Kolhapur Rain News: मुसळधार पाऊसामुळे कागल तालुक्यात मोठ्या प्रमाणात नुकसान

कागल: कागल तालुक्यात गेल्या आठ दिवसात वादळी वारे आणि पावसामुळे विविध ठिकाणी राहती घरे, जनावरांचे गोठे, घरावर ,गाड्यांवर झाड पडणे, आंबा बाग यांचे सुमारे १० लाख ५६ हजार रुपयांचे नुकसान झाले. नुकसानीचे पंचनामे करावेत अशी नुकसानग्रस्तांची मागणी होत आहे.

कागल तालुक्यात गेल्या आठ दिवसात वादळी वारे आणि मुसळधार पाऊस यामुळे मोठ्या प्रमाणात नुकसान झाले आहे. यामध्ये सोनाळी येथील अशोक चौगुले, सुखदेव कपले, गजानन तेली, सौरभ पाटील यांच्या घर आणि शेड वरील पत्रे उडून एक लाख साठ हजार रुपयांचे नुकसान झाले आहे.

सिद्धनेर्ली येथील मंडल अधिकाऱ्यांच्या गाडीवर झाड कोसळून सुमारे तीन लाख रुपयांचे तर अलाबाद येथील नियाज देसाई यांच्या मटन दुकानावर झाड पडून सुमारे ७० हजार रुपयांचे नुकसान झाले आहे.  बेलेवाडी मासा येथील बळवंत गोरुले यांच्या दहा गुंठे आंबा बागेचे नुकसान झाले आहे. तसेच विश्वास पाटील यांचे शेतघर, जनावरांचा गोठा पडून पंधरा हजार रुपयांचे नुकसान झाले आहे. विलास पाटील यांच्या काजू कारखान्याचे एक लाख २५ हजाराचे नुकसान झाले आहे.

व्हनाळी जयसिंग हात्रोटे, राहुल कांबळे, सुरेश सुतार, बाबुराव चांभार, प्रशांत हात्रोटे, प्रवीण हात्रोटे, भाऊसो वाडकर, संगीता वाडकर, सुरेश हात्रोटे, राजाराम गुरव, पंडित वाडकर यांची राहती घरे, जनारांचे गोठे यांचे ३ लाख ३६ हजार रुपयांचे नुकसान झाले आहे. या नुकसानीचे तात्काळ पंचनामे करावेत. अशी मागणी नुकसानग्रस्तां कडून करण्यात येत आहे.

Maharashtra Weather Update: केरळमध्ये मान्सून दाखल; महाराष्ट्राच्या वेशीवर केव्हा येणार ? वाचा सविस्तर बातमी

कागल तालुक्यात गेल्या चार दिवसापासून पाऊस पडत आहे. गेले दोन दिवस तर संतधार सुरू आहे. त्यामुळे मान्सून पावसाची स्थिती दिसत आहे.  सकाळपासून पावसाची रिपरिप सुरू होती. सततच्या पडणाऱ्या पावसामुळे अवचित वाडी ता. कागल येथील फळबागांचे मोठे नुकसान झाले आहे. तसेच पावसाची अशीच स्थिती राहिली तर खरिपाच्या पेरण्या लांबण्याची शक्यता कृषी विभागाकडून व्यक्त करण्यात आली आहे.

संततधार पावसामुळे मशागतीची कामे थंडावली असली तरी मान्सूनपूर्व पाऊस ऊस पिकाला फायदेशीर आहे.रोहिणीचा पेरा मोत्याचा तुरा या म्हणीप्रमाणे २५ मे रोजी रोहिणी नक्षत्र आणि ६ जून पर्यंत मृग नक्षत्र या काळात पावसाचे प्रमाण कमी असते. त्यामुळे ८० टक्के पेरण्या पूर्ण होतात.

केरळमध्ये मान्सून दाखल; महाराष्ट्राच्या वेशीवर केव्हा येणार ?

देशभरात पूर्वमान्सूनला सुरुवात झाली असून मान्सून केरळमध्ये दाखल कधी होणार असा प्रश्न सर्वसामान्यांना पडला असेल. गेल्या काही दिवसांपासून महाराष्ट्र, गोवा, कर्नाटक आणि केरळमध्ये जोरदार वळवाचा पाऊस सुरु आहे. यंदा मान्सून आठवडाभर लवकरच येणार असल्याचा अंदाज होता, तो खरा ठरला आहे. या वर्षी गेल्या १६ वर्षांमध्ये केरळमध्ये सर्वात लवकर मान्सूनचे आगमन झाले आहे. राज्यात मान्सूनच्या आगमनासाठी सर्व अनुकूल परिस्थिती निर्माण करण्यात आली होती. केरळच्या अनेक भागात गेल्या दोन दिवसांपासून मुसळधार पाऊस पडत आहे.