Mumbai Crime News: विश्वासघातकी कर्मचारी निघाले चोर! दिवाळी साफसफाईसाठी बोलावलेल्या तरुणांनी साफ केले महिलेचे कपाट!

Mumbai Crime News: दिवाळीच्या साफसफाईसाठी ऑनलाईन ॲपवरून होम क्लिनिंग सर्व्हिस बोलावणे एका महिलेला चांगलेच महागात पडले. मालाड पश्चिम येथील घरातून साफसफाईच्या बहाण्याने १२ लाखांचे सोन्या-चांदीचे दागिने चोरणाऱ्या तीन कर्मचाऱ्यांना मालाड पोलिसांनी बेड्या ठोकल्या असून संपूर्ण मुद्देमाल हस्तगत केला आहे.

• ऑनलाईन कामगारांनी साफसफाईदरम्यान १२ लाखांचे दागिने लांबवले
• मालाड पोलिसांनी तांत्रिक तपासाने तिघांना बेड्या ठोकल्या
• पोलिसांनी सर्व ऐवज पूर्णपणे हस्तगत केला

Mumbai Crime News: दिवाळीच्या साफसफाईसाठी ऑनलाईन ॲपद्वारे होम क्लिनिंग सर्व्हिस बूक करणे एका ५२ वर्षीय महिलेला चांगलेच महागात पडले आहे. घराची साफसफाई करण्यासाठी आलेल्या कर्मचाऱ्यांनीच संधी साधून घरातील सोन्या-चांदीचे दागिने लांबवल्याची खळबळजनक घटना मालाड पश्चिम परिसरात घडली आहे. याप्रकरणी मालाड पोलिसांनी तांत्रिक तपासाची चक्रे वेगाने फिरवत अवघ्या काही दिवसांत तीन आरोपींना बेड्या ठोकल्या आहेत, तसेच त्यांच्याकडून चोरीला गेलेला संपूर्ण मुद्देमाल हस्तगत करण्यात यश मिळवले आहे.

हेही वाचा: Mumbai Nurse Suicide Case: पती डॉक्टर, पत्नी नर्स अन् संसारात तिसरीची एन्ट्री! मुंबईतील खळबळजनक प्रकरण उघड…

नेमकी काय घडली घटना?

मालाड पश्चिम येथे राहणाऱ्या ५२ वर्षीय महिलेने दिवाळीनिमित्त घराची साफसफाई करण्यासाठी ‘होम ट्रँगल’ या ऑनलाईन ॲपवरून होम क्लिनिंग सर्व्हिस बूक केली होती. या सर्व्हिसनुसार चार कर्मचारी त्या महिलेच्या घरी साफसफाईचे काम करण्यासाठी आले होते. हे कर्मचारी काम संपवून निघून गेल्यानंतर दुसऱ्या दिवशी संबंधित महिलेने बेडरूममधील कपाटात ठेवलेले दागिने तपासले असता, तिच्या पायाखालची जमीनच सरकली.

कपाटातील ५० ग्रॅम वजनाचा सोन्याचा नेकलेस, १० ग्रॅम वजनाचे मंगळसूत्र, सोन्याचे बिस्किट आणि ५०० ग्रॅम वजनाची चांदीची वीट असा एकूण अंदाजे १२ लाख रुपयांचा ऐवज गायब असल्याचे तिच्या निदर्शनास आले. यानंतर घाबरलेल्या महिलेने तात्काळ मालाड पोलीस ठाण्यात जाऊन अज्ञात चोरांविरोधात चोरीची तक्रार दाखल केली.

हेही वाचा: Mugdha Murder Mystery: घरच्यांपासून लपवून गहुंजेच्या आलिशान सोसायटीत वास्तव्य; लंडनहून आलेल्या तरुणीचा दुर्दैवी अन् रहस्यमय अंत!

पोलिसांची धडक कारवाई; पालघर-वसईतून आरोपी जेरबंद

तक्रार दाखल झाल्यानंतर मालाड पोलिसांच्या पथकाने तांत्रिक तपासाच्या आधारे होम क्लिनिंगसाठी आलेल्या कर्मचाऱ्यांची माहिती गोळा केली. तपासादरम्यान संबंधित आरोपी वारंवार आपले मोबाईल फोन बंद करून वेगवेगळ्या ठिकाणी लपून बसत असल्याचे पोलिसांच्या लक्षात आले, ज्यामुळे संशय बळावला.

मालाड पोलीस ठाण्याचे पोलीस उपनिरीक्षक अमर शिंदे आणि गुन्हे प्रकटीकरण पथकाने तपासाची चक्रे वेगाने फिरवत नालासोपारा, वसई आणि पालघर परिसरातून दोन आरोपींना ताब्यात घेतले, तर मुख्य आरोपीला बोईसर येथून पकडण्यात आले. सखोल चौकशीदरम्यान सत्यम राजेश शुक्ला (२६), अनिश ब्रिजभूषण चौरसिया (१८) आणि पवन ओमप्रकाश धीवर उर्फ राहुल गौड (२६) या तिघांनीच मिळून हा चोरीचा कट रचल्याचे निष्पन्न झाले. पोलिसांनी तिन्ही आरोपींना अटक केली असून त्यांच्याकडून चोरीला गेलेला १०० टक्के मुद्देमाल यशस्वीरित्या हस्तगत केला आहे. या प्रकरणी मालाड पोलीस ठाण्यात भारतीय न्याय संहितेच्या कलम ३०५(अ) आणि ३(५) अन्वये गुन्हा नोंदवण्यात आला आहे.