एनडीए रस्त्यावर कोयता गँगची दहशत; उपहारगृहातील कामगारांना मारहाण

पुणे : एनडीए रस्त्यावर कोयता गँगने दहशत माजवत हॉटेलात काम करणाऱ्या दोन कामगारांना मारहाण केली. याप्रकरणी पोलिसांनी तिघांना अटक केली. प्रसन्न उर्फ बाळा मनोज कदम (वय २३, रा. शांतीबन सोसायटी, शिवणे), आदित्य उद्धव पांचाळ (वय १९, रा. राहुलनगर, शिवणे), सनी रामप्रताप गुप्ता (वय २१, रा. समर्थ आंगण सोसायटी, शिवणे) अशी अटक केलेल्यांची नावे आहेत. याबाबत अमर राजेंद्र घारे (रा. स्वरा हाईट्स, अहिरे गाव, वारजे) यांनी उत्तमनगर पोलीस ठाण्यात तक्रार दिली आहे.

कोयता उगारुन मारहाण

पोलिसांच्या माहितीनुसार, घारेंचे एनडीए रस्त्यावर मोठे हॉटेल आहे. त्यांच्या हॉटेलातील कामगार रुपेश व रमेश दुचाकीने एनडीए रस्त्याने जात होते. शिवणे परिसरात कदम, पांचाळ आणि गुप्ता यांनी दोघांना अडवले आणि शिवीगाळ केली. मी या भागातील दादा आहे. बाजूला चल मी तुला दाखवितो, अशी धमकी दिली. तसेच, त्याच्याकडील कोयता उगारुन मारहाण करण्यास सुरुवात केली. तेव्हा मोठी गर्दी जमा झाली होती.

उत्तमनगर पोलिसांची घटनास्थळी धाव

तेव्हा कदम, पांचाळ, गुप्ता यांनी कोयता उगारुन मध्यस्थी करणाऱ्या नागरिकांना शिवीगाळ केली. आम्हाला अडवायचे नाही, अशी धमकी दिली. कोयते उगारुन दहशत माजविली. या घटनेची माहिती मिळताच उत्तमनगर पोलिसांनी घटनास्थळी धाव घेतली. पोलिसांनी पसार झालेल्या आरोपींना अटक केली. सहायक पोलीस निरीक्षक पवार तपास करत आहेत.