फोटो सौजन्य सोशल मीडिया
गुरुवारी सायंकाळी पदयात्रेमुळे शहरातील प्रमुख मार्गांवरील वाहतूक विस्कळीत झाली. वर्धा मार्गावरील कृपलानी चौक ते छत्रपती चौक या दरम्यान वाहनांच्या लांबच लांब रांगा लागल्या होत्या. अजनी रेल्वे स्थानक, मोक्षधाम, घाट रोड, मेडिकल चौक, अशोक चौक, महाल आणि सेंट्रल एव्हेन्यू परिसरातही वाहतुकीचा खोळंबा झाला.
सायंकाळी कार्यालये सुटल्यानंतर घरी परतणाऱ्या नोकरदारांना तासन्तास रस्त्यावर अडकून राहावे लागले. रेल्वे स्थानक आणि विमानतळ गाठण्यासाठी निघालेल्या प्रवाशांचीही मोठी धावपळ झाली. पर्यायी मार्गांचा वापर करून कोंडीतून बाहेर पडण्याचा प्रयत्न करणारे वाहनचालकही अडकून पडले.
Nagpur News : आशा, गटप्रवर्तकांचा धडकला ‘दे धडक’ मोर्चा; दिवाळीनंतर बैठकीचे मुख्यमंत्र्यांचे आश्वासन
धंतोली परिसरातील रुग्णालयांकडे जाणाऱ्या रुग्णांसह त्यांच्या नातेवाइकांना वाहतूक कोंडीचा मोठा त्रास सहन करावा लागला. अंतर्गत रस्त्यांवरही वाहनांच्या रांगा लागल्याने रुग्णवाहिकांना मार्ग मिळणे कठीण झाले. दीक्षाभूमी मार्ग, लक्ष्मीनगर चौक, व्हीआयपी रोड, सेमिनरी हिल्स, दीक्षाभूमी चौक आणि आठरस्ता चौक ते गणेशनगर चौकापर्यंत वाहतुकीचा वेग मंदावला होता.
अनेक तास नागरिक कोंडीत अडकून पडले असतानाही परिस्थिती नियंत्रणात आणण्यात यंत्रणेला अपेक्षित यश आले नाही, अशी भावना नागरिकांनी व्यक्त केली. काही ठिकाणी वाहतूक पोलीस उपस्थित होते; मात्र वाहनांच्या लांबच लांब रांगा कमी होत नसल्याने पोलिसांच्या पूर्वनियोजनावर प्रश्नचिन्ह निर्माण झाले.
पदयात्रेच्या स्वागतासाठी काही व्यापारी संघटनांनी विविध ठिकाणी मंच उभारले होते. मात्र, याच पदयात्रेमुळे बाजारपेठांमध्ये ग्राहकांची ये-जा थांबल्याने व्यापाऱ्यांना आर्थिक फटका बसला. ऐन सणासुदीच्या काळात ग्राहकांना दुकानांपर्यंत पोहोचणेही कठीण झाले. धरमपेठ बाजारपेठेत अनेक तास वाहतुकीचा खोळंबा राहिल्याने व्यापारी आणि दुकानदारांना ग्राहकांची प्रतीक्षा करावी लागली.
अशा गर्दीच्या काळात पदयात्रांचे आयोजन टाळायला हवे होते, अशी नाराजी व्यापाऱ्यांनी व्यक्त केली. दिल्लीतील आर्थिक नुकसानीची चर्चा करणाऱ्यांनी नागपुरातील व्यापारी आणि सामान्य नागरिकांच्या अडचणींचाही विचार करावा, अशी प्रतिक्रिया उमटली. अनेक वाहनचालकांनी कोंडीत अडकून राहण्यापेक्षा वाहने मागे फिरवून घरी जाणे पसंत केले. त्यामुळे पदयात्रेच्या आयोजनापेक्षा नागरिकांना झालेल्या मनस्तापाचीच शहरात अधिक चर्चा रंगली.
.png "Videos"){kind=small}
