saatrasta BIT
Mumbai News : सातरस्ता येथील बी.आय.टी. (BIT) चाळीच्या रखडलेल्या पुनर्विकासावरून शिवसेना (शिंदे गट) नगरसेविका संध्या दोषी यांनी मुंबई महानगरपालिकेत इस्टेट विभागाच्या (मालमत्ता विभाग) अधिकाऱ्यांवर आणि विकासकांवर जोरदार हल्लाबोल केला. विकासक आनंद विलायनूर आणि जैसल अजमेरा यांनी पालिका अधिकाऱ्यांशी संगनमत करून ३२४ मराठी कुटुंबांना १३ वर्षांपासून बेघर ठेवल्याचा व त्यांची आर्थिक फसवणूक केल्याचा गंभीर आरोप त्यांनी केला आहे. न्याय न मिळाल्यास आगामी नवरात्रीत रहिवाशांसोबत उपोषणाला बसण्याचा इशाराही त्यांनी दिला.
सभागृहात उपस्थित केलेल्या हरकतीच्या मुद्द्यामध्ये संध्या दोषी यांनी निदर्शनास आणून दिले की, बी.आय.टी. चाळ क्र. १ ते ४ च्या पुनर्विकासाचे काम ‘आनंद विल्लनूर’ या विकासकाकडे आहे. गेल्या १३ वर्षांपासून हा प्रकल्प रखडला असून, विकासकाने ३२४ भाडेकरूंना हक्काची घरे दिलेली नाहीत. शिवाय, त्यांचे ३८ कोटी रुपयांचे मासिक भाडे आणि १५.७ कोटी रुपयांचा कॉर्पस फंडही बुडवला आहे.
सोसायटीला ४ हजार चौरस फुटांची जागा देण्याचे आश्वासन पाळले नसून २५२ रहिवाशांचे रजिस्ट्रेशनही केलेले नाही. विकासकाने इस्टेट विभागातील अधिकाऱ्यांशी संगनमत करून इमारतीच्या आराखड्यात बेकायदेशीर बदल केले आहेत. २०१३ ते २०२३ अशी एल.ओ.आय. (LOI) ची मुदत संपलेली असतानाही अधिकाऱ्यांना अंधारात ठेवून त्याने बेकायदेशीर मान्यता मिळवली. विशेष म्हणजे, ७ मे २०२५ रोजी उच्च न्यायालयाने स्थगिती देऊनही प्रशासनाने विकासकाचा एल.ओ.आय. रद्द केला नाही.
या बेकायदेशीर कारभाराला पुढे नेत, रहिवाशांची कोणतीही संमती न घेता आनंद विल्लनूरने ‘अजमेरा’ या दुसऱ्या विकासकासोबत बेकायदेशीर करारनामा (Joint Venture) केला. या दोन्ही विकासकांनी मिळून पुनर्विकसित इमारतीमधील ९६ घरांची बेकायदेशीरपणे परस्पर विक्री केल्याचा धक्कादायक प्रकार दोषी यांनी उघडकीस आणला. आनंद विल्लनूर याच्यावर वडाळा येथील ‘स्काय ३१’ इमारतीच्या रहिवाशांनी १०० कोटींच्या घोटाळ्याप्रकरणी आर्थिक गुन्हा दाखल केला असून, उच्च न्यायालयाने त्याला ‘वॉन्टेड’ (फरार) घोषित केले आहे. अशा गुन्हेगारी पार्श्वभूमीच्या विकासकाला पालिका प्रशासन पाठीशी घालत असल्याचा संताप दोषी यांनी व्यक्त केला.
हक्काची मागणी करणाऱ्या रहिवाशांवर खोटे एफ.आय.आर. (FIR) दाखल केले जात असून, त्यांच्या नोकरीच्या ठिकाणी चुकीची माहिती देऊन त्यांना कामावरून काढण्यास प्रवृत्त करण्यासारखे नीच पातळीवरचे राजकारण बिल्डरकडून सुरू असल्याचे त्या म्हणाल्या.
या ३२४ मराठी कुटुंबांना न्याय न मिळाल्यास येणाऱ्या नवरात्रीत त्यांच्यावर उपोषणाची वेळ आली, तर मी स्वतः त्यांच्यासोबत दालनाबाहेर उपोषणाला बसेन, असा कडक इशारा संध्या दोषी यांनी प्रशासनाला दिला. या गंभीर प्रकरणाची तत्काळ दखल घेत, महापौर रितू तावडे यांनी प्रशासनाला या प्रकरणी सखोल चौकशी करून योग्य ती कारवाई करण्याचे कडक आदेश दिले आहेत. तसेच, जोपर्यंत या प्रकरणाचा सविस्तर अहवाल सभागृहात सादर केला जात नाही, तोपर्यंत संध्या दोषी यांचा हरकतीचा मुद्दा राखून ठेवण्याचे निर्देशही महापौरांनी प्रशासनाला दिले.
.png "Videos"){kind=small}
