श्री विठ्ठल रुक्मिणी मंदिर समितीचे व्यवस्थापक सक्तीच्या रजेवर; ‘हे’ आहे त्यामागचं कारण…

तसेच गोशाळेतील नवजात वासराच्या मृत्यूबाबत देखील बातमी व व्हिडिओ समाजमाध्यमांत प्रसिध्द झाला होता. त्या अनुषंगाने देखील योगेश पाठक व तानाजी जाधव यांच्यावर पंढरपूर शहर पोलीस ठाण्यात गुन्हा दाखल करण्यात आला आहे.

पंढरपूर : दर्शनरांगेतील बॅरिकेटींग कामाच्या ई-निविदेसंदर्भात प्राप्त तक्रारी व गोशाळेतील नवजात वासराच्या मृत्यूप्रकरणी चौकशीसाठी ॲड. माधवी निगडे यांच्या अध्यक्षतेखाली समिती गठीत करण्यात आली. ही समिती पुढील 8 दिवसांत चौकशी अहवाल देणार आहे. अहवाल प्राप्त झाल्यानंतर मंदिर समितीच्या सभेत पुढील योग्य ती कार्यवाही करण्यात येणार असल्याची माहिती सह अध्यक्ष गहिनीनाथ महाराज औसेकर यांनी दिली.

श्री विठ्ठल रूक्मिणी मंदिरातील कार्यालयात बुधवारी (दि.23) सह अध्यक्ष औसेकर यांच्या अध्यक्षतेखाली बैठक आयोजित करण्यात आली होती. या बैठकीस सदस्या शकुंतला नडगिरे, डॉ. दिनेशकुमार कदम, संभाजी शिंदे, ॲड. माधवी निगडे, लेखा अधिकारी मुकेश अनेचा उपस्थित होते. दर्शनरांगेतील बॅरिकेटींग कामाच्या ई-निविदेसंदर्भात प्राप्त तक्रारी व गोशाळेतील नवजात वासराच्या मृत्यूप्रकरणी चौकशी केली जाणार आहे. संबंधितांवर योग्य ती कारवाई करण्याच्या दृष्टीने मंदिर समितीच्या सदस्या ॲड. माधवी निगडे यांच्या अध्यक्षतेखाली समिती गठीत करण्यात आली.

हेदेखील वाचा : दर्शन रांगेतील मंडप ठेकेदाराकडे मागितले पैसे; CM दौऱ्यानंतर अधिकाऱ्याला पाठवलं घरी

त्यामध्ये शकुंतला नडगिरे, डॉ. दिनेशकुमार कदम, संभाजी शिंदे, ह.भ.प.ज्ञानेश्वर देशमुख जळगांवकर यांचा सदस्य पदावर समावेश करण्यात आला आहे. सदरची समिती पुढील 8 दिवसांत चौकशी करून मुख्य समितीसमोर अहवाल सादर करणार आहे. सदर चौकशी पूर्ण होऊन पुढील निर्णय होईपर्यंत व्यवस्थापक मनोज श्रोत्री यांना सक्तीच्या रजेवर पाठविण्याचा निर्णय बैठकीत घेण्यात आला आहे.

दर्शनरांगेतील बॅरिकेटिंग कामाच्या ई निविदे-संदर्भात पुरुषोत्तम सग्गम, सोलापूर यांनी आर्थिक फसवणूक झाल्याच्या तक्रारी संदर्भात समाजमाध्यमांत बातमी प्रसिध्द झाली होती व काही ऑडिओ क्लिप व्हायरल झाल्या होत्या. त्या अनुषंगाने मंदिर समितीचे व्यवस्थापक मनोज श्रोत्री यांना नोटीस बजावून खुलासा घेण्यात आला होता. तसेच गोशाळेतील नवजात वासराच्या मृत्यूबाबत देखील बातमी व व्हिडिओ समाजमाध्यमांत प्रसिध्द झाला होता. त्या अनुषंगाने देखील योगेश पाठक व तानाजी जाधव यांच्यावर पंढरपूर शहर पोलीस ठाण्यात गुन्हा दाखल करण्यात आला आहे.

संबंधितांना कारणे दाखवा नोटीस

तसेच पशुवैद्यकीय अधिकारी व तत्कालीन विभागप्रमुख डॉ. प्रशांत सर्वगोड व सध्याचे विभाग प्रमुख पांडूरंग बुरांडे यांना कारणे दाखवा नोटीस बजावण्यात आली होती. सदरच्या दोन्ही घटना मंदिर समितीने गांभीर्याने घेतल्या असून, या दोन्ही घटनांची सखोल चौकशी करुन दोषी असणाऱ्या व्यक्तींवर कठोर कारवाई करण्यात येणार असल्याचे कार्यकारी अधिकाऱ्यांनी सांगितले.