राज्यातील वातावरणात होतोय बदल; विदर्भासह मराठवाड्यात पावसाची शक्यता (फोटो- ai gemini)
मुंबई : गेल्या काही दिवसांपासून वातावरणात कमालीचा बदल पाहिला मिळत आहे. त्यातच महाराष्ट्रात सध्या हवामानाचे संमिश्र चित्र पाहायला मिळत आहे. राज्याच्या काही भागांत थंडीचा कडाका वाढला असताना, दिवसा मात्र उन्हाचा चटका जाणवत आहे. त्यातच बंगालच्या उपसागरात शक्तिशाली चक्रीवादळ निर्माण होण्याची शक्यता असून, ते २० नोव्हेंबरच्या रात्री आंध्र प्रदेशच्या किनारपट्टीवर धडकण्याचा प्राथमिक अंदाज आहे. या चक्रीवादळाचा महाराष्ट्रावर थेट परिणाम होण्याची शक्यता नसली, तरी हवामानात बदल होऊ शकतो.
हवामान विभागाच्या अंदाजानुसार, १९ ते २२ नोव्हेंबरदरम्यान विदर्भ आणि मराठवाड्यातील अनेक भागांत जोरदार वारे, विजांच्या कडकडाटासह हलका ते मध्यम पाऊस पडण्याची शक्यता आहे. चक्रीवादळामुळे वाऱ्यांची दिशा आणि हवामान बदलण्याची शक्यता आहे. त्यामुळे चक्रीवादळानंतर राज्यातील थंडीचा प्रभाव काहीसा कमी होऊ शकतो. दरम्यान, राज्यातील दुष्काळाचे संकट कायम असून, महिनाभरातील हे तिसरे चक्रीवादळ ठरणार आहे. मात्र, पाणीटंचाईची समस्या कायम असून, नोव्हेंबरमध्ये दुष्काळाची तीव्रता आणखी वाढण्याची भीती व्यक्त होत आहे.
विशेषतः विदर्भ आणि मराठवाड्यात ढगाळ वातावरण निर्माण होण्यासह काही ठिकाणी हलक्या ते मध्यम स्वरूपाचा पाऊस पडण्याची शक्यता आहे. त्यामुळे या भागातील शेतकऱ्यांनी हवामानातील बदलांकडे लक्ष देणे आवश्यक आहे. अवकाळी पावसामुळे शेतीमालाचे नुकसान होण्याची भीतीही व्यक्त केली जात आहे.
बदलत्या हवामानाचा आरोग्यावर परिणाम?
राज्यातील काही भागांत तापमानात घट झाल्याने पहाटेच्या वेळी गारवा जाणवत आहे. मात्र, दिवसा तापमान वाढत असल्याने नागरिकांना सकाळी थंडी आणि दुपारी उष्णतेचा सामना करावा लागत आहे. या बदलत्या हवामानाचा परिणाम आरोग्यावरही होण्याची शक्यता आहे.
FAQ
1. महाराष्ट्रातील कोणत्या भागांत पावसाची शक्यता आहे?
विदर्भ आणि मराठवाड्यातील अनेक भागांत पावसाची शक्यता वर्तवण्यात आली आहे.
2. राज्यात कोणत्या तारखेदरम्यान पाऊस पडू शकतो?
१९ ते २२ नोव्हेंबरदरम्यान पाऊस पडण्याची शक्यता आहे.
3. पावसाचे स्वरूप कसे असण्याची शक्यता आहे?
जोरदार वारे आणि विजांच्या कडकडाटासह हलका ते मध्यम पाऊस पडू शकतो.






