Mumbai News : शिवाजी पार्कमध्ये दिवाळी पहाट रंगली! 10 हजारांहून अधिक रसिकांची उपस्थिती; दुष्काळग्रस्तांसाठी 2.15 कोटींची मदत

Mumbai News : मुंबईच्या शिवाजी पार्कमध्ये सुगी ग्रुपच्या दिवाळी पहाट कार्यक्रमाला 10 हजारांहून अधिक रसिकांनी हजेरी लावली. राहुल देशपांडे, संकर्षण कऱ्हाडे आणि प्राजक्ता शुक्रे यांच्या सादरीकरणाने पहाट रंगली. विशेष म्हणजे महाराष्ट्रातील दुष्काळग्रस्त शेतकरी आणि नागरिकांसाठी तब्बल 2 कोटी 15 लाख रुपयांची मदत जाहीर करण्यात आली.

• शिवाजी पार्कमध्ये सुगीच्या दिवाळी पहाटेला रसिकांची तुफान गर्दी
• महाराष्ट्रातील दुष्काळग्रस्तांसाठी 2.15 कोटींची मदत
• पाच सामाजिक संस्थांना निधीचं वाटप

 

मुंबई : दिवाळीची पहाट, सुरेल संगीत आणि त्याला सामाजिक बांधिलकीची जोड… असा सुंदर योग यंदा मुंबईतील शिवाजी पार्कमध्ये पाहायला मिळाला. सुगी ग्रुपच्या वतीने आयोजित करण्यात आलेल्या ‘दिवाळी पहाट‘ कार्यक्रमाला तब्बल 10 हजारांहून अधिक रसिकांनी उपस्थिती लावत भरभरून प्रतिसाद दिला. विशेष म्हणजे, या सांगीतिक सोहळ्यातून महाराष्ट्रातील दुष्काळग्रस्त शेतकरी आणि गरजू नागरिकांसाठी तब्बल 2 कोटी 15 लाख रुपयांची मदत जाहीर करण्यात आली. (Mumbai News)

राहुल देशपांडे यांच्या सुरांनी रसिक मंत्रमुग्ध

दादर येथील ऐतिहासिक छत्रपती शिवाजी महाराज पार्कमध्ये पार पडलेल्या या कार्यक्रमात प्रसिद्ध शास्त्रीय गायक राहुल देशपांडे यांनी आपल्या सुरेल गायनाने वातावरण भारावून टाकलं. अभिनेता आणि सूत्रसंचालक संकर्षण कऱ्हाडे यांनीही आपल्या खास शैलीत कार्यक्रमात रंगत आणली. गायिका प्राजक्ता शुक्रे यांच्या सादरीकरणाला रसिकांनी उत्स्फूर्त दाद दिली. अभि मुंडे यांच्या काव्यसादरीकरणाने कार्यक्रमाला वेगळीच उंची मिळाली. अभिनेते स्वप्नील जोशी आणि मकरंद अनासपुरे यांचीही यावेळी विशेष उपस्थिती होती.

दुष्काळग्रस्तांसाठी 2 कोटी 15 लाखांची मदत

कार्यक्रमाचं आणखी एक वैशिष्ट्य म्हणजे सामाजिक कार्यासाठी जाहीर करण्यात आलेला मोठा निधी. सुगी ग्रुपने एकूण 2 कोटी 15 लाख रुपयांची मदत जाहीर केली आहे.

Diwali : रुग्णालयाच्या आवारातही फुलवला दिवाळीचा आनंद; 400 जणांना फराळ, 75 महिलांना साड्या

या निधीचं वाटप पाच संस्थांना करण्यात येणार आहे.

• परिजात फाउंडेशन – 51 लाख रुपये
• नाम फाउंडेशन – 51 लाख रुपये
• ग्राम मंगल – 51 लाख रुपये
• सरस्वती देवी विद्या विकास ट्रस्ट – 51 लाख रुपये
• महाजप फाउंडेशन – 11 लाख रुपये

‘शेतकरी आहेत म्हणून आपण आहोत’, निशांत देशमुख यांचं आवाहन

सुगी ग्रुपचे संस्थापक निशांत देशमुख यांनी महाराष्ट्रातील दुष्काळी परिस्थितीबाबत चिंता व्यक्त केली. पाण्याची टंचाई आणि शेतकऱ्यांवरील कर्जाचा वाढता भार पाहता पुढील आठ महिने आव्हानात्मक असतील, असं त्यांनी सांगितलं.
शेतकरी आहेत म्हणून आपण आहोत. त्यामुळे समाजातील प्रत्येकाने शेतकऱ्यांच्या मदतीसाठी पुढे यावं, असं भावनिक आवाहनही त्यांनी केलं.

एकीकडे संगीताचा आनंद आणि दुसरीकडे गरजूंसाठी मदतीचा हात, अशा दुहेरी उद्देशामुळे सुगीची यंदाची दिवाळी पहाट मुंबईकरांसाठी खास ठरली.

Mangal Prabhat Lodha : आरेतील आदिवासींसोबत मंगलप्रभात लोढांनी साजरी केली दिवाळी; फराळ वाटप करत घेतला, तारपा नृत्याचा आनंद