कात्रज चौकात भीषण अपघात! रस्ता ओलांडणाऱ्या दोन तरुणांना पीएमपी बसने उडवले; एकाचा मृत्यू

पुणे शहरात अपघातांच्या घटनांमध्ये दिवसेंदिवस वाढ होत असून, रस्ते अपघातांमुळे अनेकांना आपला जीव गमवावा लागत आहे. अशातच पुण्यातील कात्रज चौकात भरधाव पीएमपी बसने रस्ता ओलांडणाऱ्या दोन तरुणांना जोरदार धडक दिल्याची घटना घडली आहे.

• कात्रज चौकात भरधाव पीएमपी बसची दोघांना धडक
• २४ वर्षीय निहाल पवारचा उपचारांपूर्वीच मृत्यू
• दुसरा तरुण गंभीर जखमी; बसचालकाविरुद्ध गुन्हा दाखल

पुणे : पुणे शहरात अपघातांच्या घटनांमध्ये दिवसेंदिवस वाढ होत असून, रस्ते अपघातांमुळे अनेकांना आपला जीव गमवावा लागत आहे. अशातच पुण्यातील कात्रज चौकात भरधाव पीएमपी बसने रस्ता ओलांडणाऱ्या दोन तरुणांना जोरदार धडक दिल्याची घटना घडली आहे. या भीषण अपघातात एका २४ वर्षीय तरुणाचा मृत्यू झाला असून, दुसरा तरुण गंभीर जखमी झाला आहे. अपघातानंतर घटनास्थळी न थांबता बसचालक पसार झाल्याने त्याच्याविरुद्ध पोलिसांत गुन्हा दाखल करण्यात आला आहे.

 

निहाल विलास पवार (वय २४, रा. नारायण बिल्डिंग, कात्रज) असे मृत्यू झालेल्या तरुणाचे नाव आहे. तर रोहन उर्फ साहिल सुखदेव घोळवे (वय १८, रा. कात्रज) हा या अपघातात गंभीर जखमी झाला आहे. याप्रकरणी निहालचे वडील विलास बापू पवार (वय ५६) यांनी भारती विद्यापीठ पोलीस ठाण्यात फिर्याद दिली आहे. त्यानुसार पीएमपी बसचालक अंकुश गायकवाड याच्याविरुद्ध गुन्हा दाखल करण्यात आला आहे.

पोलिसांनी दिलेल्या माहितीनुसार, रविवारी (८ नोव्हेंबर) पहाटे साडेचारच्या सुमारास निहाल आणि रोहन हे दोघे पुणे-सातारा महामार्गावरील कात्रज चौकातून भाजी मंडईच्या दिशेने जात होते. यावेळी ते रस्ता ओलांडत असताना भरधाव वेगाने आलेल्या पीएमपी बसने दोघांना जोरदार धडक दिली. धडकेची तीव्रता इतकी होती की, दोघेही रस्त्यावर पडून गंभीर जखमी झाले.

हे सुद्धा वाचा : पुण्यात ऐन दिवाळीत गुन्हेगारीचा थरार! दोन वेगवेगळ्या घटनांत तरुणांवर शस्त्राने हल्ले; नेमकं काय घडलं?

अपघाताची माहिती मिळताच भारती विद्यापीठ पोलीस ठाण्याचे वरिष्ठ पोलीस निरीक्षक सुदर्शन गायकवाड यांनी घटनास्थळी धाव घेतली. पोलिसांनी स्थानिकांच्या मदतीने दोघांनाही तातडीने खासगी रुग्णालयात दाखल केले. मात्र, उपचार सुरू होण्यापूर्वीच निहालचा मृत्यू झाला. रोहनवर रुग्णालयात उपचार सुरू असून त्याची प्रकृती गंभीर असल्याचे सांगण्यात आले आहे. दरम्यान, अपघातानंतर बसचालक घटनास्थळी न थांबता निघून गेल्याने संताप व्यक्त केला जात आहे. या प्रकरणाचा पुढील तपास पोलीस उपनिरीक्षक वाडकर करीत आहेत.

हे सुद्धा वाचा : पुणे महापालिकेचे नवे मुख्यालय शिवाजीनगरमध्ये उभारणार? अडीच एकर जागेचा पर्याय समोर