आता LPG गॅस सिलेंडरला करा ‘बायबाय’; तुमच्याही घरात पाईपने येणार गॅस तोही PNG

राज्यात एलपीजीच्या वापरावर मर्यादा असल्याने पर्यायी इंधन म्हणून पाईप्ड नॅचरल गॅस (पीएनजी) पुरवठा वाढवण्यावर शासनाचा भर आहे. त्यासाठी विविध परवानग्यांची प्रक्रिया सुलभ करण्यात आली.

मुंबई : केंद्र सरकारच्या आदेशानुसार राज्यभर सिटी गॅस डिस्ट्रीब्युशन (सीजीडी) प्रकल्पाला गती देण्यासाठी महाराष्ट्र शासनाने महत्त्वाचा निर्णय घेतला आहे. 30 जूनपर्यंत आवश्यक असलेल्या सर्व परवानग्या मिळाल्या आहेत, असे गृहित धरून काम सुरू करण्याचे निर्देश देण्यात आले आहेत, अशी माहिती राज्याचे अन्न व नागरी पुरवठा मंत्री छगन भुजबळ यांनी दिली.

राज्यात एलपीजीच्या वापरावर मर्यादा असल्याने पर्यायी इंधन म्हणून पाईप्ड नॅचरल गॅस (पीएनजी) पुरवठा वाढवण्यावर शासनाचा भर आहे. त्यासाठी विविध परवानग्यांची प्रक्रिया सुलभ करण्यात आली असून, २४ तासांच्या आत परवानगी देण्याचे आदेश देण्यात आले आहेत. विशेष म्हणजे, पीएनजी प्रकल्पांसाठी स्थानिक स्वराज्य संस्थेच्या परवानगीची अट रद्द करण्यात आली असून, विविध शुल्कही माफ करण्यात आले आहेत.

दरम्यान, महाराष्ट्रातील विविध जिल्ह्यांमध्ये कोणत्या कंपनीकडून पीएनजी पुरवठा केला जाणार आहे, याबाबतची माहितीही समोर आली आहे. सीटी गॅस डिस्ट्रीब्यूशनची पाईपलाईन ज्या भागातून जाईल, त्या ठिकाणी घरगुती, व्यावसायिक आणि औद्योगिक वापरासाठी पीएनजी पुरवठ्याला परवानगी दिली जाणार असल्याचेही भुजबळ यांनी स्पष्ट केले.

PNG मिथेनपासून बनलेले स्वच्छ इंधन

पीएनजी हे प्रामुख्याने मिथेनपासून बनलेले एक स्वच्छ आणि सुरक्षित इंधन आहे. त्याचा प्रवास जमिनीखालील नैसर्गिक साठ्यांमधून सुरू होतो, जिथे ड्रिलिंगद्वारे ते काढले जाते. सुरुवातीला अशुद्ध असलेले हे इंधन, कार्बन डायऑक्साइड आणि सल्फरसारखे घटक काढून टाकण्यासाठी प्रक्रिया केंद्रांमध्ये नेले जाते.

अधिकृत पीएनजी कंपन्या नेमक्या कुठं?

– पालघर, ठाणे ग्रामीण गुजरात गॅस लिमिटेड
– रायगड : महानगर गॅस लिमिटेड
– पुणे जिल्हा : टोरेंट गॅस पुणे लिमिटेड
– रत्नागिरी : महानगर गॅस लिमिटेड
– सोलापूर : आयएमसीएल लिमिटेड
– कोल्हापूर : एपीओआयएल गॅस प्रा. लि.
– मुंबई व बृहन्मुंबई : महानगर गॅस लिमिटेड

हेदेखील वाचा : Navi Mumbai Stadium : नवी मुंबईत साकारणार जागतिक दर्जाचे आधुनिक स्टेडियम! मंत्री ॲड. आशिष शेलार यांचे तातडीचे निर्देश