कोल्हापूरमध्ये शिवसेनेची ताकद वाढणार; माजी महापौर सई खराडे यांचा शिंदेंच्या उपस्थितीत प्रवेश

कोल्हापूर महानगरपालिकेत दोन वेळा नेतृत्व केलेल्या कोल्हापूरच्या माजी महापौर सई खराडे यांनी आज उपमुख्यमंत्री एकनाथ शिंदे यांच्या नेतृत्वाखालील शिवसेनेत प्रवेश केला आहे.

• कोल्हापूरमध्ये शिवसेनेची ताकद वाढणार
• सई खराडे यांचा शिंदेंच्या उपस्थितीत प्रवेश
• ठाण्यात पक्षप्रवेश सोहळा संपन्न

कोल्हापूर : कोल्हापूर महानगरपालिकेत दोन वेळा नेतृत्व केलेल्या कोल्हापूरच्या माजी महापौर सई खराडे यांनी आज उपमुख्यमंत्री एकनाथ शिंदे यांच्या नेतृत्वाखालील शिवसेनेत प्रवेश केला आहे. ठाणे येथे आयोजित पक्षप्रवेश सोहळ्यात स्वतः एकनाथ शिंदे यांच्या हस्ते त्यांचा पक्षप्रवेश झाला आहे, या कार्यक्रमाला कोल्हापूर उत्तरचे आमदार राजेश क्षीरसागर यांच्यासह जिल्ह्यातील अनेक मान्यवर उपस्थित होते. सई खराडे यांच्यासोबत त्यांचे चिरंजीव शिवतेज खराडे यांचाही शिंदे गटात प्रवेश झाला आहे.

सई खराडे यांनी कोल्हापूर महानगरपालिकेत दोन वेळा प्रतिनिधित्व केले असून, २००५ साली त्यांनी महापौरपदाची जबाबदारी यशस्वीपणे पार पाडली आहे. शिवाजी पेठ विभागातून त्यांनी दोन कार्यकाळ नगरसेवक म्हणून काम केले आहे. कृषिभूषण कै. महिपतराव (पापा) बेंद्रे यांच्या कन्या आणि माजी नगराध्यक्ष कै. सखारामबापू खराडे यांच्या स्नुषा म्हणून त्यांचा राजकीय वारसा भक्कम मानला जातो. त्यांच्या प्रशासनिक कार्याची माहिती असलेल्या मतदारांमध्ये आजही त्यांची छाप कायम आहे. त्यांच्या प्रवेशामुळे कोल्हापूरमधील शिंदे गटाची ताकद वाढण्याची शक्यता वर्तवली जात आहे.

स्थानिक पातळीवर शिंदे गट मजबूत करण्यासाठी नेतृत्व सातत्याने प्रयत्नशील असून, सई खराडे यांचे अनुभव, जनसंपर्क आणि प्रभावी व्यक्तिमत्त्व पक्षासाठी महत्त्वपूर्ण ठरणार आहे. जिल्हा आणि राज्यस्तरीय नेत्यांची उपस्थिती लक्षवेधी ठरणार असून, या प्रवेशामुळे कोल्हापूरच्या राजकारणातील समीकरणे बदलण्याची चिन्हे स्पष्ट दिसत आहेत. सई खराडे यांच्या प्रवेशामुळे आगामी कोल्हापूर महानगरपालिका निवडणुकांसह स्थानिक राजकारणात शिंदे गट अधिक सक्रिय होईल, असा अंदाज व्यक्त केला जात आहे. त्यांच्या नेतृत्वामुळे पक्षाला नवी ऊर्जा मिळेल, अशी अपेक्षा व्यक्त होत आहे.