नाराज झालेल्यांना विधानसभेला उमेदवारी देतो, पण…; सतेज पाटलांचं कार्यकर्त्यांना आवाहन

कोल्हापूर महानगरपालिकेसाठी काँग्रेसमधून निवडणूक लढवण्यासाठी अनेक जण इच्छुक आहेत, अशी माहिती सतेज पाटील यांनी दिली.

• नाराज झालेल्यांना विधानसभेला उमेदवारी देतो
• महापालिकासाठी उमेदवारी मिळाली नाही तर नाराज होऊ नका
• सतेज पाटलांचं कार्यकर्त्यांना आवाहन

कोल्हापूर : महानगरपालिकेच्या निवडणुकीचा कार्यक्रम जाहीर होताच कोल्हापूर जिल्हा काँग्रेसकडून इच्छुक उमेदवारांच्या मुलाखती घेण्यात आल्या. काँग्रेस आमदार तथा जिल्हाध्यक्ष सतेज पाटील यांच्या उपस्थितीत या मुलाखती पार पडल्या. कोल्हापूर महानगरपालिकेसाठी काँग्रेसमधून निवडणूक लढवण्यासाठी अनेक जण इच्छुक आहेत. एका एका प्रभागात ४० जण इच्छुक आहेत. गेल्या पंधरा वर्षात सत्ता काळात शहरासाठी केलेल्या कामामुळे काँग्रेसवर लोकांचा आणि उमेदवारांचाही विश्वास असल्याचं सतेज पाटील यांनी सांगितले. दरम्यान, इच्छुकांची संख्या मोठी असल्याने सतेज पाटील यांनी उमदेवारांना नाराज न होण्याचे आवाहन केले आहे.

सतेज पाटील म्हणाले, जर कोणी जास्तच नाराज झाला असल्यास त्याला विधानसभेला उमेदवारी देतो, पण महापालिका निवडणुकीत उमेदवारी मिळाली नाही तरी कोणी रुसू नका, नाराज होऊ नका, पाटील यांनी अशा पद्धतीने आवाहन करताच इच्छुकांमध्ये एकच हशा पिकला. पाटील म्हणाले, थांबायला सांगितल्यानंतर तुम्हाला काहीतरी शब्द द्यावा लागणार आहे. मात्र, ज्यांना उमेदवारी मिळाली नाही त्यांनी नाराज होऊ नका, सगळेजण त्या उमेदवाराच्या पाठीशी राहा असे आवाहन त्यांनी केले.

पुढे बोलताना पाटील यांनी सांगितले की, तुमच्यातीलच इच्छुक कार्यकर्त्याला उमेदवारी मिळणार आहे. मला उमेदवारी द्या म्हणून भेटा पण कुणाला उमेदवारी देऊ नका म्हणून सांगायला भेटू नका, असे ते म्हणाले. त्यामुळे इच्छुकांची समजूत काढताना नेत्यांची दमछाक होताना दिसत आहे.

महाविकास आघाडीचाच झेंडा फडकेल

सतेज पाटील म्हणाले, केंद्रात आणि राज्यात सत्ता असताना गेल्या तीन वर्षात राज्य सरकारला कोल्हापूरसाठी ठोस असं काहीच करता आलेलं नाही. त्यामुळे कोल्हापूर महानगरपालिकेवर महाविकास आघाडीचाच झेंडा फडकेल, असा विश्वास व्यक्त केला. दुसरीकडे, वंचित बहुजन आघाडीशी काँग्रेसकडून आघाडी करण्यासाठी चर्चा सुरु असल्याची माहिती समोर आली आहे. या संदर्भात विचारणा केली असता ते म्हणाले की, राज्य पातळीवर काही चर्चा सुरू आहेत, स्थानिक पातळीवर काही लोकांच्या अड्जस्टमेंट झाल्या आहेत.