Devendra Fadnavis
Devendra Fadnavis : नागपूर शहरातील विकासकामांना आता वेग देण्याचे निर्देश मुख्यमंत्री देवेंद्र फडणवीस यांनी दिले आहेत. ‘अमृत-2’ योजनेअंतर्गत सुरू असलेली सर्व कामे मार्च 2027 पर्यंत गतीने आणि दर्जेदार पद्धतीने पूर्ण करा, असे स्पष्ट आदेश मुख्यमंत्री फडणवीस यांनी अधिकाऱ्यांना दिले.
रामगिरी शासकीय निवासस्थानी झालेल्या बैठकीत नागपूरमधील ‘अमृत-2’ योजनेची कामे, रस्ते खोदकाम, त्यानंतर होणारे पुनर्भरण आणि पोहरा नदीचे प्रदूषण निर्मूलन व पुनरुज्जीवन या विषयांचा सविस्तर आढावा घेण्यात आला. बैठकीला आमदार प्रवीण दटके, स्थायी समिती सभापती शिवाणी दाणी, महापालिका आयुक्त डॉ. विपीन इटनकर यांच्यासह विविध विभागांचे अधिकारी उपस्थित होते.
‘अमृत-2’च्या कामांसाठी शहरातील अनेक ठिकाणी रस्ते खोदण्यात आले आहेत. मात्र, खोदकामानंतर रस्त्यांची व्यवस्थित डागडुजी न झाल्याने नागरिकांना त्रास सहन करावा लागत असल्याच्या तक्रारी बैठकीत मांडण्यात आल्या. पावसाळ्यात नागरिकांना झालेल्या त्रासाचा मुद्दाही उपस्थित करण्यात आला.
यावर फडणवीस यांनी रस्त्यांच्या पुनर्भरणाच्या कामात कोणतीही तडजोड खपवून घेतली जाणार नाही, असं स्पष्ट केलं. विशेषतः सिमेंटच्या रस्त्यांवरील कामं करताना वैज्ञानिक आणि शास्त्रीय पद्धतीचा काटेकोरपणे वापर करावा, असे निर्देश त्यांनी दिले. भविष्यात रस्ते खोदकाम आणि पुनर्भरणासाठी सर्व संबंधित विभागांची संयुक्त बैठक घेऊन एक सर्वसमावेशक धोरण तयार करण्याचे आदेशही त्यांनी दिले.
कामात हलगर्जीपणा करणाऱ्या अधिकारी आणि कंत्राटदारांवर कठोर कारवाई केली जाईल, असा इशाराही मुख्यमंत्र्यांनी दिला.
दरम्यान, पोहरा नदीच्या प्रदूषणाचा प्रश्नही बैठकीत चर्चेत आला. महापालिका आयुक्त डॉ. इटनकर यांनी या प्रकल्पाबाबत सादरीकरण केलं. नदीचं प्रदूषण कमी करण्यासाठी विविध ठिकाणी सिव्हरेज ट्रीटमेंट प्लांट उभारण्यात येणार आहेत.
जयताळा येथे 10 एमएलडी आणि चिखली येथे 35 एमएलडी क्षमतेचे एसटीपी उभारण्याची योजना आहे. याशिवाय चिंचभवन, बीडीपेठ आणि सोमलवाडा येथे पंपिंग स्टेशन उभारण्यात येणार असल्याची माहिती बैठकीत देण्यात आली.
आता ‘अमृत-2’च्या कामांना ठरलेल्या मुदतीत पूर्ण करण्याचं आव्हान प्रशासनासमोर आहे. रस्ते खोदकामामुळे होणारा नागरिकांचा त्रास कमी करण्यासोबतच पोहरा नदी पुनरुज्जीवनाचा प्रकल्पही वेळेत पूर्ण करण्यावर प्रशासनाला भर द्यावा लागणार आहे.
अन्नातील भेसळीवर थेट वार! तुकाराम मुंढेंच्या कडक शिस्तीला पुण्याच्या गणेश मंडळांची अनोखी साथ
.png "Videos"){kind=small}
