मुंबईकर आणि पुणेकरांना मान्सूनची करावी लागणार प्रतीक्षा, आता ‘या’ तारखेला होणार आगमन, विदर्भात पावसाची हजेरी

मान्सूनसाठी मुंबईकर आणि पुणेकरांना आणखी दोन दिवस वाट पाहावी लागणार आहे. विदर्भात मात्र उपराजधानीसह अमरावती, चंद्रपूर आदी जिल्ह्यांत काही ठिकाणी हलका तर काही ठिकाणी मुसळधार पावसाला सुरुवात झाली आहे.

मुंबई: मान्सूनसाठी मुंबईकर आणि पुणेकरांना आणखी दोन दिवस वाट पाहावी लागणार आहे. कारण 25 जूननंतर या दोन्ही शहरात मान्सून येणार असल्याची शक्यता हवामान खात्याने वर्तवली आहे. तर विदर्भात आज मान्सूनचं आगमन झालं आहे. मध्य महाराष्ट्रात आणि मराठवाड्यात हळुहळू पावसाचं प्रमाण वाढेल, असं सांगण्यात आलं आहे.

विदर्भात उपराजधानीसह अमरावती, चंद्रपूर आदी जिल्ह्यांत काही ठिकाणी हलका तर काही ठिकाणी मुसळधार पावसाला सुरुवात झाली आहे. त्यामुळे शेतकऱ्यांसह सर्वसामान्यांनी सुटकेचा निश्वास सोडला. पुणे, कोल्हापूर, सातारा आणि नाशिक घाट परिसरात 25 तारखेपासून यलो अलर्ट जारी करण्यात आलाय. तर 27 जूननंतर घाट परिसरात ऑरेंज अलर्ट देखील जारी करण्यात येऊ शकतो.

सिंधुदुर्गात बरसला
सिंधुदुर्गात आज पावसाने हजेरी लावली आहे. जिल्ह्यातील कणकवली, वैभववाडी, कुडाळ, सावंतवाडी तालुक्यासह काही भागात पाऊस आहे मात्र अर्ध्याहून अधिक जिल्हा पावसाच्या प्रतीक्षेत आहे. हवामान विभागाने येत्या काही तासांत तळकोकणात मान्सून सक्रिय होण्याचा अंदाज वर्तवला आहे. आज लागलेल्या या पावसाने बळीराजा आनंदीत झाला असून नियमीत पावसाकडे त्याच्या नजरा लागल्या आहेत.

पेरण्या खोळंबल्या
मान्सून लांबल्याने नांदेड जिल्ह्यातील खरिपाच्या पेरण्या खोळंबल्या आहेत. नांदेड शहरातील नवीन मोंढा बाजारात दरवर्षी या दिवसात शेतकऱ्यांची मोठी गर्दी असते. परंतु मान्सून लांबल्याने या बाजारात शुकशुकाट आहे. नवीन मोंढा बाजारात बी बियाणांची दुकाने मोठ्या प्रमाणावर आहेत. अनेक शेतकऱ्यांनी बी बियाणांची अद्याप खरेदी केली नाही. बी बियाणांची विचारपूस करून शेतकरी जात असल्याचे व्यापारी सांगत आहेत.

हवामान विभागाचं तारिख पे तारिख
हवामान विभागाने सुरुवातीला 96 टक्के पावसाचा अंदाज वर्तवला. मान्सून नेहमीप्रमाणे 1 जूनला केरळमध्ये दाखल होण्याचा अंदाज वर्तवला. मान्सून 7 जूनला कोकणात दाखल होण्याचा अंदाज वर्तवला. त्यानंतर 9 जूनपर्यंत मान्सून पुणे, मुंबईसह महाराष्ट्र व्यापेल असाही अंदाज व्यक्त करण्यात आला. मान्सून तळकोकणात 9 जूनला दाखल झाला खरा, मात्र मान्सून पुढे सरकला नाही. त्यानंतर मुंबई- पुण्यात मान्सून आगमनाची 16 जून ही नवी तारीख वर्तवण्यात आली. नंतर मान्सून आगमनाच्या तारखेत पुन्हा बदल करण्यात आला आणि 23 जून ही नवी तारीख जाहीर करण्यात आली. 23 जूनला काही ठिकाणी पावसाची हजेरी लागली. मात्र आता आणखी दोन दिवस मान्सून सक्रीय होण्याची वाट बघावी लागणार आहे.