, आर्थिक गुन्हे शाखेच्या अश्विनी भोसले, लोहारा तहसीलदार रणजीतसिंह कोळेकर, पोलीस निरीक्षक प्रल्हाद सूर्यवंशी, गटविकास अधिकारी प्रशांत मरोड आणि तालुका आरोग्य अधिकारी बिराजदार यांच्यासह विविध विभागांचे अधिकारी उपस्थित होते. राज्यपालांच्या या दौऱ्यामुळे धाराशिव जिल्ह्यातील दुष्काळी परिस्थिती, शेतकऱ्यांचे प्रश्न आणि पाणीटंचाईचा मुद्दा शासनाच्या स्तरावर पोहोचण्यास मदत होईल, अशी अपेक्षा स्थानिक शेतकरी आणि ग्रामस्थांनी व्यक्त केली.
दुष्काळग्रस्त शेतकऱ्यांसाठी सुमीत एसएसजीचा मदतीचा हात; मुख्यमंत्री सहाय्यता निधीस ५० लाखांचे योगदान
Ans: राज्यपाल जिष्णू देव वर्मा यांनी बलसूर येथे दुष्काळ पाहणी दौरा केला.
Ans: दुष्काळ पाहणीनंतर राज्यपालांनी स्थानिक शेतकऱ्यांशी संवाद साधला.
Ans: राज्यपालांच्या दौऱ्यादरम्यान शेतकऱ्यांनी मोठ्या संख्येने उपस्थिती लावली.