Auto Rickshaw Theft: चोरीची रिक्षा अन्‌ चोरांचा धागादोरा नव्हता, मात्र ‘तांत्रिक विश्लेषणाने’ कुळगाव पोलिसांनी केले जेरबंद!

Auto Rickshaw Theft: वांगणीतून चोरीला गेलेल्या ऑटोरिक्षाचा कुळगाव पोलिसांनी अवघ्या आठ दिवसांत छडा लावलाय. या प्रकरणी दोन आरोपींना उल्हासनगरातून अटक करण्यात आली असून, चोरीस गेलेली ऑटोरिक्षाही पोलिसांनी हस्तगत केली आहे. तांत्रिक विश्लेषणाच्या आधारे पोलिसांनी ही यशस्वी कारवाई केली.

• वांगणीतून चोरलेली ऑटोरिक्षा कुळगाव पोलिसांनी ८ दिवसांत शोधली
• तांत्रिक तपासाद्वारे उल्हासनगरातून दोन आरोपींना बेड्या ठोकल्या
• वरिष्ठ पोलिसांच्या मार्गदर्शनाखाली ही कारवाई करण्यात आली

Auto Rickshaw Theft: वांगणी परिसरातून चोरीला गेलेल्या एका ऑटोरिक्षाचा कुळगाव पोलिसांनी अत्यंत कौतुकास्पद कामगिरी करत अवघ्या आठ दिवसांत छडा लावला आहे. या प्रकरणी तांत्रिक तपासाच्या आधारे पोलिसांनी उल्हासनगर शहरातून दोन आरोपींना अटक केली असून, चोरीस गेलेली ऑटोरिक्षाही यशस्वीरित्या हस्तगत केली आहे.

नेमकी घटना काय घडली?

पोलिसांनी दिलेल्या माहितीनुसार, २२ ऑक्टोबर रोजी वांगणी रेल्वे स्टेशन परिसरातून एका ५५ वर्षीय रिक्षाचालकाची एमएच ०५ सीजी १२५० (MH 05 CG 1250) क्रमांकाची ऑटोरिक्षा चोरीला गेली होती. याप्रकरणी पीडित रिक्षाचालकाने कुळगाव पोलीस ठाण्यात फिर्याद दिली होती, ज्यावरून अज्ञात चोराविरुद्ध गुन्हा दाखल करण्यात आला होता. वाहनचोरीच्या या वाढत्या घटना लक्षात घेता, कुळगाव पोलिसांनी तपासाची चक्रे वेगाने फिरवली. सुरुवातीला चोरांचा कोणताही ठोस पुरावा किंवा सीसीटीव्ही फुटेज उपलब्ध नसतानाही, पोलिसांनी तांत्रिक विश्लेषणाच्या (Technical Analysis) मदतीने तपास सुरू ठेवला. मोबाईल लोकेशन आणि इतर तांत्रिक पुराव्यांच्या आधारे पोलिसांना महत्त्वाचे धागेदोरे मिळाले.

हेही वाचा:Mumbai Crime News: विश्वासघातकी कर्मचारी निघाले चोर! दिवाळी साफसफाईसाठी बोलावलेल्या तरुणांनी साफ केले महिलेचे कपाट!

उल्हासनगरातून आरोपींना अटक; रिक्षा जप्त

कुळगाव पोलिसांच्या गुन्हे प्रकटीकरण पथकाने (डीबी) तांत्रिक माहितीच्या आधारे उल्हासनगर शहरात धाड टाकली. उल्हासनगरातील लालचक्की, खडी मशीन परिसरातील एका गुन्ह्यात अनमोल ऊर्फ स्वामी याच्यासह आणखी एका आरोपीला पोलिसांनी बेड्या ठोकल्या. त्यांची अधिक चौकशी केली असता, त्यांनी वांगणीतून ऑटोरिक्षा चोरी केल्याची कबुली दिली. पोलिसांनी आरोपींकडून चोरीस गेलेली ‘MH 05 CG 1250’ क्रमांकाची ऑटोरिक्षा जप्त केली आहे. अवघ्या ८ दिवसांत वाहनचोरीच्या गुन्ह्याचा पर्दाफाश केल्याने कुळगाव पोलिसांच्या कामगिरीचे सर्वत्र कौतुक होत आहे.

कोणाच्या मार्गदर्शनाखाली झाली कारवाई?

ही यशस्वी कारवाई ठाणे ग्रामीण पोलीस अधीक्षक विनायककुमार राठोड, अपर पोलीस अधीक्षक अनमोल मित्तल आणि मुरबाड विभागाचे उपविभागीय पोलीस अधिकारी अनिल लाड यांच्या थेट मार्गदर्शनाखाली करण्यात आली. कुळगाव पोलीस ठाण्याचे प्रभारी अधिकारी शिवाजी दळवे, पोलीस उपनिरीक्षक प्रशांत चव्हाण यांच्या नेतृत्वाखालील पथकाने या तपासात महत्त्वाची भूमिका बजावली. या गुन्ह्याचा पुढील तपास पोलीस नाईक संदीप शिंदे हे करत आहेत.

हेही वाचा:Mumbai Nurse Suicide Case: पती डॉक्टर, पत्नी नर्स अन् संसारात तिसरीची एन्ट्री! मुंबईतील खळबळजनक प्रकरण उघड…