जाणून घ्या कल्याण लोकसभा मतदार संघात मतांचं गणित, डॉ. श्रीकांत शिंदे विरुद्ध वैशाली दरेकर

कल्याण ग्रामीणमध्ये डॉ. श्रीकांत शिंदे यांना सर्वाधिक तर कळवा मुंबऱ्यात कमी मते, वैशाली दरेकर यांना मुंब्रा विधानसभेत सर्वाधिक मते

कल्याण : संपूर्ण महाराष्ट्राचे लक्ष लागलेल्या कल्याण लोकसभा मतदारसंघात महायुतीच्या डॉ. श्रीकांत शिंदे यांचा 2 लाख 9 हजार 144 मतांनी विजय झाला. या लोकसभा निवडणुकीची विधानसभा निहाय आकडेवारी आता समोर आली असून डॉ. श्रीकांत शिंदे यांना कल्याण ग्रामीण विधानसभा मतदारसंघात सर्वाधिक मते तर कळवा मुंब्रा विधानसभा मतदार संघात कमी मते मिळाली आहेत. महाविकास आघाडीच्या उमेदवार वैशाली दरेकर राणे यांना कळवा मुंब्रा विधानसभेत सर्वात जास्त मते प्राप्त झाली आहेत.

लोकसभा निवडणुकीची मतमोजणी मंगळवारी संपन्न झाली. त्यामध्ये कल्याण लोकसभा मतदारसंघातील महायुतीचे उमेदवार आणि विद्यमान खासदार डॉ. श्रीकांत शिंदे हे सलग तिसऱ्यांदा निवडणुकीच्या रिंगणात उभे होते. महाराष्ट्रात दोन वर्षांपूर्वी झालेल्या राजकीय उलथापालथीनंतर होणाऱ्या या देशाच्या निवडणुकीकडे सर्वांचे लक्ष लागले होते.

[read_also content=”लोकसभा निवडणुकीच्या निकालानंतर श्रीकांत शिंदे यांनी मानले मतदारांचे आभार https://www.navarashtra.com/maharashtra/shrikant-shinde-thanked-the-voters-after-the-results-of-the-lok-sabha-elections-542806.html”]

कल्याण लोकसभा मतदारसंघातील महायुतीचे उमेदवार डॉ. श्रीकांत शिंदे हे सलग तिसऱ्यांदा दणदणीत मतांनी विजयी झाले आहेत. या विजयामध्ये मनसे आमदार राजू पाटील यांच्या कल्याण ग्रामीण मतदारसंघाने डॉ. शिंदे यांच्या विजयामध्ये सिंहाचा वाटा उचलला आहे. तर त्याखालोखाल डोंबिवली, अंबरनाथ, कल्याण पूर्व, उल्हासनगर आणि कळवा, मुंब्रा विधानसभा मतदारसंघाचा क्रमांक लागत आहे.

डॉ श्रीकांत शिंदेंना मिळालेली मते

डॉ. श्रीकांत शिंदे यांना कल्याण ग्रामीण विधानसभेत 1 लाख 51 हजार 702 मते, डोंबिवली विधानसभेत 99 हजार 734 मते, अंबरनाथ विधानसभेत 93 हजार 670 मते, कल्याण पूर्व विधानसभेत 87 हजार 129 मते, उल्हासनगर विधानसभेत 85 हजार 698 मते तर मुंब्रा कळवा विधानसभेत 69 हजार 988 मते मिळाली आहेत.

वैशाली दरेकर यांना मिळालेली मते

महाविकास आघाडीच्या उमेदवार वैशाली दरेकर राणे यांना कळवा मुंब्रा विधानसभेत सर्वाधिक जास्त 1 लाख 35 हजार 496 मते मिळाली आहेत. त्यापाठोपाठ कल्याण ग्रामीण विधानसभेत 65 हजार 407 मते, अंबरनाथ विधानसभेत 58 हजार 28 मते, कल्याण पूर्व विधानसभेत 54 हजार 533 मते, डोंबिवली विधानसभेत 34 हजार 531 मते तर उल्हासनगर विधानसभेत 31 हजार 241 मते मिळाली आहेत.

टपाली मतदान देखील निर्णायक ठरले असून डॉ. श्रीकांत शिंदे यांना 1 हजार 715 तर वैशाली दरकेर यांना 1 हजार 256 मते मिळाली आहेत. वरीलपैकी कोणीही नाही म्हणजेच नोटाला 11 हजार 686 मतदारांनी मतदान केले आहे. दरम्यान 2019 च्या लोकसभा निवडणुकीच्या तुलनेत डॉ. श्रीकांत शिंदे यांना 29 हजार 313 मते जास्त मिळाली असून त्यांचे मताधिक्य मात्र 1 लाख 35 हजार 199 मतांनी घटले आहे. 2019 च्या निवडणुकीत डॉ. श्रीकांत शिंदे यांना 5 लाख 59 हजार 723 मते मिळाली होती. तर तेव्हा राष्ट्रवादी कॉँग्रेस पार्टीचे उमेदवार बाबाजी पाटील यांच्या विरोधात 1 लाख 35 हजार 199 मतांचे मताधिक्य मिळाले होते.