1 तासाचा प्रवास 20 मिनिटांत! मेट्रो ३ चा पहिला टप्पा लवकरच होणार सुरू; जाणून घ्या तिकीट दर, वेळापत्रक अन् थांबे

Mumbai Metro Aqua Line : मुंबई मेट्रो रेल कॉर्पोरेशन (MMRC) लवकरच आरे ते BKC दरम्यान मेट्रो-3 कॉरिडॉरची सेवा सुरू करू शकते. हा प्रवास अवघ्या 22 मिनिटांत पूर्ण होईल, ज्याला सध्या एक तास लागतो. पहिल्या टप्प्यात 12.44 किलोमीटरच्या मार्गावर दररोज 96 फेऱ्या धावणार आहेत. याचे भाडे 10 ते 50 रुपयांपर्यंत असेल.

मुंबईतील भुयारी मेट्रोने प्रवास करण्याची अनेक वर्षांपासूनची प्रवाशांची प्रतीक्षा लवकरच संपुष्टात येणार आहे. बहुप्रतिक्षित असणारी भुयारी मेट्रो लवकरच प्रवाशांच्या सेवेत दाखल होणार आहे. मुंबई मेट्रो रेल कॉर्पोरेशन (MMRC) च्या एमडी अश्विनी भिडे यांच्या मते, आरे ते बीकेसी दरम्यान मेट्रो-3 कॉरिडॉरची सेवा ऑक्टोबरच्या पहिल्या आठवड्यात सुरू होऊ शकते. पहिल्या टप्प्यातील सेवा सुरू झाल्यानंतर आरे ते बीकेसी हा प्रवास अवघ्या 22 मिनिटांत पूर्ण करणे शक्य होणार आहे. सध्या हा प्रवास पूर्ण करण्यासाठी एक तास लागतो. या मार्गावरील तिकीटाचे दर, वेळापत्रक आणि थांबे काय असणार ते जाणून घ्या…

आरे आणि बीकेसी दरम्यानच्या सर्व 9 मेट्रो स्थानकांचे बांधकाम जवळपास पूर्ण झाले आहे. पहिल्या टप्प्यातील 12.44 किमी मार्गावर दररोज 96 मेट्रो फेऱ्या धावतील. सकाळी 6.30 ते रात्री 10.30 या वेळेत प्रवाशांसाठी मेट्रो सेवा उपलब्ध असेल.

तिकीटाचे दर

या मार्गावर दर 6.30 मिनिटांनी ट्रेनची सुविधा उपलब्ध असेल. एकदा संपूर्ण मार्गावर सेवा सुरू झाल्यानंतर, 6 मिनिटांचा कालावधी सुमारे 3 मिनिटांपर्यंत कमी होईल. मेट्रो-3 च्या पहिल्या टप्प्यात प्रवास करण्यासाठी प्रवाशांना 10 ते 50 रुपये मोजावे लागणार आहेत. या संपूर्ण मार्गावरून प्रवास करण्यासाठी प्रवाशांना सुमारे 70 रुपये खर्च करावे लागणार आहेत. मार्च 2025 पर्यंत संपूर्ण मार्गावर मेट्रो सेवा सुरू करण्याच्या योजनेवर काम सुरू आहे.अश्विनी भिडे यांच्या मते, मेट्रो रेल्वे सेफ्टी बोर्ड (CMRS) पहिल्या टप्प्यातील रोलिंग स्टॉकची तपासणी प्रक्रिया पूर्ण झाली आहे. स्थानकांसाठी सीएमआरएस प्रमाणपत्र मिळविण्यासाठी कागदपत्रे तयार केली जात आहेत.

भुयारीत पाणी साचणार नाही

तसेच गेल्या 100 वर्षांतील पावसाचा अभ्यास करून मेट्रो-3 भुयारी बांधण्यात आला आहे. अभ्यासानुसार पाण्याचा निचरा करण्याची व्यवस्था करण्यात आली आहे. मुंबईत मुसळधार पाऊस असूनही मेट्रोपर्यंत पाणी पोहोचणार नाही. मेट्रो-3 कॉरिडॉर शहरातील अनेक महत्त्वाच्या संकुलांजवळून जाणार आहे. एकदा संपूर्ण मार्ग कार्यान्वित झाल्यानंतर, सुमारे 6.30 लाख वाहने रस्त्यावरून कमी होण्याची अपेक्षा आहे. मेट्रो-1 आणि मेट्रो-7च्या जोडणीमुळे इतर मेट्रो मार्गांवरून प्रवास करणाऱ्या प्रवाशांचा प्रवासही सुकर होणार आहे.

लास्ट माईल कनेक्टिव्हिटी

मेट्रो-3 मधून दररोज लाखो प्रवासी प्रवास करतील, असा अंदाज आहे. अशा स्थितीत मेट्रो स्थानकातून बाहेर पडल्यानंतर प्रवाशांना त्यांच्या इच्छित स्थळी नेण्यासाठी मेट्रो स्थानकाजवळ बेस्ट बस आणि ऑटो टॅक्सी स्टँड तयार करण्याचे नियोजन सुरू आहे. भिडे यांच्या म्हणण्यानुसार प्रत्येक स्थानकावर बससेवा देण्यासाठी बेस्टशी चर्चा सुरू आहे.