एस.टी.महामंडळाला सुगीचे दिवस! कमावला ‘इतक्या’ कोटींचा नफा

गेली पाच ते सहा वर्ष अनेक आर्थिक संकटाचा सामना करणाऱ्या एसटी महामंडळाला भविष्यात सुगीचे दिवस येतील अशी आशा एसटी कर्मचारींच्या मनात होती. आता तीच आशा सत्यात उतरली आहे. एसटीच्या 31 पैकी 18 विभागांनी जुलै महिन्यात नफा कमावला आहे.

 

कोरोनाच्या भीषण महामारीमुळे गेल्या काही वर्षांपासून एसटी महामंडळाला तोट्याचा सामना करावा लागत होता. परंतु आता त्यांना सोन्याचे दिवस आले आहेत असे बोलल्यास काही हरकत नाही. याचे कारण म्हणजे एसटी महामंडळाला जुलै महिन्यात झालेला नफा.

जुलै महिन्यात एसटीच्या 31 विभागांपैकी 18 विभागांनी चांगला नफा कमवला आहे. या महिन्यात एसटी महामंडळाचा तोटा २२ कोटी इतका नाम मात्र झालेला आहे. यंदा एप्रिल ते जुलै, 2024 मध्ये मागील आर्थिक वर्षाच्या तुलनेत १३१ कोटी रुपयांनी तोटा कमी झाला आहे. जुलै महिन्यात नफा कमावणाऱ्या विभागांचे उपाध्यक्ष व व्यवस्थापकीय संचालक डॉ. माधव कुसेकर यांनी अभिनंदन केले असून, उर्वरित विभागांनी देखील ऑगस्ट महिन्यात प्रयत्नांची पराकाष्टा करून संपूर्ण महामंडळ फायद्यात येईल असे प्रयत्न करावे असे आवाहन केले आहे.

दोन वर्ष कोरोना महामारी आणि त्या पाठोपाठ सहा महिने कर्मचाऱ्यांचा चाललेला दीर्घकालीन संप यामुळे एस टी महामंडळ आर्थिक दृष्ट्या डबघाईला आले होते. यामुळे एसटी बंद पडते की काय? अशी अवस्था निर्माण झाली होती.

मे २०२२ पासून एसटीची सुरळीत वाहतूक सेवा सुरू झाली. तथापि, एसटीचा घटलेला प्रवासी पुनश्च एसटीकडे वळविणे हे मोठे आव्हान होते. अशावेळी राज्य शासनाने ७५ वर्षावरील ज्येष्ठांना सर्व प्रकारच्या बसमधून मोफत प्रवास व सर्व महिलांना एसटीच्या प्रवासी तिकिटात ५० टक्के सवलत या दोन योजना सुरू केल्या, की ज्यामुळे एसटीच्या प्रवासी संख्येत भरघोस वाढ झाली. सध्या 53 लाख प्रवासी एसटीतून दररोज प्रवास करीत आहेत.

याबरोबरच एसटी प्रशासनाने गेल्या वर्षभरात ” हिंदुह्रदयसम्राट बाळासाहेब ठाकरे स्वच्छ, सुंदर बस स्थानक अभियान”, विद्यार्थ्यांना शाळेत थेट पास, प्रवासी राजा दिन, कामगार पालक दिन, श्रावणात एसटी संगे तीर्थाटन, असे अनेक अभिनव उपक्रम राबविले. तसेच जे विभाग गेली कित्येक वर्ष तोट्या मध्ये आहेत, त्या विभागांना मार्गदर्शन करण्यासाठी मध्यवर्ती कार्यालयाकडून पालक अधिकाऱ्यांची नियुक्ती केली गेली. स्थानिक पातळीवर आगारनिहाय कर्मचारी व अधिकारी यांच्या बैठका घेण्यात आल्या. तोट्याच्या मार्गावरील बस फेऱ्या बंद करून, त्या ज्या मार्गावर प्रवासी जास्त आहेत तेथे वळविण्यात आल्या.

कुठल्या विभांगांनी मिळवला नफा

जुलै महिन्यामध्ये 31 विभागांपैकी 18 विभाग नफ्यामध्ये आले आहेत. त्यापैकी जालना (3.34 कोटी), अकोला (3.14 कोटी), धुळे (3.7 कोटी), परभणी (2.98 कोटी), जळगाव (2.40 कोटी), बुलढाणा (2.33 कोटी) या ‍विभागांनी 2 कोटी पेक्षा जास्त नफा कमावला आहे.