Ghansoli Fire: घणसोलीत ‘अनधिकृत’ लाकूड वखारीला भीषण आग; अनर्थ टळला पण या ‘भस्मासुराला’ कोणाचा आशीर्वाद?

Ghansoli Fire: : ज्या भूखंडावर ही आग लागली, त्याच्या लगतच निवासी इमारती आणि झोपडपट्टी आहे. आगीच्या ज्वाला उंचावर उठत असल्याने ही आग शेजारील इमारतींपर्यंत पोहोचते की काय, या भीतीने स्थानिक नागरिकांमध्ये प्रचंड घबराट पसरली होती.

• घणसोलीत ‘अनधिकृत’ लाकूड वखारीला भीषण आग
• काही वेळातच आगीने रौद्ररूप केले धारण 
• आजूबाजूच्या रहिवाशांमध्ये निर्माण झाले भीतीचे वातावरण 

सावन वैश्य/Ghansoli Fire: घणसोली येथील दत्तनगर, नवशील नाका परिसरातील एका मोकळ्या भूखंडावर चालणाऱ्या अनधिकृत लाकडाच्या वखारीला आज दुपारी दीड वाजेच्या सुमारास भीषण आग लागली. वखारीत मोठ्या प्रमाणावर लाकूड साठवलेले असल्याने काही वेळातच आगीने रौद्ररूप धारण केले आणि परिसरात धुराचे साम्राज्य पसरले. सुदैवाने या घटनेत कोणतीही जीवितहानी किंवा दुखापत झालेली नाही. दुपारी २:१० वाजण्याच्या सुमारास घटनेची माहिती मिळताच अग्निशमन दलाच्या गाड्या तातडीने घटनास्थळी दाखल झाल्या. कोपरखैरणे, ऐरोली आणि रबाळे एमआयडीसी अग्निशमन केंद्राच्या एकूण पाच गाड्यांनी शर्थीचे प्रयत्न करत आगीवर नियंत्रण मिळवण्याचे काम सुरू केले.

आजूबाजूच्या रहिवाशांमध्ये घबराट

ज्या भूखंडावर ही आग लागली, त्याच्या लगतच निवासी इमारती आणि झोपडपट्टी आहे. आगीच्या ज्वाला उंचावर उठत असल्याने ही आग शेजारील इमारतींपर्यंत पोहोचते की काय, या भीतीने स्थानिक नागरिकांमध्ये प्रचंड घबराट पसरली होती.

Panvel Fire News: पनवेलमध्ये २४ तासांत आगीच्या २८ घटना; अग्निशमन दलाची दिवसभर धावपळ!

अनधिकृत वखारीवर कारवाईची मागणी

या दुर्घटनेनंतर परिसरातील अनधिकृत बांधकामांचा आणि वखारींचा प्रश्न पुन्हा ऐरणीवर आला आहे. “या अनधिकृत जागेला नेमका कोणाचा आशीर्वाद आहे?” असा संतप्त सवाल आता स्थानिक विचारत आहेत. या घटनेवर प्रतिक्रिया देताना स्थानिक भाजप नगरसेवक गणेश सकपाळ यांनी प्रशासनावर निशाणा साधला.

“महानगरपालिका आणि सिडको प्रशासनाने अशा अनधिकृत भूखंडांवर तात्काळ कठोर कारवाई केली पाहिजे. आगीच्या ज्वाला लगतच्या इमारती व झोपडपट्टीपर्यंत पोहोचल्या असत्या तर मोठी जीवितहानी झाली असती. भविष्यात असा एखादा मोठा अपघात घडल्यास त्याची जबाबदारी कोण घेणार?” असा सवाल त्यांनी उपस्थित केला. दरम्यान, ही आग नेमकी कशामुळे लागली याचे कारण अद्याप स्पष्ट झालेले नसून, संबंधित अधिकाऱ्यांकडून घटनेची सखोल चौकशी सुरू आहे.

Mira Bhayandar News: मीरा-भाईंदरमध्ये आगीचा भडका! दोन दिवसांत १२९ ठिकाणी आग; फटाक्यांच्या आतषबाजीमुळे सुरक्षेचा प्रश्न ऐरणीवर

पनवेलमध्ये २४ तासांत आगीच्या २८ घटना

पनवेल महानगरपालिका हद्दीसह परिसरात गेल्या २४ तासांत आगीच्या तब्बल २८ घटनांची नोंद झाली आहे. पनवेल महानगरपालिकेच्या अग्निशमन दलाला ८ नोव्हेंबर रोजी सकाळी ८ वाजल्यापासून ९ नोव्हेंबर रोजी सकाळी ८ वाजेपर्यंत विविध ठिकाणांहून आगीबाबतचे कॉल प्राप्त झाले. या घटनांमध्ये कचरा, गवत, झाडे तसेच इमारती आणि इतर ठिकाणी आग लागल्याच्या प्रकारांचा समावेश आहे.