
Child Marriage Free India Pledge Campaign
संयुक्त राष्ट्र महासभेने २७ नोव्हेंबर हा ‘बालविवाह व सक्तीचे विवाह निर्मूलन आंतरराष्ट्रीय दिवस’ म्हणून घोषित केला आहे. त्यानिमित्त केंद्र शासनाच्या ‘बालविवाह मुक्त भारत’ मोहिमेंतर्गत राज्यात १८ ते २७ नोव्हेंबर २०२६ या कालावधीत ‘बालहक्क सप्ताह’ आणि विशेष जनजागृती अभियान राबविण्यात येत आहे.
मुंबई शहर जिल्ह्यात बालविवाहाच्या घटनांना आळा घालण्यासाठी प्रशासनाकडून विशेष जनजागृती मोहीम राबविण्यात येत आहे. बालकांचे शिक्षण, आरोग्य आणि भविष्य सुरक्षित ठेवण्याच्या उद्देशाने आयोजित कार्यक्रमात विविध शासकीय विभाग, स्वयंसेवी संस्था आणि बालगृहांच्या प्रतिनिधींनी बालविवाहमुक्त मुंबईसाठी एकत्रित प्रयत्न करण्याचा संकल्प केला. बालविवाह प्रतिबंधक कायद्याची प्रभावी अंमलबजावणी करण्यासोबतच नागरिकांनीही या सामाजिक समस्येविरोधात पुढाकार घ्यावा, असे आवाहन करण्यात आले.
‘बालहक्क सप्ताह’ आणि ‘बालविवाह मुक्त भारत’ मोहिमेंतर्गत जिल्हा महिला व बाल विकास अधिकारी कार्यालय, जिल्हा बाल संरक्षण कक्ष आणि चाइल्ड हेल्पलाईन १०९८ यांनी मुंबई सेंट्रल येथील वायएमसीए येथे १९ नोव्हेंबर रोजी ‘बालविवाह प्रतिबंधक शपथ’ कार्यक्रम आयोजित केला. यावेळी जिल्हा महिला व बाल विकास अधिकारी शोभा शेलार यांनी बालविवाह प्रतिबंधक अधिनियम, २००६ च्या प्रभावी अंमलबजावणीचे महत्व स्पष्ट केले.
कार्यक्रमात शासकीय अधिकारी-कर्मचारी, चाइल्ड हेल्पलाईनचे प्रतिनिधी, विविध बालगृहे आणि संस्थांचे प्रतिनिधी आणि स्वयंसेवी संस्थांच्या प्रतिनिधींनी बालविवाह रोखण्याची तसेच मुंबई शहर जिल्हा ‘बालविवाहमुक्त’ करण्याची सामूहिक शपथ घेतली.
आयोजकांनी नागरिक आणि संस्थांना https://stopchildmarriage.wcd.gov.in या केंद्र शासनाच्या अधिकृत पोर्टलवर ऑनलाइन प्रतिज्ञा घेण्याचे आवाहन केले. काळजी आणि संरक्षणाची गरज असलेल्या बालकांसाठी चाइल्ड हेल्पलाईन १०९८ ही मोफत आपत्कालीन सेवा चोवीस तास उपलब्ध असून, बालविवाहाची घटना निदर्शनास आल्यास नागरिकांनी या क्रमांकावर तातडीने संपर्क साधावा, असे आवाहन करण्यात आले.
यावेळी जिल्हा महिला व बाल विकास अधिकारी शोभा शेलार, जिल्हा बाल संरक्षण कक्षाचे अधिकारी व कर्मचारी, चाइल्ड हेल्पलाईन १०९८ चे प्रतिनिधी, मुंबई शहर जिल्ह्यातील विविध बालगृहे आणि संस्थांचे प्रतिनिधी आणि स्वयंसेवी संस्थांचे प्रतिनिधी उपस्थित होते.
Ans: राज्यात १८ ते २७ नोव्हेंबर २०२६ या कालावधीत बालहक्क सप्ताह आणि विशेष जनजागृती अभियान राबविण्यात येत आहे.
Ans: मुंबई सेंट्रल येथील वायएमसीए येथे १९ नोव्हेंबर रोजी हा कार्यक्रम आयोजित करण्यात आला.
Ans: बालविवाहाची घटना आढळल्यास नागरिकांनी चाइल्ड हेल्पलाईन १०९८ या मोफत क्रमांकावर संपर्क साधावा.