पैसे भरले, अर्ज केला; तरीही घर नावावर नाही! गोरेगावच्या मोरारजी मिल म्हाडा संकुलातील रहिवासी वर्षभरापासून न्यायाच्या प्रतीक्षेत

 गोरेगाव येथील मोरारजी मिल म्हाडा संकुल 1 बी सहकारी गृहनिर्माण संस्थेत रूम नंबर 1811 खरेदी करून आवश्यक प्रक्रिया पूर्ण केल्यानंतरही वर्षभराहून अधिक काळ घर नावावर झाले नसल्याचा आरोप रहिवाशी प्रियांका पराग सुकी यांनी केला आहे.

• घर 1811 चे, NOC मात्र 1510 ची
• गोरेगावच्या मोरारजी मिल म्हाडा संकुलातील रहिवासी वर्षभरापासून न्यायाच्या प्रतीक्षेत
• मोरारजी मिल म्हाडा संकुलातील रहिवाशाचा गंभीर आरोप

प्रत्येकाचे स्वप्न असते की एखाद्या जागेची मालकी असावी आणि त्याला आपले घर म्हणावे. हे जितके सोपे वाटेल तितकेच हा प्रवास आव्हानात्मक आहे. अशीच एक घटना गोरेगावमधील मोरारजी मिल म्हाडा संकुल 1 बी सहकारी गृहनिर्माण संस्थेतून समोर आली आहे. गोरेगावमधील मोरारजी मिल म्हाडा संकुल 1 बी सहकारी गृहनिर्माण संस्था मर्यादित येथे घर खरेदी केल्यानंतर आवश्यक प्रक्रिया पूर्ण करूनही वर्षभराहून अधिक काळ घर नावावर झाले नसल्याचा आरोप रहिवासी प्रियांका पराग सुकी यांनी केला आहे. सोसायटीकडे सातत्याने पाठपुरावा करूनही प्रश्न सुटत नसल्याने न्यायालयाच्या फेऱ्या माराव्या लागत असल्याचे त्यांचे म्हणणे आहे.

प्रियांका सुकी यांनी दिलेल्या माहितीनुसार, 21 मार्च 2025 रोजी घर हस्तांतरणाची प्रक्रिया सुरू करण्यात आली. त्यासाठी सोसायटीकडे आवश्यक अर्ज करण्यात आला आणि 25 हजार रुपयांचा चेकही देण्यात आला. सुकी यांनी रूम नंबर 1811 खरेदी केला आहे. मात्र, त्यांना रूम नंबर 1811 ऐवजी रूम नंबर 1510 ची NOC देण्यात आल्याचा आरोप त्यांनी केला आहे. ही चुकीची NOC मुद्दाम देण्यात आल्याचा दावाही त्यांनी केला आहे.’

Tukaram Mundhe: हॉटेल-दूध डेअरीनंतर FDA च्या रडारवर बेबी फूड; नियम मोडणाऱ्या उत्पादकांवर कारवाईचा इशारा

आवश्यक व्यवहार आणि कागदपत्रांची प्रक्रिया करूनही मार्च 2025 पासून सप्टेंबर 2026 पर्यंत रूम नंबर 1811 त्यांच्या नावावर हस्तांतरित झालेली नसल्याचे सुकी यांचे म्हणणे आहे. या कालावधीत योग्य NOC मिळवण्यासाठी तसेच घर हस्तांतरणाची प्रक्रिया पूर्ण करण्यासाठी सोसायटीसोबत वारंवार पत्रव्यवहार आणि पाठपुरावा करण्यात आल्याचे त्यांनी सांगितले. प्रश्न मार्गी लागत नसल्याने गेल्या वर्षभरापासून न्यायालयीन प्रक्रियेलाही सामोरे जावे लागत असल्याचा दावा सुकी यांनी केला आहे. वारंवार पाठपुरावा आणि कोर्टाच्या फेऱ्यांनंतरही प्रकरणाचा अंतिम तोडगा निघालेला नसल्याने आर्थिक आणि मानसिक त्रास सहन करावा लागत असल्याचे त्यांचे म्हणणे आहे.

याशिवाय, इमारतीतील कार्यकारी अधिकाऱ्याकडून आपल्याला मानसिक त्रास दिला जात असल्याचाही आरोप प्रियांका सुकी यांनी केला आहे. घर खरेदी केल्यानंतर आवश्यक रक्कम भरून आणि प्रक्रिया पूर्ण करूनही मालकी हस्तांतरण का रखडले, तसेच रूम नंबर 1811 ऐवजी 1510 ची NOC का देण्यात आली, याबाबत त्यांनी प्रश्न उपस्थित केले आहेत. या संपूर्ण प्रकरणाची संबंधित यंत्रणांनी दखल घेऊन योग्य चौकशी करावी आणि घर हस्तांतरणाची प्रक्रिया तातडीने पूर्ण करून न्याय द्यावा, अशी मागणी प्रियांका सुकी यांनी केली आहे.

तसेच याप्रकरणी नवराष्ट्रकडून गोरेगावच्या मोरारजी मिल म्हाडा संकुल सोसायटीचे अध्यक्षांना संपर्क साधण्याचा प्रयत्न केला, मात्र कोणताही प्रतिसाद मिळाला नाही.

Mumbai News: सचिन वाझेंच्या जामिनावर कोर्टाचा निर्णय; अँटिलिया प्रकरणातील साडेपाच वर्षांचा कारावास